އިންޑިޔާގެ ވެރިރަށް ޑެލްހީގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި މަދުވެގެން ހަ ”ނިއުބޯން“ ކުދިން މަރުވެއްޖެ އެވެ. ޑެލްހީގެ ވިވެކް ވިހާރަ ސަރަހައްދުގައި ހުންނަ ހޮސްޕިޓަލުގައި އަލިފާން ރޯވެފައިވަނީ ރޭ އިރާކޮޅުގެ ބަގުތެއްގައެވެ. ތުއްތު ކުދިން ތިބި ތަނުގައި 12 ވަރަކަށް ކުދިން ތިބި ކަމަށާ އެއްކުއްޖަކު މަރުވެފައިވަނީ އަލިފާން ރޯވުމުގެ ކުރިން ކަމަށް ސީނިއަރ ޕޮލިސް އޮފިސަރަކު މައުލޫމާތު ދީފައެވެ.

މިހާދިސާ ހިނގުމާއި އެކު ހޮސްޕިޓަލުގެ ވެރިން ވަނީ ފިލާފަ ކަމަށް ޚަބަރު ލިބެއެވެ. ނަމަވެސް އެމީހުން ހޯދާ ކުށްވެރިވާ ފަރާތްތަކާމެދު ފިޔަވަޅު އަޅާނެ ކަމަށް އިދާރާ ތަކުން ބުނެފައި ވެއެވެ.

ޑެލްހީގެ ފަޔާ ޑިޕާޓްމަންޓްގެ ޑިރެކްޓަރ ވިދާޅުވެފައިވާ ގޮތުގައި ހާދިސާ ހިނގުމާއި އެކު އެތަނަށް 14 ފަޔާ ޓްރަކް ފޮނުވުނެވެ. ނަމަވެސް އަލިފާން ރޯވެފައިވަނީ އޮކްސީޖަން ސިލިންޑަރު ތަކެއްގައި ކަމުން އަލިފާންގަޑު ކޮންޓްރޯލް ވުމުގެ ކުރިން ބާރަށް ފެތުރި ގަތީއެވެ.

މިހާދިސާއާއި ގުޅިގެން އެކްސްގައި ކުރައްވާފައިވާ ޕޯސްޓެއްގައި ބޮޑުވަޒީރު ނަރެންދުރަމޯދީ ވިދާޅުވީ މިއީ ވަރަށްވެސް ހިތާމަވެރި ހާދިސާއެއްކަމުގައެވެ.

ހޮނިހިރު ދުވަހު ހަވީރުވެސް އިންޑިޔާގައި ވަނީ އަލިފާނުގެ ބޮޑު އެހެން ހާދިސާއެއް ހިނގާފައެވެ. އެއީ ގުޖްރާތުގެ ރާޖްކޮޓްގައި ހުންނަ ސްޕޯޓްސް އާކޭޑެއްގައި ހިނގި ހާދިސާއެކެވެ. އެހާދިސާގައި 27 މީހުން މަރުވެފައިވެއެވެ.