ހައިވޭގައި ހަރުކޮށްފައިވާ ސޯލާ ޕެނަލްތައް ނަގައި، އެކަމަށް ހާއްސަ ދެ ރަށަކަށް ބަދަލުކުރައްވާނެ ކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
މިއަދު ހަވީރު ހުޅުމާލެ 1 ގެ ރައްޔިތުންނާއެކު ބޭއްވި ބައްދަލުވުމުގައި ޑރ.މުޢިއްޒު ވިދާޅުވީ ސޯލާ ޕެނަލްތަކާ އެކު ހުޅުމާލެ ހައިވޭ މިހާރު ފެންނަނީ ވަރަށް ހާސްކަން ބޮޑު ތަނެއްގެ ގޮތުގައި ކަމަށެވެ.
މާލެ ސަރަހައްދުގައި މޫދު އެންމެ ރީތިކޮށް ފެންނަން އޮންނަ ސަރަހައްދަކީ އެއީ ކަން ފާހަގަކުރައްވާ ޑރ މުޢިއްޒު ވިދާޅުވީ މިހާރު ޖަހާފައިވާ ސޯލާ ޕެނަލްތަކުން އެ ސަރަހައްދުގެ ރީތިކަން ގެއްލިފައިވާ ކަމަށެވެ.
އިއާދަކުރަނިވި ހަކަތަ އަކީ މުހިންމު ކަމެއް ކަން ފާހަގަކުރައްވާ އެންވަޔަރްމެންޓަކީ އިސްކަމެއް ދޭނެ ސިޔާސަތެއް ކަމުގައި ޑރ.މުޢިއްޒު ވަނީ ވިދާޅުވެފައެވެ.
އެހެންކަމުން ހައިވޭގައި ޖަހާފައި ހުރި ސޯލާ ޕެނަލްތައް ނަގާނެ ކަމަށާއި އެ މަޝްރޫޢުއަށް ފަންޑުކުރި ފަރާތާއި މަޝްވަރާކޮށްގެން އެ ޕެނަލްތައް ދެ ރަށަކަށް ބަދަލުކުރައްވާނެ ކަމަށް ޑރ.މުޢިއްޒު ވަނީ ވިދާޅުވެފައެވެ.
މި މަޝްރޫޢުއާ ގުޅޭގޮތުން އެންވަޔަރަމަންޓް މިނިސްޓްރީން ބުނެފައިވާ ގޮތުގައި މި ސޯލާ ޕީވީ އިންސްޓޯލްމަންޓުން އަހަރަކު ގާތްގަނޑަކަށް 9.1 މިލިއަން ސޯލާ ޔުނިޓް އުފެއްދޭނެއެވެ. އަދި އެއީ ދެ މިލިޔަން ލިޓަރުގެ ޑީސަލުން އުފެއްދޭހާ ކަރަންޓު ކަމަށާއި އެހެން ކަމުން ސަރުކާރުން ތެލަށް ކުރާ ޚަރަދުތަކުން އަހަރަކު 20 މިލިޔަން ރުފިޔާ ސަލާމަތްވާނެ ކަމަށް މިނިސްޓްރީން ކުރިން ބުނެފައިވެއެވެ.
