ޖޮހޯރުގައި ހިންގާ ޓެކްނޮލޮޖީ ކޮމިއުނަކުން ފެންނަ ހުރިހާ އިސްރާއީލު ރައްޔިތުން ވަގުތުން ޑީޕޯޓްކޮށްލާނެ ކަމަށް، އެ މަޝްރޫއާ ގުޅިގެން ހިންގި ގައުމީ ސަލާމަތާ ބެހޭ ތަހުގީގަކަށް ފަހު، މެލޭޝިއާގެ ބޮޑުވަޒީރު އަންވަރު އިބްރާހީމް އިންޒާރު ދެއްވައިފިއެވެ.
އެބޭފުޅާ މި ބަޔާން ދެއްވީ، ފޮރެސްޓް ސިޓީގައި ހިންގާ ސްޓާޓްއަޕް ކޮމިއުނިޓީއެއް ކަމަށްވާ ”ދަ ނެޓްވޯކް ސްކޫލް“ އާ ބެހޭ ގޮތުން އިންޓަނެޓުގައި ދެކެވުނު ވާހަކަތަކަކާ ގުޅިގެން އާންމުންގެ ނުރުހުން އަމާޒުވެ، މެލޭޝިއާގެ ސަލާމަތީ ކަންބޮޑުވުންތައް އުފެދެން ފެށުމުންނެވެ.
”އަޅުގަނޑުމެން އެކަމަކަށް ފުރުސަތެއް ނުދޭނަން،“ ނޫސްވެރިންނާ ވާހަކަދައްކަވަމުން އަންވަރު ވިދާޅުވިއެވެ. މީގެ އިތުރުން މެލޭޝިއާއިން އިސްރާއީލު ބަލައިނުގަންނާތީ، އެ ތަނުން ފެންނަ ކޮންމެ އިސްރާއީލު ރައްޔިތަކު ޑީޕޯޓްކޮށްލާނެ ކަމަށްވެސް އޭނާ ވިދާޅުވިއެވެ.
”ދަ ނެޓްވޯކް ސްކޫލް“ އަކީ ކްރިޕްޓޯކަރަންސީ އެކްސްޗޭންޖް ކޮއިންބޭސްގެ ކުރީގެ އިސް ވެރިއެއް ކަމަށްވާ ބާލާޖީ ސްރީނިވާސަން އުފެއްދި ކޯ-ލިވިން ކޮމްޕައުންޑެކެވެ. މި މަޝްރޫއަށް ސަމާލުކަން ލިބުނީ މިދިޔަ ހަފުތާގައި ސްރީނިވާސަން އިންޓަނެޓުގައި ޝާއިއުކުރި ޕްރޮމޯޝަނަލް ވީޑިއޯއަކަށް ފަހުއެވެ. އެ ވީޑިއޯގައި އޭނާ ވަނީ މި އިސްނެގުން ސިފަކޮށްދީ، މިއީ ޓެކްނޮލޮޖީއަށް ހާއްސަ ކޮމިއުނިޓީއެއްގެ ގޮތުގައި ހުށަހަޅާފައެވެ.
މި ވީޑިއޯއާ ގުޅިގެން ފާޑުކިޔުންތައް އަމާޒުވެ، އެ މަޝްރޫއު އިތުރަށް ބަލައި ފާސްކުރަން ފެށުމުން، ގައުމީ ސަލާމަތާ ބެހޭ ތަހުގީގެއް ވަނީ ފަށާފައެވެ.
މެލޭޝިއާއިން އިސްރާއީލާއެކު އެއްވެސް ޑިޕްލޮމެޓިކް ގުޅުމެއް ނުބާއްވާ އިރު، އެ ގައުމަކީ އަބަދުވެސް ފަލަސްތީނުގެ ހައްގުތަކަށް ތާއީދުކުރާ ގައުމެކެވެ. ސަރުކާރުގެ މި އިންޒާރުން ދައްކުވައިދެނީ އެ ގައުމުގައި އިސްރާއީލު ރައްޔިތުން ތިބުމާ ދެކޮޅަށް ގެންގުޅޭ ހަރުދަނާ ސިޔާސަތެވެ.
ނަމަވެސް، ”ދަ ނެޓްވޯކް ސްކޫލް“ ގައި އެއްވެސް އިސްރާއީލު ރައްޔިތަކު ހަގީގަތުގައި ދިރިއުޅެމުންދިޔަ ކަމެއް ނުވަތަ އެއްވެސް މީހަކު ޑީޕޯޓްކޮށްފައިވާ ކަމެއް ލިބިފައިވާ ރިޕޯޓުގައި ކަށަވަރުކޮށްދީފައެއް ނުވެއެވެ.
މި ތަހުގީގު ކުރިއަށްދަނީ، މެލޭޝިއާގެ ދެކުނުގައި މި މަޝްރޫއު ގާއިމުކުރުމާ ގުޅިގެން ދެކެވޭ ވާހަކަތަކާއި އޭގެ ހަރަކާތްތަކަށް އާންމުންގެ ބޮޑު ސަމާލުކަމެއް ލިބެމުންދާ ދަނޑިވަޅެއްގައެވެ.
