މާލޭގެ މަގުތަކަކީ އަމާން، ރައްކާތެރި އަދި ހިނގާބިނގާވެ އުޅުމަށް ފަސޭހަ ތަނަކަށް ހެދުމަށް މާލެ ސިޓީ ކައުންސިލުން ކުރިއަށްގެންދާ މަޝްރޫޢުގެ ދަށުން، މި އަހަރުގެ މިހާތަނަށް މާލޭގެ 180 މަގެއް މަރާމާތުކޮށް ނިންމައިފިއެވެ.

މާލެ ސިޓީ ކައުންސިލްގެ ރޯޑް މެނޭޖްމަންޓް ސެކްޝަންގެ ތަފާސްހިސާބުތަކުން ދައްކާގޮތުގައި، މި އަހަރުގެ ޖެނުއަރީ މަހުގެ ތެރޭގައި 12 މަގެއް މަރާމާތުކޮށްފައިވާއިރު، ފެބްރުއަރީ މަހު 23 މަގެއް ވަނީ މަރާމާތުކޮށްފައެވެ. އަދި މާރިޗު މަހު 28 މަގު، އޭޕްރީލް މަހު 15 މަގު، މެއި މަހު 20 މަގު، ޖޫން މަހު 19 މަގު އަދި ޖުލައި މަހު 18 މަގެއް ވަނީ މަރާމާތުކޮށްފައެވެ.

މި އަހަރުގެ މިހާތަނަށް އެންމެ ގިނަ މަގު މަރާމާތުކޮށްފައިވަނީ ނިމިދިޔަ އޮގަސްޓް މަހުގައެވެ. އެ މަހުގެ ތެރޭގައި އެކަނިވެސް 45 މަގެއް ވަނީ މަރާމާތުކޮށް ނިންމާފައެވެ.

މީގެއިތުރުން، މިހާރުވެސް މާލޭގެ ތިން މަގެއް މަރާމާތުކުރުމުގެ މަސައްކަތް ދަނީ ކުރަމުންނެވެ. އެއީ މާފަތްތަކުރުފާނު މަގާއި، ފާށަނާކިލަގެފާނު މަގުގެ އިތުރުން ސަތަރު ގޯޅިއެވެ.

މިކަމާ ގުޅޭގޮތުން މާލެ ސިޓީގެ މޭޔަރ އާދަމް ޢާޒިމް ވިދާޅުވީ، މަގުތަކާއި މަގުތަކުގެ ޕޭވްމަންޓްތައް މަރާމާތުކުރުމުގެ މަސައްކަތަކީ އާންމު ރައްޔިތުންނަށް ދިމާވާ ދަތިތައް ޙައްލުކުރުމަށް އިސްކަންދީގެން ކުރިއަށްގެންދާ ވަރަށް މުހިންމު މަސައްކަތެއް ކަމަށެވެ. އަދި މާލޭގެ މަގުތަކުގެ ފެންވަރު ރަނގަޅުކޮށް، ރައްޔިތުންނަށް ހިތްފަސޭހަ މާހައުލެއް ޤާއިމުކޮށްދިނުމަކީ ކައުންސިލްގެ މުހިންމު އަމާޒެއްކަން މޭޔަރ ފާހަގަކުރެއްވިއެވެ.

ވެރިރަށް މާލޭގެ މަގުތަކުގެ ޙާލަތު ރަނގަޅުކޮށް، އަމާން ވެއްޓެއް ޤާއިމުކުރުމުގެ ގޮތުން މާލެ ސިޓީ ކައުންސިލުން މެދުނުކެނޑި މި މަސައްކަތް ކުރަމުން އަންނައިރު، ކުރިއަށް އޮތް ތަނުގައިވެސް މި މަސައްކަތްތައް ކުރިއަށްވުރެ ބާރު ދުވެއްޔެއްގައި ކުރިއަށް ގެންދަވާނެ ކަމުގެ ޔަޤީންކަން މޭޔަރ ޢާޒިމް ވަނީ ދެއްވާފައެވެ.