ރަޝިޔާގެ ރައީސް ލަޑިމީރ ޕޫޓިން އެމެރިކާއަށް ކުރެއްވި ދަތުރުފުޅަށް ނިސްބަތްކޮށް ”ހަނގުރާމައިގެ ޖަރީމާ ހިންގަމުންގެންދާ މީހަކަށް ރަތް ދޫލައިގެ މަރުހަބާ“ ކީ ކަމަށް ބުނެ ޔޫ އެސް އޭ ޓްޑޭ އިން މަލާމާތް ކޮށްފިއެވެ.
ދެ ލީޑަރުންގެ އަލަސްކާ ސަމިޓްގައި އެމެރިކާގެ ރައީސް ޑޮނާލްޑް ޓްރަމްޕް ހުންނެވީ ރައީސް ޕޫޓިން އަރިހުގައި ކިތަންމެހާވެސް ރަނަގަޅަށް ކުޑަކޮށްލާފައިކަން ދޭހަވެގެން ދިޔައެވެ. ރައީސް ޕޫޓިން ގެންދެވީ އެމަނިކުފާނަކީ ރަޝިޔާގެ ރައީސްކަން ފާޅުކުރައްވުމާއެކު ވަރަށް ރަނގަޅަށް އެމަނިކުފާނުގެ ޝަޚްސިއްޔަތު ހާމަކުރައްވަމުންނެވެ. ރައީސް ޓްރަމްޕް އަކީ ސިޔާސީ މައިދާނުގައި އަދިވެސް އަސާސީ ތައުލީމުގެ ދަރިވަރެއްކަން އެނގިގެން ހިނގައްޖެއެވެ. ސުޕަރޕަވަރުންގެ މި ބައްދަލު ކުރެއްވުމުގައި ރައީސް ޑޮނާލްޑް ޓްރަމްޕް އަކީ ނޯބެލެ ޕީސް ޕްރައިޒް ލިބިމަށް ކުފޫ ހަމަވާ ޝަޚްސިއްޔަތެއްކަން ތަމްސީލެއް ނުކުރެވުނެވެ. ޔޫކްރެއިން އާއި ޔޫރަޕްގެ ގައުމުތަކުން ތިބީ ރައީސް ޕޫޓިން ވިދާޅުވެދާނެ ކޮންމެއެއްޗަކަށް ރައީސް ޓްރަމްޕް “ އާއެކޭ “ ވިދާޅުވެދާނެތީ ކަންބޮޑު ވެފައެވެ. ސުލްހައިގެ ވާހަކަތަކުގެ އަޑެއްވެސް ނީވުނެވެ. ދެ ލީޑަރުންގެ ބައްދަލު ކުރެއްވުމުގައި ފާހަގަ ކުރެވުނީ ޔޫކްރެއިންގެ ހަނގުރާމައިގެ އަސްލަކީ ސޮވިއެޓް ޔޫނިއަން ރޫޅިގެން ދިއުމުން ޔޫކްރެއިން ރަޝިޔާގެ ރިޔާސަތުން ބީވެގެން ދިއުން ކަމަށް ރައީސް ޕޫޓިން ދެއްކެވި ވާހަކަފުޅެވެ. ރައީސް ޕޫޓިންގެ ވާހަކަފުޅުގައި ޔޫކްރެއިން އޮންނަން ޖެހޭނީ ރަޝިޔާގެ ބައެއްގެ ގޮތުގައެވެ. ނިއު ވޯލްޑް އޯރޑަރޭ މި ކިޔާ ނިޒާމަކުން އެކަން އޮންނަން ޖެހޭނީވެސް އެގޮތަށް ހަމަޖެހިފައެވެ. އަދި މިހާރު ހުޅަނގުގެ ޑިމޮކްރެސީ ތަކެއް ކަމުގައި ހިމެނިފައިވާ ގައުމުތައްވެސް ރަޝިޔާގެ ރިޔާސަތުގެ ދަށަށް ދާން ޖެހޭނެއެވެ.
ރައީސް ޕޫޓިން އާއެކު ބޭއްވޭ ބައްދަލު ކުރެއްވުމުގައި އެމަނިކުފާނުގެ ޝިކާރައަކަށް ނުވުމަށްޓަކައި ޔޫ ކޭ އާއި ކެނެޑާ އަދި ނޭޓޯގެ އެހެން ބައިވެރިން ރައީސް ޓްރަމްޕް އުނގަންނައިދިން ފިލާވަޅުތައް ރައީސް ޕޫޓިންއާ ބައްދަލު ވުމުން ހަނދާނެތުނީ ކަހަލައެވެ. ބައެއް ސިޔާސީ ބޭފުޅުންނަކީ އެބޭފުޅުންގެ ކުރިފުޅުމަތީގައި އެހެންމީހުންގެ ދޫ ބަންދުވެގެންދާފަދަ ޝަޚްސިއްޔަތެއް ލިބިވަޑައިގެން ތިއްބެވި ބޭފުޅުންނެވެ. ރައީސް ޕޫޓިންގެ ކުރިފުޅުމަތީގައި މިފަދަ ގޮތަކަށް ރައީސް ޓްރަމްޕް އަށް ކަންތައް މެދުވެރި ވެދާނެކަމަށް އިނގިރޭސި ވިލާތުގެ ބޮޑުވަޒީރު ހުންނެވީ ފިކުރު ބޮޑު ވެފައެވެ. މިހާތަނަށްވެސް ރައީސް ޓްރަމްޕް އޮތީ ރައީސް ޕޫޓިން ވިދާޅުވި ކޮންމެ އެއްޗަކަށް ރުހިވަޑައިގެންފައެވެ. އެންމެ ފަހުން 3 ގަޑި ބައި ވަންދެން ޔޫކްރެއިން ހަނގުރާމަ ހުއްޓުވުމަށް ދެ ބޭފުޅުން މަޝްވަރާ ކުރެއްވުމަށްފަހު މީޑިއާއަށް ދެއްވާނެ އެއްވެސް މައުލޫމާތެއް އޮތް ކަމަކަށް ނުވިއެވެ. ރައީސް ޓްރަމްޕް ވިދާޅުވީ ހަމައެކަނި “ އަހަރެމެންނަށް އެއްބަސްވުމަކަށް ނާދެވުނު ކަމުގައި ވިޔަސް ރަނގަޅު މަންޒިލަކާ ދިމާލަށް އަމާޒުކޮށް މަޝްވަރާ ކުރެވުނު ކަމަށެވެ. ނޭޓޯގެ ވެރިންނަށާއި ރައީސް ޒެލެންސްކީއަށް އަހަރެމެން ކުރި މަޝްވަރާގެ ތަފްސީލު ދަންނަވާނަމެވެ. ”
ރަޝިޔާގެ ރައީސް ޕޫޓިންއަކީ ރަޝިޔާގެ ބާރުގެ ދަށުގައި ހުރި ޔޫކްރެއިންގެ ސަރަހައްދުތައް ދޫކުރައްވާނެ ބޭފުޅެއް ނޫންކަން އަދިވެސް ރައީސް ޓްރަމްޕް އަކަށް އެނގި ވަޑައި ނުގަންނަވާކަހަލައެވެ. ރައީސް ޕޫޓިން ވިދާޅުވަމުން ގެންދަވަނީ ޔޫކްރެއިނާއެކު ދުނިޔޭގެ އެހެންސަރަހައްދުތަކުގައި ހިނގަމުންދާ ދެކޮޅުވެރިކަމަށް ވެސް ސުލްހަވެރިކަން ގާއިމް ކުރެވިގެންދާން ޖެހޭނެ ކަމަށެވެ. ޔޫކްރެއިނާއެކު ފަލަސްތީނުގެ މައްސަލައަށް ސުލްހަވެރި ހައްލެއް ގެނެވެން ޖެހޭނެއެވެ. ގައްޒާގެ ކުޑަކުދިން އެއްވެސް ބިރުވެރިކަމެއްނެތި ނިދިން ހޭލެވެން ޖެހޭނެއެވެ. އަހަރެމެން މި ދައްކާ ވާހަކަތައް ދުނިޔެއިން ގެންދަނީ އަޑުއަހަމުންނެވެ. އަހަރެން މިތަނަށް އައިސް މިހުރީ އެމެރިކާއިން ބޭނުންވާ ކޮންމެ ކަމަކަށް އާއެކޭ ބުނަން ނޫންކަން ދަންނަން ޖެހޭނެއެވެ. ރަޝިޔާއިން އަބަދުވެސް ސުލްހައަށް ތަރްހީބު ދޭނެ ކަމަށާއި ގަދަބާރުން ރަޝިޔާއަށް އެއްވެސް ކަމެއް މަޖުބޫރު ނުކުރެވޭނެ ކަމަށް ޕޫޓިން ވިދާޅުވިއެވެ.
އަލަސްކާ ބައްދަލު ކުރެއްވުމުގައިވެސް ރައީސް ޕޫޓިން ބޭނުންވާ މަގްސަދު އޮތީ ޙާސިލް ކޮށްފައެވެ. ޔޫކްރެއިން ނޭޓޯގައި ބައިވެރި ނުކުރާނެ ކަމަށާއި އަދި ޔޫކްރެއިންގެ ސެކިއުރިޓީގައި އެމެރިކާގެ އެއްވެސް ހިއްސާއެއް ނޯންނާނެކަން ރައީސް ޓްރަމްޕް ވަނީ ވިދާޅުވެފައެވެ. ރައީސް ޓްރަމްޕްގެ ވާހަކަފުޅު ނިންމާ ލެއްވީ ރައީސް ޕޫޓިން އަށް ޝުކުރުވެރިވާކަމަށް ވިދާޅުވަމުން މޮސްކޯގައި ބައްދަލު ކުރައްވާނެ ކަމަށް އިޝާރާތް ކުރައްވަމުންނެވެ.
އަލަސްކާ ބައްދަލު ކުރެއްވުމުގައި އެއްބަސްވުމަކާހަމަޔަށް ދެވިފައި ނުވިކަމުގައި ވިޔަސް ރައީސް ޓްރަމްޕް މިއަންނަ ހޯމަ ދުވަހު ރައީސް ޒެލެންސްކީއާއި ބައްދަލުކުރައްވާނެއެވެ.
މީޑިއާއި ވާހަކަދެއްކި ޔޫކްރެއިންގެ ބައެއް އާންމު ރައްޔިތުން ބުނެފައިވަނީ ދުނިޔޭގެ އެންމެ ބާރުގަދަ 2 ގައުމުގެ އެންމެ އިސްވެރިން ހަތަރު ގަޑިއިރު ވަންދެން ވާހަކަ ދައްކައި މަޝްވަރާކުރުމަށްފަހުވެސް ނަތީޖާއަކާ ހަމަޔަށް ނާދެވުމުން މުސްތަގްބަލްގައިވެސް އުންމީދެއް ނެތްކަން އެނގިގެންހިނގައްޖެއެވެ.
ޑޮނެސްކް ސަރަހައްދުން މިހާރު ޔޫކްރެއިންގެ ބާރުގެ ދަށުގައިއޮތް %30 ދޫކޮށްލުން އެމެރިކާއާއެކު ފެށިފައިވާ ހަނގުރާމަ ހުއްޓުވުމުގެ މަޝްވަރާތަކުގައި ރަޝިޔާގެ ރައީސް ޕޫޓިން ޝަރުތު ކުރައްވާނެކަމަށް ރައީސް ޒެލެންސްކީ އަށް ހަވާލާދީ ޑިފެންސް ނިއުސް އިން ޚަބަރު ދީފައި ވެއެވެ. އަދި އެއްވެސް ހާލެއްގައި ޔޫކްރެއިންގެ ލަޝްކަރުތައް ޑޮނެސްކްގެ އެ ސަރަހައްދުން ނުފައިބާނެ ކަމަށްވެސް ރައީސް ޒެލެންސްކީ ވިދާޅުވިއެވެ. އެމެރިކާއާއެކު ފަށާފައިވާ މަޝްވަރާތަކުގައި ހަނގުރާމަހުއްޓުވުމަށްފަހު ޔޫކްރެއިންގެ ސެކިއުރިޓީ ބެލެހެއްޓުމުގައި އެމެރިކާއިން ބައިވެރި ނުވާނެއެވެ. އެ ހާލަތުގައި ރަޝިޔާއިން އަނެއްކާވެސް ޔޫކްރެއިނަށް އަރާގެންފާނެ ކަމުގެ ބިރު ކުޑައެއް ނޫނެވެ. އަދި އެ ސަރަހައްދު ރަޝިޔާއަށް ދޫކޮށްލައިފިނަމަ ޔޫކްރެއިންގެ އިރުމަތީ އިންޑަސްޓްރިއަލް ސަރަހައްދު އެއްކޮށް ރަޝިޔާއަށް ލިބުނީއެވެ. ރައީސް ޕޫޓިން ބޭނުންވަނީވެސް އެގޮތެވެ.
ހަނގުރާމަ ހުއްޓުވުމުގެ މަޝްވަރާތަކުގައި ވާހަކަ ދެއްކުމަށްޓަކައި ޔޫކްރެއިނުން ރަޝިޔާއަށް ދޫކޮށްލަން އެއްބަސްވެފައިވާ ސަރަހައްދު ތަކުގެ ތަފްސީލު މިހާރު އޮންނާނީ ހުށައަޅާފައިކަމަށް ރައީސް ޒެލެންސްކީ ވިދާޅުވިކަމަށްވެސް ޑިފެންސް ނިއުސްގައި ބުނެފައި ވެއެވެ.
އަލަސްކާ ސަމިޓް ނިމިގެން މިދިޔައީ ޔޫރަޕްގެ ގައުމުތައް ސިއްސުވާލާފައިކަމަށް ލަންޑަންގައި ހުންނަ އިންޓަރނޭޝަނަލް އިންސްޓިޓިއުޓް ފޯރ ސްޓްރާޓީޖިކް ސްޓަޑީޒްގެ ސީނިއަރ ފެލޯ ނައިޖެލް ގައުލް ޑޭވީސް ބުނެފައިވެއެވެ. ޑޭވީސް ދެކޭގޮތުގައި މިހާރު ރަޝިޔާގެ ބާރުގެ ދަށުގައި ހުރި ޔޫކްރެއިންގެ ސަރަހައްދުތަކުގެ އިތުރު ސަރަހައްދުތައް ރައީސް ޕޫޓިން ބޭނުންފުޅުވެއްޖެނަމަ އެކަމަށްވެސް ރައީސް ޓްރަމްޕް އެއްބަސްވެ ވަޑައިގަތުމަކީ ދުރުކަމެއް ނޫނެވެ. އަދި އެމެރިކާއާއި ހުޅަނގުގެ ގައުމުތަކުން ރަޝިޔާއާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ބައެއް ފިޔަވަޅުތައް އުވާލުންވެސް އެކަށީގެންވެއެވެ. މިއީ ނޭޓޯގެ ކުރިމަގުން މިހާރު ފެންނަމުންދާ ވަރަށް ބަނަ ވިލާގަނޑެއްގެ ފެށުން ކަމުގައި ވެގެންދާނެއެވެ.
One Response
އަލަސްކާ ސަމިޓްގެ ނަތީޖާއެއްގެ ގޮތުން ހޮނިހިރު ދުވަހު ހެނދުނާ ހަމަޔަށް އެމެރިކާއިން ޔޫކްރެއިން ހަނގުރާމަހުއްޓުވުމަށް ކުރާ މަސައްކަތް ނިމުމަކަށް އައިސް ރަޝިޔާއަށް ކުރިމަތި ކުރުވާނެކަމަށް ރައީސް ޓްރަމްޕް އިންޒާރު ދިން ދަތިކުރުމުގެ ފިޔަވަޅުތަކަށް ރާޅުޖަހާ ގިރާލައިފިއެވެ. އެންމެ ފަހުން އަނެއްކާވެސް ރައީސް ޕޫޓިންއަށް ދުނިޔޭގެ ސިޔާސީ މައިދާން ކާމިޔާބު ކުރެވުނީއެވެ. މިއީ އަޅުގަނޑުގެ ބަހެއް ނޫނެވެ. އިނގިރޭސި ވިލާތުން ރަޝިޔާއަށް ކަނޑައަޅުއްވާފައި ހުންނެވި ކުރީގެ ސަފީރު ލައުރިސް ބްރިސްޓޯ ގެ ވިދާޅުވުމެކެވެ.