ކުޑަ ކުއްޖަކަށް އަނިޔާ ކުރިކަމުގެ ތުހުމަތުގައި ހައްޔަރު ކުރި އިންޑިއާގެ މެއިޑުގެ ބަންދަށް އިތުރު 15 ދުވަސް ޖަހައިފިއެވެ.

ކުޑަ ކުއްޖަކަށް އަނިޔާ ކުރި މައްސަލައިގައި އިންޑިއާގެ އުމުރުން 22 އަހަރުގެ އަންހެން މީހާ ހައްޔަރުކުރީ މިދިޔަ މަހުގެ 26 ވަނަ ދުވަހު މާލެއިންނެވެ. އޭނާގެ ބަންދަށް އެންމެ ފުރަތަމަ ޖެހީ 15 ދުވަހެވެ.

އެ މުއްދަތު ހަމަވުމުން އިއްޔެ އޭނާގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ވަނީ ބަންދަށް އިތުރު 15 ދުވަސް ޖަހާފައެވެ. މި މައްސަލައިގައި އަންހެން މީހާގެ މައްޗައް ކުރަނީ ކުޑަ ކުއްޖަކަށް ޖިސްމާނީ އަނިޔާ ކުރުމުގެ ތުހުމަތެވެ.

މި މަހުގެ 6 ވަނަ ދުވަހު ސޯޝަލް މީޑިއާގައި އާންމުވި ވީޑިއޯއަކުން ފެންނަ ގޮތުގައި ކުއްޖާ ނިންދަވަން މަސައްކަތް ކުރަމުންދިޔައިރު އިންޑިއާ އަންހެން މީހާ ވަނީ ކުއްޖާގެ މޫނު މަތީގައި ބާރަށް ޖަހާފައެވެ.