ބަންގްލަދޭޝްގެ ވެރިކަމުން ދުރުކޮށްފައިވާ އެ ގައުމުގެ ކުރީގެ ބޮޑުވަޒީރު ޝައިޚް ހަސީނާ، އިންސާނިއްޔަތާ ޚިލާފު ޖަރީމާތަކުގެ ކުށުގައި އެކަމަނާގެ މައްޗަށް މަރުގެ ހުކުމެއް އައިސްފައިވީ ނަމަވެސް، އަންނަ ޑިސެމްބަރު މަހު އެނބުރި ގައުމަށް ވަޑައިގަންނަވާނެ ކަމަށް ވިދާޅުވެއްޖެއެވެ. މިއީ މީގެ ދެ އަހަރު ކުރިން އިންޑިއާއަށް ފިލައިވަޑައިގަތް ފަހުން މީޑިއާއަށް ދެއްވި ފުރަތަމަ ބަޔާނެވެ.

ދިއްލީގެ ފޮރިން ކޮރެސްޕޮންޑެންޓްސް ކްލަބާ އޯޑިއޯ ލިންކެއް މެދުވެރިކޮށް ވާހަކަދައްކަވަމުން، އުމުރުފުޅުން 78 އަހަރުގެ ހަސީނާ ވަނީ އެކަމަނާ ޖަލަށް ލެވިދާނެ ނުވަތަ އަވަހާރަކޮށްލެވިދާނެ ކަމަށް ގަބޫލުކުރައްވާ ކަމަށާއި، ނަމަވެސް އެނބުރި ވަޑައިގަންނަވަން ޖެހޭ ކަމަށް ވިދާޅުވެފައެވެ. 15 އަހަރުވީ އެކަމަނާގެ ވެރިކަން ނިމުމަކަށް ގެނައި 2024 ވަނަ އަހަރުގެ އުތުރިއެރުމުގައި، މުޒާހަރާގެ ބައިވެރިންނާ ދެކޮޅަށް ނުރައްކާތެރި ބާރުގެ ބޭނުންކުރުމަށް އަމުރުކުރެއްވި މައްސަލައިގައި، ޑާކާގެ ޓްރައިބިއުނަލަކުން މިދިޔަ އަހަރު ވަނީ އެކަމަނާގެ ޣައިރު ހާޒިރުގައި މަރުގެ ހުކުމް އިއްވާފައެވެ. އެކަމަނާ މި ތުހުމަތުތަކަށް އިންކާރު ކުރައްވައި ވިދާޅުވީ، ދަރިވަރުންގެ މުޒާހަރާތައް ހަރުކަށި އަމަލުތަކަކަށް ބަދަލުކޮށްލީ ބޭރުގެ ގްރޫޕްތަކުން ކަމަށެވެ. ނަމަވެސް އެކަމަށް އެއްވެސް ހެއްކެއް ދައްކަވާފައެއް ނުވެއެވެ.

އދ. ގެ ތަހުގީގު ކުރާ ފަރާތްތަކަށް ފެނިފައިވާ ގޮތުގައި، ހަސީނާގެ ސަރުކާރުން ވެރިކަމުގައި ދެމިއޮތުމަށްޓަކައި ނިޒާމީ ގޮތެއްގައި ނުރައްކާތެރި އަނިޔާވެރިކަން ބޭނުންކޮށްފައިވެއެވެ. އަދި ބީބީސީ އައި އިން ވަނީ ހަސީނާ މި ހަމަލާތަކަށް ހުއްދަ ދެއްވާ އަޑު ރެކޯޑިންއެއްގެ ސައްހަކަން ކަށަވަރުކޮށްފައެވެ. ޕްރޮސެކިއުޓަރުން މި ރެކޯޑިން ޝަރީއަތުގެ މުހިންމު ހެއްކެއްގެ ގޮތުގައި ބޭނުންކުރިއެވެ. ސަރުކާރުގެ ވަޒީފާގެ ކޯޓާއާ ގުޅިގެން ފެށުނު މުޒާހަރާތަކުގައި، ސަލާމަތީ ބާރުތަކުން ބަޑިޖެހުމުގެ ސަބަބުން 1،400 އެއްހާ މީހުން މަރުވެފައިވެއެވެ.

ފެބްރުއަރީ މަހުގެ އިންތިޚާބަށްފަހު ތާރިގު ރަހުމާންގެ ބީއެންޕީން އިސްވެ އޮވެ ހިންގާ ބަންގްލަދޭޝްގެ މިހާރުގެ ސަރުކާރުން ވަނީ ހަސީނާގެ ވާހަކަތައް ފެތުރުމާ ދެކޮޅަށް އެ ގައުމުގެ މީޑިއާތަކަށް އިންޒާރު ދީފައެވެ. އަދި އިންޑިއާއިން މިފަދަ ނޫސްވެރިންގެ ބައްދަލުވުމަކަށް ފުރުސަތު ދިނުމުން ”ނުރުހުން“ ފާޅުކޮށްފައެވެ. ޑާކާއިން ދަނީ އެކަމަނާ އަނބުރާ ގައުމަށް ގެނައުމަށް މަސައްކަތް ކުރަމުންނެވެ. އިންޑިއާއިން ބުނަނީ އެ ހުށަހެޅުން މުރާޖައާ ކުރަމުންދާ ކަމަށެވެ.

މުހައްލިލުން އިންޒާރު ދޭ ގޮތުގައި އެނބުރި ވަޑައިގަތުމަކީ ބޮޑު ނުރައްކަލެއް އޮތް ކަމެކެވެ. ޑާކާގައި ހުންނަވާ އެނަލިސްޓް ޑޭވިޑް ބާގްމަން ވިދާޅުވީ، އެކަމަނާ ވަޑައިގަންނަވާ ވަގުތުން ހައްޔަރުކުރާނެ ކަމަށް ބެލެވޭ ކަމަށެވެ. އަދި ވާދަވެރި ގްރޫޕްތައް ކަމުގައިވާ ބީއެންޕީގެ ސަޕޯޓަރުންނާއި، ނޭޝަނަލް ސިޓިޒަންސް ޕާޓީ އަދި އިސްލާމީ ޖަމާއަތްތައް ހިމެނޭ ގޮތަށް އެކަމަނާގެ މައްޗަށް އިއްވާފައިވާ ހުކުމް ތަންފީޒު ކުރުމަށް ގޮވާލައި އެއްވެދާނެ ކަމަށެވެ.

އެހެންނަމަވެސް، ގައުމުން ބޭރުގައި ހުންނެވުމަކީވެސް އޭގެ ގެއްލުންތަކެއް ހުރި ކަމެކެވެ. ހަސީނާގެ އަވާމީ ލީގު ސިޔާސީ ހަރަކާތްތަކުން މަނާކޮށް، ފެބްރުއަރީ މަހުގެ އިންތިޚާބުގައި ބައިވެރިވުން ވަނީ ހުރަސްއަޅާފައެވެ. މީގެ ސަބަބުން ޕާޓީގެ އިސް ލީޑަރުން ފިލައިގެން ބޭރަށް ދިޔައިރު، މެދުފަންތީގެ މެންބަރުން ވަނީ ނުރައްކަލަށް ހުށަހެޅިފައެވެ. އަރުވާލެވިގެން ހުންނެވި ކުރީގެ ވަޒީރު މުހައްމަދު އަލީ އަރަފާތު އިންޒާރު ދެއްވި ގޮތުގައި، ހަސީނާ އެނބުރި ވަޑައިނުގެންފިނަމަ، ކުރިމަތިވަމުންދާ އަނިޔާވެރިކަމާއި ބަންދުގައި ތިއްބާ މަރުވާ މީހުންގެ ސަބަބުން ޕާޓީ ”ނެތިގޮސްދާނެ“ އެވެ. ބަންގްލަދޭޝްގެ އޮފިޝަލުން ވަނީ ނިޒާމީ ގޮތެއްގައި އަވާމީ ލީގުގެ ސަޕޯޓަރުންނަށް އަމާޒުކުރާ ކަމަށް ބުނާ ވާހަކަ ދޮގުކޮށްފައެވެ.

ބާގްމަން ފާހަގަކުރެއްވި ގޮތުގައި، ހަސީނާގެ ސިޔާސީ މުހިންމުކަން މިހާރު ބިނާވެފައިވަނީ އަރުވާލެވިގެން ހުންނަވައިގެން ވެރިކަން ކުރެއްވުމުގެ ބަދަލުގައި، ގައުމަށް ވަޑައިގެން ކުރިމަތިވެފައިވާ ނަތީޖާތަކާ ކުރިމަތިލެއްވުމުގެ މައްޗަށެވެ. އެކަމަނާ ދިއްލީގައި ހުންނެވުމުގެ ސަބަބުން އިންޑިއާ އާއި ބަންގްލަދޭޝްގެ ގުޅުމަށް މިހާރުވެސް ވަނީ ބުރޫއަރާފައެވެ. ޑާކާއިން ދަނީ ކުށްވެރިވެފައިވާ ފިލައިގެން އުޅޭ މީހަކަށް ހިމާޔަތް ދޭ ކަމަށް ބުނެ ނިއުދިއްލީއަށް ތުހުމަތު ކުރަމުންނެވެ.