ސަރަޙައްދީ ނުތަނަވަސްކަން އިތުރުވަމުންދަނިކޮށް އިސްރާއީލުން ލުބުނާނަށް ދޭ ހަމަލާތައް ފުޅާކޮށްފިއެވެ. ބައިނަލްއަޤުވާމީ މުޖުތަމަޢުން ކަންބޮޑުވުން ފާޅުކޮށް، ހަމަލާތައް މަޑުޖައްސާލުމަށް ގޮވާލަމުންދިޔަ ނަމަވެސް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ލުބުނާނުގައި ހިންގާ އަސްކަރީ އޮޕަރޭޝަންތައް ފުޅާކުރަން ނިންމާފައިވާކަން އިޢުލާނުކުރައްވާފައެވެ.

މިއީ ހަނގުރާމަ އިތުރަށް ވަރުގަދަވެގެންދާނެ ކަމުގެ ނިޝާނެކެވެ.ލުބުނާނުގެ ދެކުނުގައިވާ ތާރީޚީ ބޯފޯޓް ކާސަލް އިސްރާއީލު ސިފައިންގެ ބާރުގެ ދަށަށް ގެނައުމަށްފަހު ވާހަކަދައްކަވަމުން ނަތަންޔާހޫ ވިދާޅުވީ، މިއީ ”ވަރަށް ބޮޑު ކުރިއެރުމެއް“ ކަމަށާއި، މިއީ އިސްރާއީލުގެ އަސްކަރީ ސްޓްރެޓެޖީއަށް އައި ބޮޑު ބަދަލެއް ކަމަށެވެ. އަދި ކުރިން ހިޒްބުاللهގެ ބާރުގެ ދަށުގައި އޮތް ސަރަޙައްދުތަކުގައި ހިންގާ އޮޕަރޭޝަންތައް ”ވަރުގަދަކޮށް ފުޅާކުރުމަށް“ އިސްރާއީލު ސިފައިންނަށް އަމުރުކޮށްފައިވާނެ ކަމަށް އޭނާ ވިދާޅުވިއެވެ.އިސްރާއީލުގެ އޮފިޝަލުން ވިދާޅުވާ ގޮތުގައި، ބޯފޯޓް ކާސަލް ހިފުމަކީ ލުބުނާނުގެ ދެކުނުގައި އިސްރާއީލުގެ ބާރުގަދަވެ، ބޯޑަރުން ބޭރުގައި ސަލާމަތީ ސަރަޙައްދުތަކެއް ގާއިމުކުރުމަށް ކުރާ މަސައްކަތުގެ ބައެކެވެ. ނަތަންޔާހޫ ވިދާޅުވީ އިސްރާއީލުގެ ރައްޔިތުން ރައްކާތެރިކުރުމަށްޓަކައި ޣައްޒާ، ލުބުނާނު އަދި ސޫރިޔާ ހިމެނޭހެން އެކި ފްރަންޓްތަކުގައި އިސްރާއީލުން ހަރަކާތްތެރިވަމުންދާ ކަމަށެވެ.ނަމަވެސް، ލުބުނާނުން ވަނީ މި ފިޔަވަޅު ހަރުކަށި އިބާރާތުން ކުށްވެރިކޮށްފައެވެ. ލުބުނާނުގެ ބޮޑުވަޒީރު ނަވާފް ސަލާމް ތުހުމަތު ކުރެއްވި ގޮތުގައި، އިސްރާއީލުގެ އެއްގަމު ސިފައިން ލުބުނާނުގެ އެތެރެއަށް ވަންނަމުންދާއިރު، އެ ގައުމުން ގެންގުޅެނީ ”ހުރިހާ އެއްޗެއް ހަލާކުކޮށްލުމުގެ“ ސިޔާސަތެކެވެ. ހަމަނުޖެހުންތައް އިތުރުވަމުންދާތީ، ފަރަންސޭސިވިލާތުން ވަނީ އދ. ގެ ސަލާމަތީ މަޖިލީހުގެ ކުއްލި ބައްދަލުވުމަކަށް އެދިފައެވެ.ފަރަންސޭސި ޚާރިޖީ ވަޒީރު ޜޯން-ނޮއެލް ބަރޯ ވިދާޅުވީ، އަމިއްލަ ނަފްސު ދިފާޢުކުރުމުގެ ޙައްޤު އިސްރާއީލަށް އޮތްކަން ފަރަންސޭސިވިލާތުން ގަބޫލުކުރި ނަމަވެސް، އަސްކަރީ އޮޕަރޭޝަންތައް ފުޅާކޮށް ލުބުނާނުގެ އިތުރު ސަރަޙައްދުތަކަށް ވެރިވެގަތުމަކީ ބަލައިގަނެވޭނެ ކަމެއް ނޫން ކަމަށެވެ.މި ހަނގުރާމައިގެ ސަބަބުން އިންސާނީ އެހީތެރިކަމަށް ބޭނުންވާ މިންވަރު ވެސް ވަނީ އިތުރުވެފައެވެ. ލުބުނާނުގެ ދެކުނުގެ ރަށެއް ކަމަށްވާ ޓައިރްގައި ހުންނަ ހީރާމް ހޮސްޕިޓަލް ކައިރިއަށް އިސްރާއީލުން ދިން ހަމަލާއެއްގައި ހޮސްޕިޓަލުގެ 13 މުވައްޒަފަކަށް އަނިޔާވެ، އިމާރާތަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެއެވެ. ލުބުނާނުގެ ސިއްހީ އިދާރާތަކުން ވަނީ ބައިނަލްއަޤުވާމީ މުޖުތަމަޢުގެ އެހީތެރިކަމަށް އެދި، އާންމު ޚިދުމަތްތައްދޭ ތަންތަނަށް ހަމަލާދިނުމަކީ ބައިނަލްއަޤުވާމީ އިންސާނީ ގާނޫނުތަކާ ޚިލާފު ކަމެއް ކަމަށް ބުނެފައެވެ.މިދަނޑިވަޅުގައި ޣައްޒާގެ އިންސާނީ ހާލަތު ވެސް އޮތީ ވަރަށް ގޯސްކޮށެވެ. ފަލަސްތީނުގެ ސިއްހީ ވުޒާރާއިން ބުނި ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ޝަހީދުވި މީހުންގެ އަދަދު ވަނީ މަދުވެގެން 72,939 އަށް އަރާފައެވެ. އަދި 172,000 އަށްވުރެ ގިނަ މީހުންނަށް ވަނީ އަނިޔާވެފައެވެ. ދީރުލް ބަލަހްގައި ހުންނަ މައި ހޮސްޕިޓަލެއްގެ ޖަނަރޭޓަރުތައް ހަލާކުވެ، ކަރަންޓުގެ މައްސަލަ ބޮޑުވުމުގެ ސަބަބުން ޣައްޒާގެ މެދުތެރޭގެ ސިއްހީ ޚިދުމަތްތައް ހުއްޓިދާނެ ކަމުގެ އިންޒާރު ވެސް އޮފިޝަލުން ވަނީ ދެއްވާފައެވެ.ހަމައެއާއެކު، އެމެރިކާއާއި އީރާނާ ދެމެދު ޚާރިޖީ ގުޅުންތައް ރަނގަޅުކުރުމަށް ކުރާ މަސައްކަތްތަކަށް ވެސް ވަނީ ހުރަސްތަކެއް ކުރިމަތިވެފައެވެ. މުހައްލިލުން ބުނާ ގޮތުގައި ދެ ގައުމުގެ ދެމެދުގައި އޮތް ބޮޑެތި ޚިޔާލުތަފާތުވުންތަކުގެ ސަބަބުން މަޝްވަރާތައް ވަނީ މަޑުޖެހިފައެވެ. އިޤްތިޞާދީ ދަތިތަކާ ކުރިމަތިލާން ޖެހިފައިވީ ނަމަވެސް، އީރާނުގެ އޮފިޝަލުން ވިދާޅުވަނީ ޚާއްޞަކޮށް ޗައިނާއަށް ތެޔޮ އެކްސްޕޯޓްކޮށްގެން އެ ގައުމުގެ އިޤްތިޞާދު ހިފަހައްޓަމުންދާ ކަމަށެވެ.ލުބުނާނުގައި އަސްކަރީ ހަރަކާތްތައް ފުޅާވަމުންދިއުމާއި، ޣައްޒާގެ އިންސާނީ ކާރިސާ ގޯސްވަމުންދިއުމާއި، އެމެރިކާ-އީރާނު މަޝްވަރާތައް ހުއްޓިފައި އޮތުމުގެ ސަބަބުން، ކުރިއަށް އޮތް ހަފުތާތަކުގައި މުޅި ސަރަޙައްދުގެ ހަމަޖެހުން އިތުރަށް ގެއްލިގެން ހިނގައިދާނެ ކަމުގެ ބިރު ވަނީ ބޮޑުވެފައެވެ.