ވަޒީރުންނަށް ރުހުން ހޯދުމުގެ މައްސަލަ ރައްޔިތުންގެ މަޖިލީހުގެ ކަމާބެހޭ ކޮމިޓީއިން ފާސްކޮށްފައިވަނީ ގަވާއިދާ ޚިލާފަށް ކަމަށް މަޖިލީހުގެ މިއަދުގެ ޖަލްސާގައި ނިންމައި އެ މައްސަލަ އަނބުރާ ކޮމިޓީއަށް ފޮނުވާލައިފިއެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހުގެ މެންބަރުންގެ ގޮތުގައި ރައީސުލްޖުމްހޫރިއްޔާ އައްޔަންކުރައްވާ ވަޒީރުންނަށް ގާނޫނުއަސާސީގެ 129 ވަނަ މާއްދާގެ (ރ) ގައިވާ ގޮތުގެމަތިން ރުހުން ހޯދަން މަޖިލީހަށް ފޮނުއްވަން ޖެހެއެވެ.
އެގޮތުން ރައީސް ޑރ.މުޙައްމަދު މުޢިއްޒުގެ 17 ނޮވެންބަރު 2023 ގައި އައްޔަންކުރައްވާފައިވާ 22 ވަޒީރުންނަށް މަޖިލީހުގެ ރުހުން ހޯއްދެވުމަށްޓަކައި ފޮނުއްވީ މިދިޔަމަހުގެ 19 ވަނަ ދުވަހުއެވެ.
މަޖިލީހުގެ ކަމާބެހޭ ކޮމިޓީން މައްސަލަ ދިރާސާކުރުމަށްފަހު ތަޅުމަށް ފޮނުވުމުން މިއަދުގެ ޖަލްސާއަށް އެ މައްސަލަ އެޖެންޑާކުރިއެވެ. މި މައްސަލަ ފެށުމާއެކު މިއަދުގެ ޖަލްސާގައި ތުޅާދޫ ދާއިރާގެ މެންބަރު ހިސާން ޙުސައިން ނިޒާމީ ނުކުތާއެއް ނަންގަވައި ވިދާޅުވީ މިނިސްޓްރީތަކުގެ މަސައްކަތުގެ ދާއިރާތައް ފާސްނުކޮށް މިނިސްޓްރީތަކުގެ ޒިންމާތައް މިނިސްޓަރަކަށް އަދާކުރެއްވޭނެ ކަމުގެ ގާބިލުކަން މަޖިލީހަށް ވަޒަން ނުކުރެވޭނެ ކަމަށެވެ.
އެގޮތުން މި މައްސަލަ ކޮމިޓީން ނިންމާފައިވަނީ ގަވާއިދާ ޚިލާފަށްކަން ފާހަގަކުރައްވައި ކޮމިޓީ ރިޕޯޓަށް ވޯޓަށް ނޭހެނެ ކަމަށް ހިސާން ވިދާޅުވިއެވެ. މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުޙައްމަދުު އަސްލަމް މި ނިޒާމީ ނުކުތާ ބަލައިގަތެވެ.
އެއަށްފަހު މަޖިލީހުގެ މައިނޯރިޓީ ލީޑަރާ މަޝްވަރާ ކުރައްވަން ކަމަށް ވިދާޅުވެ ޖަލްސާ މެދުކަނޑައިލެއްވިއެވެ. ޖަލްސާ ފެށްޓެވުމަށްފަހު އަސްލަމް މައްސަލަ އަނބުރާ ކޮމިޓީއަށް ފޮނުވިކަން ހާމަކުރައްވައިފައެވެ.
