އިޒްރޭލާއި އެމެރިކާ ފަލަސްޠީނުގައި ހިންގާ ނަސްލު ނައްތާލުމުގެ ޖަރީމާތަކުގެ ބޭނުމަކީ ޙަމާސް ނަށްތާލުމަށް ކަމަށް ބުނި ނަމަވެސް އިޒްރޭލާއި އެމެރިކާގެ ސިޔާސަތު މިއަށްވުރެ ނުރައްކާތެރިއެވެ. ޙަޤީޤީ ބޭނުމަކީ ފަލަސްޠީނުގެ ދައުލަތެއް، އުފެދުނަ ނުދިނުމާއި އެކަމަށް މަސައްކަތްކުރާ ކޮންމެ ފަރާތެއް ނަށްތާލުމެވެ. ޙަމާސް ނަށްތާލުމަށް ފަހު ފަލަސްޠީނުގެ ފަތަޙަ ޖަމާއަތުން ވެސް ފަލަސްޠީނުގެ މިނިވަން ދައުލަތެއް ޤާއިމުކުރުމުގެ މަސައްކަތްކުރާ ނަމަ ފަތަޙަ ޖަމާޢަތް ވެސް ނައްތާލާނެކަމަށް މިހާރު އިޒްރޭލުން ވަނީ ބުނެފައެވެ. 

  ފަތަޙަ ޖަމާޢަތަކީ ބައިނަލްއަޤުވާމީ ގޮތުން ފަލަސްޠީނުގެ ރައްޔިތުންގެ ސަޕޯޓްނެތަސް ފަލަސްތީނު ތަމްޘީލު ކުރާފަރާތު ގޮތުގައި އދ.އިން ޤަބޫލުކުރާ ޖަމާޢަތެވެ. މިގޮތަށް އދ. އިން ވެސް އިސްލާމީ ޤައުމުތައް ހިމެނޭ އޯ.އައި.ސީ އިން ވެސް ނިންމާފައިވަނީ އެމެރިކާ އާއި އިޒްރޭލުން ރުހޭ ގޮތަކީ އެއީކަމަށް ގަބޫލުކުރަން ޖެހެއެވެ.

  ފަތަޙަ ޖަމާޢަތަކީ އިޒްރޭލާއި ހަނގުރާމަ ނުކޮށް ހަމައެކަނި ވާހަކަ ދައްކައިގެން ފަލަސްޠީނު ގެ މިނިވަންކަމަށް މަސައްކަތްކުރާ ހަމައެކަނި އެމެރިކާ އާއި އިޒްރޭލާއި ހުޅަގުގެ އިސްތިޢުމާރީ ބާރުތައް ބޭނުންވާހާ ގޮތަކަށް ޢަމަލު ކުރާ ފަލަސްޠީނުގެ ޖަމާޢަތެވެ. ފަލަސްޠީން އޮތޯރިޓީ ރާމަށްލާގައި ހިންގަނީ ފަތަޙަ ޖަމާޢަތެވެ. ފަތަޙަ ޖަމާޢަތުގެ މިހާރުގެ ވެރިއަކީ މަޙުމޫދު ޢައްބާސް އެވެ.

ފަލަސްޠީން އޮތޯރިޓީ އަށް އިސްލާމީ ޤައުމުތަކުން ކިޔަނީ ފަލަސްތީންގެ ސަރުކާރެވެ. އިޒްރޭލުން ދެކެނީ ފަލަސްޠީން އޮތޯރިޓީ އަކީ ފަލަސްޠީނުގެ ރައްޔިތުންގެ ޢާއްމު ޚިދުމަތުގެ ކަންކަން ބަލަހައްޓާ މުނިސިޕަލް ކައުންސިލް ކަމުގައެވެ.

އެމެރިކާ ގެ ނުފޫޛު ގެ ދަށުގައިވާ މިޞްރާއި ސަޢޫދީ އާއި އުރުދުން އާއި ބަހުރައިނު އާއި. ޔޫ. އޭ. އީ. ފަދަ ޤައުމުތައް އެހީތެރިކަން ފޯރު ކޮށްދެނީ ފަތަޙަ ޖަމާޢަތަށެވެ. ފަލަސްޠީނުގެ މިހާރު ގެ ހާލަތަށް ބަލާއިރު، ޙަމާސް ޖަމާޢަތް ކޮންޓްރޯލްކުރާ ޣައްޒާގެ ބިމުގެ ބޮޑު ސަރަހައްދަކަށް އިޒްރޭލުން ވެރިވެ ގަތުމަށް ފަހު އިޒްރޭލުގެ ވިސްނުންހުރީ ފަލަސްޠީނު ގެ ހުރިހާ ބިމެއްގެ މައްޗަށް ވެރިވެ ގަތުމަށަށެވެ. ދެރައީ ޢަރަބި ގައުތަކަށް މިހިންގާ ޖަރީމާތައް ނޭގޭކަމަށް ހަދަން މަޖުބޫރުވެފައި ވާތީއެވެ.