ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމާއެކު އޮގަސްޓް މަހުގެ އަގުތަކުގެ އިންޑެކްސް ދަށަށް ގޮސްފިއެވެ.

މޯލްޑިވްސް ބިއުރޯ އޮފް އެސްޓެޓިސްޓިކްސް (އެމްބީއެސް) އިން ސެޕްޓެމްބަރު 28 ގައި ޝާއިއުކޮށްފައިވާ ތަފާސްހިސާބުތަކުން ދައްކާގޮތުގައި، 2026 ވަނަ އަހަރުގެ ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ ކޮންސިއުމަރ ޕްރައިސް އިންޑެކްސް (ސީޕީއައި) %1.15 ދަށަށް ދިއުމުގެ މައިގަނޑު ސަބަބަކީ ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމާ ގުޅިގެންނެވެ.

މިގޮތުން، އޮގަސްޓް މަހު ކަރަންޓުގެ އަގު %3.21 ދަށަށް ގޮސްފައިވާއިރު، ވައިގެ ދަތުރުފަތުރުގެ އަގު ވަނީ %2.80 ހެޔޮވެފައެވެ. އަދި ދުންފަތުގެ ބާވަތްތަކުގެ އަގު ވަނީ %25.45 ގެ ބޮޑު މިންވަރަކަށް ދަށަށް ގޮސްފައެވެ. ބައެއް ބާވަތްތަކުގެ ކާބޯތަކެއްޗާއި ޚިދުމަތްތަކުގެ އަގު ބޮޑުވި ނަމަވެސް، ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ އަގުތަކުގެ އިންޑެކްސް %1.15 ދަށަށް ގޮސްފައިވެއެވެ. މިއަހަރުގެ ޖުލައި މަހާ އަޅާބަލާއިރު އަގުތައް ދަށަށް ދިޔަ ނަމަވެސް، 2025 ވަނަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހުގެ އަގުތައް ހުރީ %0.76 މަތީގައެވެ. މިއީ މަހުން މަހަށް ބަލާއިރު އަގުތައް ދަށްވި ނަމަވެސް، އަހަރުން އަހަރަށް ބަލާއިރު އަގުތަކަށް ކުޑަ ކުރިއެރުމެއް އައިސްފައިވާކަމަށް ރިޕޯޓުގައި ފާހަގަކޮށްފައިވެއެވެ.
މަހުން މަހަށް އައި މި ބަދަލަކީ ގޭބިސީތަކުން އާންމުކޮށް ގަނެއުޅޭ ތަކެތީގެ އަގަށް އައި އެވްރެޖް ބަދަލެކެވެ. ބައެއް ތަކެތީގެ އަގު އޮގަސްޓް މަހު ވަނީ އުފުލިފައެވެ. އެގޮތުން ކިރާއި، ކިރުގެ އުފެއްދުންތަކުގެ އިތުރުން ބިހުގެ އަގު %1.99 އުފުލިފައިވާއިރު، މޭވާއާއި ތަރުކާރީގެ އަގު ވަނީ %1.19 ބޮޑުވެފައެވެ. އަދި މަހުގެ ބާވަތްތަކުގެ އަގު ވަނީ %0.83 އުފުލިފައެވެ.
ޚިދުމަތްތަކުގެ އަގަށް ބަލާއިރު، މުވާސަލާތީ ޚިދުމަތުން %2.23، ގެސްޓްހައުސްތަކުގެ އަގުތަކުން %2.72، އަދި ކާބޯތަކެތީގެ ޚިދުމަތްދޭ ތަންތަނާއި ހޮޓާތަކުގެ އަގުތަކުން %0.68 ވަނީ އިތުރުވެފައެވެ. މީގެ އިތުރުން ސިއްހީ ޚިދުމަތްތަކުގެ އަގު ވަނީ %0.99 އުފުލިފައެވެ.
ރާއްޖޭގެ ކޮންސިއުމަރ ޕްރައިސް އިންޑެކްސް (ސީ.ޕީ.އައި) %1.15 ދަށަށް ގޮސްފައިވާއިރު ރިޕޯޓުގައި މާލެއާއި އަތޮޅުތެރޭގެ ނިސްބަތްވެސް ހާމަކޮށްފައި ވެއެވެ. އެގޮތުން، މާލޭގެ ސީޕީއައި އިންޑެކްސްވަނީ ޖުލައި މަހާ އަޅާބަލާއިރު %1.57 އިންސައްތަ ދަށަށްގޮސްފައެވެ. އަދި އަތޮޅުތެރޭގައި މިއަދަދު ވަނީ %0.54 ދަށްވެފައެވެ.
ކޮންސިއުމަރ ޕްރައިސް އިންޑެކްސްއަކީ ގޭބިސީތަކުން ބޭނުންކުރާ ތަކެއްޗާއި ޚިދުމަތްތަކުގެ އަގަށް އަންނަ ބަދަލުތައް ދެނެގަތުމަށް ބޭނުންކުރާ މިންގަނޑެކެވެ. އިންފްލޭޝަން ނުވަތަ ތަކެތީގެ އަގު އުފުލޭ މިންވަރު ބެލުމަށް އެމް.ބީ.އެސް އިން ކޮންމެ މަހަކު މާލެއާއި އަތޮޅުތެރެ ހިމެނޭހެން 9,500 އަށްވުރެ ގިނަ ތަކެއްޗާއި ޚިދުމަތުގެ އަގުތައް އެއްކުރެއެވެ.