ގްރީންލޭންޑަށް އެމެރިކާގެ ރައީސް ޚާއްސަ މަންދޫބެއް ކަނޑައެޅުއްވި ޚަބަރުތަކާގުޅިގެން އާރޓިކް ކަނޑުގެ ބިޔަ ޖަޒީރާ ގްރީންލޭންޑްގެ ބޮޑުވަޒީރު ޖެން ފްރެޑްރިކް ނީލްސަން ފޭސްބުކްގައި ލިއުއްވާފައިވަނީ “ މިހާރު ފުދިއްޖެ، އިތުރަށް ފިއްތުން ކުރިމަތި ކުރާނެ ވާހަކަތައް ބާއްވާފައި ގްރީން ލޭންޑަކީ އެމެރިކާގެ ބައެއް ކަމަށް ދެކެމުން އަންނަ ހުވަފެނުން ހޭލައި ހަގީގަތާ ކުރިމަތިލާން ތައްޔާރުވެ ބަލަ “ މިފަދަ އިބާރާތެކެވެ.

ރައީސް ޓްރަމްޕްގެ ރިޔާސަތުގެ ފުރަތަމަ ދައުރުގައިވެސް ގްރީންލޭންޑަށް އެމެރިކާ ވެރިވެގަތުމުގެ ވިސްނުން ވަރަށްބޮޑަށް ގެންގުޅުއްވިއެވެ. މިހާރު އެންމެ ފަހުން ވިދާޅުވަމުން ގެންދަވަނީ ދެން އެންމެ ފުރަތަމަ އަތުލައިގަންނާނީ ކިއުބާ ކަމަށާއި އެއަށްފަހު ތަރުތީބުން ގްރީން ލޭންޑާއި އީރާން އަދި އެއަށްފަހު މެކްސިކޯއަކީ އެމެރިކާގެ ބައެއް ކަމުގައި ހައްދަވާނެ ކަމަށެވެ. އަދި އެކަމުގައި އަހަރެން ހުއްޓުވުމުގެ ބާރު ހަމައެކަކަށްވެސް ލިބިފައި ނުވާނެ ކަމަށެވެ. ކޮލަމްބިއާއާއި ބެހޭގޮތުން ރައީސް ޓްރަމްޕް ވިދާޅުވެފައިވަނީ އެ ގައުމަކީ އެއްވެސް ހަކަތައެއް ނެތް ގައުމެއް ކަމަށާއި އެ ގައުމުގެ ރައީސް ގުސްތާވޯ ފެޓްރޯއަކީ އެއްވެސް އާރެއް ބާރެއް ހުރި ބޭފުޅެއްނޫންކަމަށާއި ގައުމު ހިންގަވަނީވެސް އެމެރިކާއަށް މަސްތުވާ ތަކެތި ވިއްކައިގެން ލިބޭ ލާރިކޮޅުން ކަމަށެވެ. ގްރީންލޭންޑާ ބެހޭގޮތުން އެއާރފޯސް 1 ގައި އިންނަވާފައި ރިޕޯރޓަރުންނަށް ވިދާޅުވެފައިވަނީ ގްރީންލޭންޑަކީ އެމެރިކާއިން ދޫކޮށްލެވިދާނެ ޖަޒީރާއެއް ނޫނެވެ. އެމެރިކާގެ ސެކިއުރިޓީއަށްޓަކައި ގްރިން ލޭންޑް އެމެރިކާގެ ބާރުގެ ދަށަށް ގެންނަން ޖެހެއެވެ. ގްރީން ލޭންޑަކީ ޑެންމާރކްގެ ކޮލޮނީއެއްގެ ގޮތުގައި އޮންނަތާ އެތައް ސަތޭކަ އަހަރު ވެއްޖެއެވެ. އެހެންނަމަވެސް އެ ޖަޒީރާގެ ރައްވެހިންނަކީ 1970 ވަނައަހަރުން ފެށިގެން އެބައިމީހުންގެ ދާޚިލީ އެންމެހާ ކަންތައް ތަސައްރުފް ކުރުމުގެ ފުރިހަމަ ގާނޫނީ އިޚްތިޔާރު ލިބިފައިވާ ބައެކެވެ. ގްރީންލޭންޑުގެ ބޮޑުވަޒީރު ވިދާޅުވެފައިވަނީ އެ ޖަޒީރާއަކީ އެމެރިކާގެ ބައެއްކަމުގައި ވުމުގެ އެއްވެސް ވިސްނުމެއް އެ ޖަޒީރާގެ ރައްޔިތުން ނުގެންގުޅޭ ކަމަށެވެ. އަދި އެމެރިކާގެ ބަޔަކަށް ވުމަކީ ގައުމުގެ ރައްޔިތުންގެ ވިސްނުމުގައި އޮތް ކަމެއްވެސް ނޫނެވެ. ގްރީން ލޭންޑަކީ އެމެރިކާގެ ބައެއް ކަމުގައި ހެއްދެވުމަށް ކޮންމެ އަގެއް އަދާކުރަން ޖެހުނަސް އެކަންކުރައްވާނެކަން އެމެރިކާގެ ރައީސް ތަކުރާރު ކުރައްވަމުން ގެންދެވުމާއެކު ގްރީން ލޭންޑްގެ ރައްޔިތުން ދެކޭގޮތް ހޯދުމަށް ދާދިފަހުން ނެގުނު ވޯޓުގައ %85 ރައްޔިތުން ބުނެފައިވަނީ ރައީސް ޓްރަމްޕްގެ ވާހަކަފުޅުތަކަކީ ބިރުވެރި އިންޒާރެއް ކަމުގައެވެ. މިދިޔަ އަހަރު މާރޗް މަހުގެ ތެރޭގައި ކޮންގްރެސްގައި ވާހަކަފުޅުދައްކަވަމުން ރައީސް ޓްރަމްޕް ވިދާޅުވެފައިވަނީ ގްރީންލޭންޑްގެ ރައްޔިތުންނަށް އެބައިމީހުން ބޭނުންވާގޮތެއް އިޚްތިޔާރު ކުރުމުގެ ހައްގު ލިބިފައިވާކަން ގަބޫލުފުޅު ކުރައްވާ ކަމަށެވެ. އެކަމަކު އޭގެ ވިއްސަކަށް ސިކުންތުފަހުން ބާރުގެ ބޭނުންކޮށްގެންވިޔަސް ގްރީންލޭންޑަކީ އެމެރިކާގެ ބައެއްކަމުގައި ހައްދަވާނެކަމަށް ވިދާޅުވިއެވެ.ގްރީންލޭންޑްގެ ފޮޓޯއެއް