ހަށިގަނޑުގައި ފޮރުވައިގެން ދޮޅު ކިލޯއަށްވުރެ ގިނަ މަސްތުވާތަކެތި އެތެރެކުރަން އުޅުނު ނޭޕާލު ދެ މީހަކު ހައްޔަރުކޮށްފިއެވެ.

ދިވެހި ފުލުހުން ޚިދުމަތުން ބުނިގޮތުގައި، އެމީހުން ހައްޔަރުކޮށްފައިވަނީ ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައެވެ.

ހައްޔަރުކޮށްފައިވަނީ ނިއްކަ ތަމަންގް (47އ) އާއި، އީތްރާނީ ގަލެ (40އ) ކަމަށާއި، މި މީހުން ހައްޔަރުކޮށްފައިވަނީ އެ މީހުން ރާއްޖެ އައިއިރު ހަށިގަނޑުގައި މަސްތުވާތަކެތި ރައްކާކޮށްފައި ހުރިކަމަށް ތުހުމަތުކުރެވުމާ ގުޅިން ކަމަށް ފުލުހުން މަޢުލޫމާތުދެއެވެ.

ފުލުހުން ބުނީ، މި ތުހުމަތާ ގުޅިގެން މޯލްޑިވްސް ކަސްޓަމްސް ސަރވިސްއިން އެ މީހުން ފުލުހުންނާ ހަވާލުކުރުމުން، ޑްރަގް އެންފޯސްމަންޓުން އެ މީހުން ހައްޔަރުކުރީ މި މަހު 25 ވަނަ ދުވަހު ކަމަށެވެ. އަދި އެ މީހުން ބަލައިފާސްކުރިއިރު 142 ބުލެޓް ފެނިފައިވާކަމަށާއި، މި ތަކެތީގެ ވަގުތީ ބަރުދަން 1.5 ކިލޯއަށްވުރެ އިތުރު ކަމަށެވެ.

މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް އަމުރުކޮށްފައި ވާކަމަށްވެސް ދިވެހި ފުލުހުންގެ ޚިދުމަތުން ވަނީ ބުނެފައެވެ.