އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގާ ޖަރީމާތަކުގެ ރަހަ ދެކޭނެ ކަމަށް އިސްލާމިކް ރިވޮލިއުޝަނަރީ ގާޑްސް ކޯޕްސްގެ ޗީފް ކޮމާންޑަރު މޭޖާ ޖެނެރަލް ހުސެއިން ސަލާމީ ވިދާޅުވެއްޖެއެވެ.
ސަލާމީ މިހެން ވިދާޅުވީ ހުޅަނގު އަޒަރުބައިޖާންގެ ހުޅަނގު އުތުރު ޕްރޮވިންސްގައި ވައިގެ މަރުކަޒެއް އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ސަލާމީ ވިދާޅުވި ގޮތުގައި ފަލަސްތީނުގެ ރައްޔިތުންނަށް ކާމިޔާބީގެ ފޮނި ރަހަ ވަރަށް އަވަހަށް ލިބޭނެއެވެ. އަދި އިސްރާއީލާއި ދުޝްމަނުން ފަލަސްތީނުގެ ރައްޔިތުންނާ ދެކޮޅަށް ހިންގާ ނުބައި ޖަރީމާތަކުގެ ބަދަލު ހިފުމުގެ ހިތި ރަހަ ވަރަށް އަވަހަށް ލިބޭނެއެވެ.
އީރާނުން އިސްރާއީލާ ދެކޮޅަށް ވެފައިވާ ”ޓްރޫ އޮޕަރޭޝަން ޕްރޮމިސް“ އަށް އިޝާރާތް ކުރައްވައި، ފަލަސްތީނުގެ ރައްޔިތުންނަށް އިސްރާއީލުން ދިން އަނިޔާގެ ބަދަލު ހިފުމަށް އީރާނުން ވެފައިވާ ވައުދަކީ ޔަޤީން ކަމެއް ކަމަށް ސަލާމީ ވަނީ ވިދާޅުވެފައެވެ.
ސަލާމީ ވިދާޅުވީ މިއަދު އީރާނަކީ ބައިނަލްއަގްވާމީ މައިދާނުގައި ”ވަރުގަދަ އަދި ބާރުގަދަ ޤައުމެއް“ ކަމަށާއި ހައްދުފަހަނައަޅާފައިވާ ކިބުރުވެރި ބާރުތަކާ ވާހަކަ ދައްކަނީ ބާރުގެ ބަހުން ކަމަށެވެ.
ހަމައެހެންމެ ދުވަހަކުވެސް ދުޝްމަނުންގެ ހައްދުފަހަނައަޅާފައިވާ އަމަލުތަކާއި ދެކޮޅަށް ފަހަތަށް ނުޖެހޭނެ ކަމަށް ސަލާމީ ވަނީ ވިދާޅުވެފައެވެ.
މީގެ އިތުރުން ސަލާމީ ވަނީ އިސްލާމިކް ރިޕަބްލިކް އޮފް އިރާންގެ މަތިވެރި އަގުތައް ރައްކާތެރި ކުރުމަށްޓަކައި އިރާނުގެ ސިފައިން އެމީހުންގެ ފުރާނަ ޤުރުބާންކޮށް ޝަހީދުވި ކަން ފާހަގަކުރައްވާފައެވެ.
