ކޮރަޕްޝަންގެ ތުހުމަތުތަކާ ގުޅިގެން، ސްރީލަންކާގެ ބާރުގަދަ ރާޖަޕަކްސާ އާއިލާގެ ބައެއް މެންބަރުންގެ މައްސަލަތައް އެ ގައުމުގެ ކަމާބެހޭ ފަރާތްތަކުން ތަހުގީގު ކުރަން ފަށައިފިއެވެ. މީގެ ތެރޭގައި އެ ޤައުމުގެ ކުރީގެ ރައީސް މަހިންދަ ރާޖަޕަކްސާގެ އަނބިކަނބަލުންނާއި ދަރިކަލުން ހައްޔަރުކުރުން ވެސް ހިމެނެއެވެ.

އުމުރުން 73 އަހަރުގެ ޝިރަންތީ ރާޖަޕަކްސާ އޮކްޓޫބަރު 7 ގައި ހައްޔަރުކުރީ، ކުޑަކުދިންގެ ހޮސްޕިޓަލަކަށް ސާމާނު ގަތުމަށް ދިން އެހީގެ ފައިސާއަށް، އެކަމަނާ އިސްވެ ހުންނަވާ ޗެރިޓީ ޖަމްއިއްޔާއަކުން ހިޔާނާތްތެރިވި ކަމަށް ބުނާ މައްސަލައެއްގައެވެ. ކޯޓުން ވަނީ އެކަމަނާގެ ބަންދުގެ މުއްދަތު ހުކުރު ދުވަހާ ހަމައަށް އިތުރުކޮށްފައެވެ.

ތަހުގީގު ކުރާ ފަރާތްތަކުން ތުހުމަތުކުރާ ގޮތުގައި، ޗައިނާއިން އެމް.އާރް.އައި މެޝިނެއް ހަދިޔާކޮށްފައި ވަނިކޮށް ވެސް، ސިރިލިޔާ ސަވިޔާ ފައުންޑޭޝަނުން ވަނީ ގާތްގަނޑަކަށް 100 މިލިއަން ސްރީލަންކަން ރުޕީސް، ގާތްގަނޑަކަށް 303،000 އެމެރިކާ ޑޮލަރު އެއްކޮށްފައެވެ. ކަމާބެހޭ ފަރާތްތަކުން ކޯޓުގައި ބުނެފައިވަނީ، އެ ފައިސާ ބޭނުންކޮށްފައިވަނީ ގެއެއް ގަތުމަށް ކަމަށް ބެލެވޭ ކަމަށެވެ. ނަމަވެސް އެ އާއިލާގެ ސިޔާސީ ޕާޓީން ވަނީ މި ތުހުމަތުތައް ދޮގުކޮށްފައެވެ.

އެކަމަނާގެ ދަރިކަލުން، އަދި ޕާލަމެންޓް މެންބަރު ނަމާލް ރާޖަޕަކްސާ ރިޝްވަތުގެ ތުހުމަތުގައި ސެޕްޓެމްބަރު މަހު ހައްޔަރުކޮށްފައިވާއިރު، އޭނާ އަދިވެސް ހުންނެވީ ބަންދުގައެވެ. އޭނާގެ މައްޗަށް ތުހުމަތު ކުރެވެނީ އެއާބަސް ކުންފުންޏާއެކު ސަރުކާރުން ހެދި އެއްބަސްވުމަކާ ގުޅިގެން 30،000 އެމެރިކާ ޑޮލަރުގެ ރިޝްވަތު ނެންގެވި ކަމަށެވެ. މީގެ އިތުރުން، ސަރުކާރުގެ ބިމެއް ބަދަލުކުރުމާ ގުޅިގެން 211،000 އެމެރިކާ ޑޮލަރުގެ ފައިސާގެ މުއާމަލާތެއް ހިންގި ކަމަށް ބުނާ މައްސަލައެއްގެ ތަހުގީގު ވެސް އޭނާއާ ދެކޮޅަށް ދަނީ ހިންގަމުންނެވެ.

މި އާއިލާގެ އެހެން މެންބަރުންގެ މައްސަލަތައް ވެސް ދަނީ ބަލަމުންނެވެ. އޭގެ ތެރޭގައި 2019 ވަނަ އަހަރުގެ އީސްޓާ ސަންޑޭ ބޮމުގެ ހަމަލާތަކާ ގުޅިގެން އެ ގައުމުގެ ކުރީގެ ރައީސް ގޮތަބަޔާ ރާޖަޕަކްސާގެ މައްޗަށް ކުރެވޭ ތުހުމަތުތައް ހިމެނެއެވެ.

އިގްތިސާދީ ކާރިސާއަކާއި ކޮރަޕްޝަންގެ ތުހުމަތުތަކާ ގުޅިގެން 2022 ވަނަ އަހަރު ކުރި ވަރުގަދަ މުޒާހަރާތަކަށް ފަހު، ރާޖަޕަކްސާ އާއިލާއަށް ވަނީ ވެރިކަން ގެއްލިފައެވެ. ކޮރަޕްޝަނާ ދެކޮޅަށް މަސައްކަތް ކުރެއްވުމުގެ ވައުދާއެކު 2024 ގައި އިންތިހާބުވެވަޑައިގެންނެވި ރައީސް އަނޫރާ ކުމާރަ ދިސާނާޔަކަ ވަނީ، ނުފޫޒުގަދަ ފަރާތްތައް ޖަވާބުދާރީ ކުރުވާނެ ކަމަށް ވިދާޅުވެފައެވެ.

ރާޖަޕަކްސާ އާއިލާއިން ތުހުމަތުކުރާ ގޮތުގައި މިހާރުގެ ސަރުކާރުން މިކަން ކުރަނީ ސިޔާސީ ގޮތުން ބަދަލުހިފުމުގެ ގޮތުންނެވެ. ނަމަވެސް، އޮފިޝަލުން ވިދާޅުވަނީ ގާނޫނު އެންމެންގެ މައްޗަށް ވެސް ހިނގާނީ އެއް ހަމައަކުން ކަމަށެވެ.