ޔޫއެފާ ޗެމްޕިއަންސް ލީގުގައި ރޭ މެންޗެސްޓަރ ޔުނައިޓެޑާއި ޕީއެސްޖީ ބައްދަލުކުރި މެޗް 3-1 ގެ ނަތީޖާއިން ފަސޭހަކަމާއި އެކު ޕީއެސްޖީއިން ކާމިޔާބު ކޮށްފިއެވެ.
މިމެޗުގެ ވަރަށް ކުރީކޮޅު ޕީއެސްޖީއިން ވަނީ ލީޑް ނަގައިފައެވެ. މިގޯލް މެޗްގެ 6 ވަނަ މިނިޓުގައި އެޓީމަށް ކާމިޔާބު ކޮށްދިނީ ނޭމާރ އެވެ. އެއަށް ފަހު ފުރަތަމަ ހާފް ނިމުމުގެ ކުރިން ޔުނައިޓެޑުން ވަނީ ނަތީޖާ ހަމަހަމަ ކޮށްފައެވެ. މި ގޯލް 32 ވަނަ މިނިޓުގައި ކާމިޔާބު ކޮށްދިނީ މާކަސް ރަޝްފޯޑެވެ.
ދެވަނަ ހާފް ފެށިގެން 69 ވަނަ މިނިޓުގައި ޕީއެސްޖީގެ މާކުއިނޯޒް ވަނީ އިތުރު ގޯލެއް ކާމިޔާބު ކޮށްދީ ލީޑް ނަގައިފައެވެ. ޕީއެސްޖީގެ 3 ވަނަ ގޯލް މެޗްގެ އިތުރު ވަގުތުގައި ކާމިޔާބު ކޮށްދިނީ ނޭމަރ އެވެ.
މި ނަތީޖާއާއިއެކު ގްރޫޕް އެހްގެ ޕީއެސްޖީ، ލެއިޕްޒީގް އަދި ޔުނައިޓެޑަށް ވަނީ 9 ޕޮއިންޓް ލިބި އެއްވަރު ވެފައެވެ. ޓޭބަލްގެ ފުލުގައި އޮތީ 3 ޕޮއިންޓާއި އެކު އިސްތަންބޫލެވެ.
ޔޫސީއެލް ގައި ރޭ ޖުވެންޓަސް އަދި ޗެލްސީވެސް ވަނީ 3 ޕޮއިންޓް ކަށަވަރު ކޮށްފައެވެ. އެއާއިއެކު ޑޯޓްމަންޑް އަދި ލާޒިއާ އެއްވަރުވެފައި ވާއިރު، ބާސާއިންވެސް ވަނީ 3 ފައިދާ 3 ގޯލާއިއެކު 3 ޕޮއިންޓް ހޯދައިފައެވެ.
