ޔުކްރެއިންގެ ވެރިރަށް ކިޔީވްއަށް ރަޝިޔާގެ ސިފައިން ދިން މިސައިލް ހަމަލާތަކެއްގައި މީހުން ދިރިއުޅޭ އިމާރާތްތަކަކަށް ގެއްލުންވެ، މަދުވެގެން ދެ މީހަކު ޒަޚަމްވެފައިވާ ކަމަށް ޔުކްރެއިންގެ އޮފިޝަލުން ބުނެފިއެވެ.
ކިޔީވްގެ މޭޔަރު ވިޓާލީ ކްލިޗްކޯ ވިދާޅުވީ، މިއަދު އެ ސިޓީގެ ބޭރު އަވަށްތަކުގައި ބާރުގަދަ ގޮވުންތަކެއްގެ އަޑު އިވިފައިވާ ކަމަށާއި، ބެލިސްޓިކް މިސައިލްތައް އަމާޒުކޮށްފައިވަނީ އިންފްރާސްޓްރަކްޗަރަށް ކަމަށެވެ. މި ހަމަލާގައި ވެއްޓުނު މިސައިލްގެ ބައިތައް ސިޓީގެ ހުޅަނގު ފަރާތުގައި ހުރި ފަސް ބުރީގެ އެޕާޓްމަންޓް އިމާރާތެއްގައި ޖެހިފައިވާއިރު، މީހުން ދިރިއުޅޭ އެހެން އިމާރާތެއްގެ ބޭރު ފަޅިއަށް ވެސް ވަނީ ގެއްލުން ލިބިފައެވެ.
ސިޓީގެ އަސްކަރީ އިދާރާއިން ކަށަވަރުކޮށްދިން ގޮތުގައި މި ހަމަލާގައި ދެ މީހަކު ވަނީ ޒަޚަމްވެފައެވެ. މީގެ އިތުރުން ކުޑަކުދިންގެ ބަލަހައްޓާ މަރުކަޒެއް ހިންގާ އިމާރާތަކަށް ވެސް ވަނީ ގެއްލުން ލިބިފައެވެ.
މި ހަމަލާތައް ދީފައި މިވަނީ، ހަކަތަ ފޯރުކޮށްދޭ ތަންތަނާއި، ފާލަންތަކާއި އަދި އެހެނިހެން މުހިންމު އިންފްރާސްޓްރަކްޗާތަކަށް އަމާޒުކޮށް ރަޝިޔާއިން އިތުރު ހަމަލާތަކެއް ދޭން ތައްޔާރުވަމުންދާ ކަމަށް ޔުކްރެއިންގެ ރައީސް ވޮލޮޑިމީރް ޒެލެންސްކީ އިންޒާރު ދެއްވާފައި ވަނިކޮށެވެ.
މިދަނޑިވަޅުގައި، ހަނގުރާމައަށްފަހު ގައުމު އަލުން ބިނާކުރުމާއި، މާލީ އެހީތެރިކަމާއި، އަދި ކުރިމަގުގެ ސަލާމަތީ އިންތިޒާމުތަކާ ގުޅޭ މަޝްވަރާތައް ކުރިއަށްދާއިރު، ޔުކްރެއިނުން ދަނީ ހުޅަނގުގެ ބައިވެރިންގެ ކިބައިން ސަލާމަތީ ޔަގީންކަމަށް އެދެމުންނެވެ.
މި ހަމަލާ އަމާޒުވެފައި މިވަނީ، ހަތަރު އަހަރަށްވުރެ ގިނަ ދުވަސްވެފައިވާ މި ހަނގުރާމައަށް ހައްލެއް ހޯދުމުގެ މަގުސަދުގައި، އެމެރިކާ އިސްވެގެން ރަޝިޔާއާއި ޔުކްރެއިނާ ދެމެދު އަބޫދާބީގައި ބޭއްވުމަށް ހަމަޖެހިފައިވާ މަޝްވަރާތައް ފެށުމަށް ތިން ދުވަހަށް ވެފައި ވަނިކޮށެވެ.
ރަޝިޔާގެ ރައީސް ވްލަޑިމިއަރ ޕޫޓިންގެ ޚާއްސަ މަންދޫބު ކިރިލް ދިމިތުރީވްއާ އެކު ވައިޓް ހައުސްގައި ބޭއްވި ބައްދަލުވުމަކަށްފަހު، އެއްބަސްވުމަކަށް އާދެވިދާނެ ކަމުގެ އުއްމީދު އެބައޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ދާދި ފަހުން ވިދާޅުވެފައެވެ.
