މެލޭޝިއާގައި އިއްޔެ ހިނގި ކާރު އެކްސިޑެންޓުގައި ނިޔާވި ދިވެހި ދަރިވަރުގެ އާއިލާއަށް، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

އެމަނިކުފާނުގެ ރަސްމީ ސޯޝަލްމީޑިއާ އެކައުންޓުގައި ހިއްސާކުރެއްވި މެސެޖެއްގައި ވަނީ އެކްސިޑެންޓުގައި ނިޔާވި އާމިނާ އިމިލީ ނާޡިމްގެ އާއިލާއަށް ތަޢުޒިޔާ ވިދާޅުވެ، އިމިލީގެ ފުރާނައަށް ސުވަރުގޭގެ ދާއިމީ ނިޢުމަތް ލެއްވުން އެދި ދުޢާ ދަންނަވާފައެވެ.

މަޢުލޫމާތު ލިބިފައިވާގޮތުގައި މި ހާދިސާ ހިނގާފައިވަނީ އިއްޔެގެ ވަގުތެއްގައި ބާޒާރުކުރުމަށްފަހު ގެއަށް އައި މަގުމަތީގައި، އިމިލީ ދަތުރުކުރި ޓެކްސީ އެކްސިޑެންޓުވެ، ފުރޮޅާލައިގެންނެވެ.

އައްޑޫ ސިޓީ ހިތަދުއަށް ނިސްބަތްވާ، އުމުރުން 21 އަހަރުގެ އިމިލީއަކީ މެލޭޝިއާގެ ޓެއިލާސް ޔުނިވަރސިޓީގައި ތަޢުލީމު ހާސިލުކުރަމުންދިޔަ ދަރިވަރެކެވެ.