ހަނގުރާމަ ހުއްޓާލުމަށް އޮތް ފިއްތުންތަކަށް އިޒްރޭލުން ދެކޮޅުހަދައި، ލުބުނާނާއި ސޫރިޔާގައި އަދިވެސް ހަނގުރާމަ ކުރިއަށް ގެންދިއުމަށް އިސްރާއިލުން ނިންމައިފިއެވެ. ބައިނަލްއަގުވާމީ ފިއްތުންތައް އިތުރުވަމުންދިޔަ ނަމަވެސް އަދި ސަރަހައްދީ ނުތަނަވަސްކަން ކުޑަކުރުމަށް އެމެރިކާއާއި އީރާނާ ދެމެދު ދާދިފަހުން އެއްބަސްވި ސީޒްފަޔަރއާ ހިލާފަށް، ލުބުނާނާއި ސޫރިޔާގެ ހިފާފައިވާ ސަރަހައްދުތަކުން އިޒްރޭލު ފަހަތަށް ނުޖެހޭނެ ކަމަށް އެ ގައުމުގެ ބޮޑުވަޒީރު ބެންޖަމިން ނަތަންޔާހޫ އިއުލާނުކޮށްފިއެވެ.ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ނަތަންޔާހޫ ވިދާޅުވީ، ލުބުނާނުގެ ދެކުނުގައި އޭނާ ސިފަކުރެއްވި ”ސެކިއުރިޓީ ބަފަރ ޒޯން“ ނުވަތަ ރައްކާތެރިކަމުގެ ސަރަހައްދުގައި، ބޭނުންވާ މުއްދަތަކަށް އިޒްރޭލުގެ ސިފައިން ތިބޭނެ ކަމަށެވެ.

މި ބަޔާން ނެރެފައިވަނީ މި ހަފްތާގެ ފަހުކޮޅު ރަސްމީކޮށް ސޮއިކުރުމަށް ހަމަޖެހިފައިވާ އެމެރިކާ-އީރާން އެއްބަސްވުމާ ގުޅިފައިވާ ނާޒުކު ސީޒްފަޔަރއެއް ދެމެހެއްޓުމަށް ޑިޕްލޮމޭޓުން މަސައްކަތް ކުރަމުންދާ ދަނޑިވަޅެއްގައެވެ.އީރާނުގެ ތާއީދު އޮންނަ ހިޒްބުالله ޖަމާއަތާއެކު ހިނގަމުންދާ ކުރިމަތިލުންތަކަށްފަހު، އިޒްރޭލުން މިހާރު ވަނީ ލުބުނާނުގެ ގާތްގަނޑަކަށް 570 އަކަ ކިލޯމީޓަރުގެ ސަރަހައްދެއްގެ ކޮންޓްރޯލް ނަގާފައެވެ. 2023 ވަނަ އަހަރުގެ އޮކްޓޯބަރު މަހަށްފަހު ވަރުގަދަވެ، 2024 ވަނަ އަހަރު އިޒްރޭލުން އެއްގަމު މަގުން ލުބުނާނަށް އެރުމާއެކު ފުޅާވި މި ހަނގުރާމައިގައި 3،000 އަށްވުރެ ގިނަ މީހުން މަރުވެ، ލުބުނާނުގެ ދެކުނުގެ ބޮޑު ސަރަހައްދެއް ވަނީ ސުންނާފަތިވެފައެވެ.ނަތަންޔާހޫ ބާރުއަޅުއްވައި ވިދާޅުވީ، އޭނާ ”އީރާނުގެ ޓެރަރިސްޓް އަތްތައް“ ކަމަށް ސިފަކުރެއްވި ޖަމާއަތްތަކާ ދެކޮޅަށް އިޒްރޭލުން އަމިއްލަ ދިފާއުގައި މަސައްކަތް ކުރަންޖެހޭ ކަމަށާއި، ތެހެރާނާއި އެ ގައުމުގެ ބައިވެރިންގެ ފަރާތުން އޮތް ނުރައްކާ ފިލައިގެން ނުދާ ކަމަށެވެ. އަދި އިޒްރޭލުގެ ބޯޑަރުތަކާ ކައިރީގައި އީރާނުގެ ނުފޫޒު ގަދަވިޔަ ނުދިނުމަށްޓަކައި ފިޔަވަޅު އެޅުން ކުރިއަށް ގެންދާނެ ކަމަށް އޭނާ ވިދާޅުވިއެވެ.

އޭނާގެ މި ވާހަކަތަކުގެ ސަބަބުން ސީޒްފަޔަރގެ މަސައްކަތްތަކަށް އާ ގޮންޖެހުންތަކެއް ކުރިމަތިވާނެ ކަމަށް ބެލެވެއެވެ. ރިޕޯޓްތައް ބުނާގޮތުން، އެމެރިކާއާއި އީރާނާ ދެމެދު ހުށަހެޅިފައިވާ އެއްބަސްވުމުގައި ލުބުނާނު ހިމެނޭހެން ހުރިހާ ފްރަންޓެއްގައި އަސްކަރީ ހަރަކާތްތައް ވަގުތުން އަދި ދާއިމީކޮށް ހުއްޓާލުމަށް ގޮވާލާފައިވެއެވެ. މުހައްލިލުން އިންޒާރު ދޭގޮތުގައި، ހިފާފައިވާ ސަރަހައްދުތަކުން ފޭބުމަށް އިޒްރޭލުން ދެކޮޅުހެދުމަކީ މިހާރުވެސް ނާޒުކު ފައްތަރެއްގައި އޮތް އެއްބަސްވުމަށް އިތުރު ލޮޅުންތަކެއް އަރާނެ ކަމެކެވެ.އާދިއްތަ ދުވަހު ބެއިރޫތުގެ ދެކުނު ސަރަހައްދުތަކަށް އިޒްރޭލުން ދިން ވައިގެ ހަމަލާއެއްގައި ތިން މީހުން މަރުވުމާ ގުޅިގެން ނުތަނަވަސްކަން ވަނީ އިތުރަށް ބޮޑުވެފައެވެ. މި ހަމަލާގެ ސަބަބުން ތެހެރާނާއި އެމެރިކާއާ ދެމެދު ކުރިއަށްދާ މަޝްވަރާތަކަށް ބުރޫއަރާފާނެ ކަމުގެ ބިރު ވޮޝިންގޓަނުން ފާޅުކުރި ކަމަށް ރިޕޯޓްތައް ބުނެއެވެ. އެހެންނަމަވެސް، އެ ބިރުވެރިކަމާއެކުވެސް، ސީޒްފަޔަރއާ ގުޅޭ އެއްބަސްވުމުގައި އެރޭގެ ވަގުތެއްގައި ސޮއިކޮށްފައިވާ ކަމަށް މައުލޫމާތު ލިބެއެވެ.ސަރަހައްދީ ސުލްހައިގެ އެއްބަސްވުމަކަށް މަސައްކަތް ކުރައްވާ އެމެރިކާގެ ރައީސް ޑޮނަލްޑް ޓްރަމްޕާ ހުރިހާ ކަމެއްގައި އެއްބަސްވެވަޑައިނުގަންނަވާ ކަމަށްވެސް ނަތަންޔާހޫ އިއުތިރާފުވެވަޑައިގަތެވެ. އެހެންނަމަވެސް، އިޒްރޭލުގެ ލީޑަރު ވިދާޅުވީ އޭނާގެ އެންމެ އިސް ޒިންމާއަކީ އިޒްރޭލުގެ ސަލާމަތީ މަސްލަހަތުތައް ހިމާޔަތްކުރުން ކަމަށެވެ.ހޯމަ ދުވަހުގެ ކުރީކޮޅު އިޒްރޭލުގެ ޑިފެންސް މިނިސްޓަރު އިޒްރޭލް ކާޓްޒް ވެސް ވަނީ ސަރުކާރުގެ މި ނިންމުމަށް ބާރުދީ، ލުބުނާނާއި ސޫރިޔާ އަދި ގާޒާގެ ސެކިއުރިޓީ ޒޯންތަކުގައި، ވަކި މުއްދަތެއް ނެތް ގޮތަށް އިޒްރޭލު ސިފައިން ތިބޭނެ ކަމަށް ވިދާޅުވެފައެވެ.މި އިއުލާނާއެކު އެ ސަރަހައްދުގެ މުސްތަގުބަލާ މެދު އޮތް ނުތަނަވަސްކަން ވަނީ ބޮޑުވެފައެވެ. ސުލްހައަށްޓަކައި ކުރެވޭ ޑިޕްލޮމެޓިކް މަސައްކަތްތަކާއި، ސަލާމަތީ ކަންބޮޑުވުންތަކާއި، ހައްލެއް ނުލިބި ދިގުލައިގެން ގޮސްފައިވާ ހަމަނުޖެހުންތަކުގެ މެދުގައި ސަރަހައްދުގެ މަސްރަހު ވަނީ އޮޅުންބޮޅުންވެފައެވެ