ގަތަރުގައި ހުންނަ ހަމާސް ގެ އޮފީސް ބަންދުކޮށް އެ ގައުމުގައި ތިއްބަވާ ހަމާސްގެ އޮފިޝަލުން އެ ގައުމު ދޫކޮށްދިއުމަށް އަމުރުކޮށްފިކަން އިނގިރޭސި ވިލާތުގެ ދަ ޓެލިގްރާފުން މިއަދު ހަވީރު ޚަބަރު ދީފިއެވެ. އެ ނޫހުން ބުނެފައިވާ ގޮތުގައި ދޯހާ ސަރުކާރުން މިގޮތަށް ނިންމާފައިވަނީ ހަމާސްގެ އޮފިޝަލުން ގަތަރުގައި ތިބުމާދޭތެރޭ އެމެރިކާއިން ޝަކުވާކުރުމުން މީގެ ދިހަވަރަކަށްދުވަސް ކުރިންނެވެ.

މިއީ ހަމާސްގެ ލީޑަރުންނަށް މެދުވެރިވި ނިކަމެތި ކަމެއް ކަމުގައި ބައިނަލް އަގްވާމީ މީޑިއާތަކުން ބުނެފައި ވެއެވެ. ( މިއީ ހަމާސްގެ މައްސަލައަށް ރަނގަޅު ހައްލެއް ހޯދުމަށް އެންމެ ބޮޑަށް ބޭނުންވާކަމަށް ދެއްކި އަރަބިގައުމުގެ ހާލަތެވެ. ) ޚަބަރުތަކުގައި ބުނެފައިވާ ގޮތުން ރައީސް ޖޯ ބައިޑްންގެ ރިޔާސަތުގެ އެންމެ ފަހު ދުވަސްކޮޅު ދެން އަންނަން ތިއްބެވި ހަމާސްގެ އިސް ވެރިންނަށް ގަތަރުގައި އަމާންކަން ލިބި ނުދިނުމަށް ގެންދިޔައީ ވަރަށް ބޮޑަށް ފިއްތުން ކުރިމަތި ކުރަމުންނެވެ. އަދި ހަމައެއާއެކު ހަމާސްގެ ލީޑަރުންނަށް ހިޔާވަހިކަން ފޯރުކޮށް ނުދިނުމަށް އިސްރާއީލުންވެސް ގެންދަނީ ގަތަރަށް ފިއްތުން ކުރިމަތި ކުރަމުންނެވެ. ގަތަރަކީ ނޭޓޯގެ މެމްބަރެއް ކަމުގައި ނުހިމެނޭ އެކަމަކު ނޭޓޯގެ ބައިވެރިއެކެވެ. ހަމާސްގެ އޮފީސް ގަތަރުގައި ހުޅުވުނީ 2012 ވަނަ އަހަރުގައެވެ.

ގަތަރުގައި ހުރި ހަމާސްގެ އޮފީސް ބަންދުކުރުމަށާއި އަދި ހަމާސްގެ އިސް ބޭފުޅުން އެ ގައުމުން ބޭރުކުރަން އެމެރިކާއިން މީގެ 2 ހަފުތާކުރިން ގަތަރު ސަރުކާރަށް އަންގާފައިވާނެ ކަމަށް އެމެރިކާއިންވެސް ވަނީ ބުނެފައެވެ. އެމެރިކާ ސަރުކާރުގެ އިސް އޮފިޝަލަކު ރޮއިޓާރސް އަށް މައުލޫމާތު ދީފައިވަނީ އެމެރިކާގެ ސުލްހައިގެ ހުށައެޅުން ގަބޫލުނުކުރާނަމަ ގަތަރުގައި އެ ޖަމާއަތަށް އެއްވެސް ހިޔާވަހިކަމެއް ނެތްކަން އެންގުމަށް އަމުރުކޮށްފައިވާ ކަމަށެވެ. އެމެރިކާއިން ބުނެފައި ވަނީ ރައީސް ޖޯ ބައިޑްން ހުށައެޅި ގަރާރަށް ބޯ ނުލަނބާ ޖަމާއަތަކުން އެމެރިކާގެ ބައިވެރިއެއް ކަމަށް ބެލެވޭ ގައުމެއްގައި ތިބުން ގަބޫލު ނުކުރެވޭނެ ކަމަށެވެ. މިކަން އޮންނާނީ ގަތަރަށް އޮޅުންފިލުވާދީފައެވެ.
އިސްރާއީލުގެ މީޑިއާއިން ބުނެފައި ވަނީ ހަމާސްގެ ރަހީނެއްގެ ގޮތުގައި ހިފާއްޓާފައިހުރި އެމެރިކާގެ ހާރޝް ގޯލްޑްބާރގް ޕޯލިން އާއި އެމެރިކާގެ އިތުރު އެހެން ފަސްމީހަކު މިދިޔަ އޯގަސްޓްމަހުގެ ތެރޭގައި ހަމާސްއިން މަރާލުމަކީ އެމެރިކާގެ ވިސްނުން ބަދަލު ވެގެން ދިޔަ ސަބަބުކަމަށް ބެލެވެއެވެ.
ހަމާސްގެ އޮފިޝަލުން ގަތަރުން ބޭރުވާން އެންގި ޚަބަރު ފެންމަތި ވެގެން މިއުޅެނީ އެފް ބީ އައި އާއި އަދި މިހާރުގެ ޚާރިޖީ ވަޒީރުއެންތަނީ ބްލިންކަންވެސް އެ ބޭފުޅުން ގަތަރުން ބޭރުކުރުމަށްފަހު އެބޭފުޅުންގެ މިލްކިއްޔާތުވެސް ހިފޭއްޓުމަށް ބާރުއަޅަމުން ގެންދާތީއެވެ.
ގަތަރުގައި ދިރިއުޅުއްވާ ހަމާސްގެ 3 ލީޑަރަކަށް ރޮއިޓާރސް ސުވާލުކުރުމުން މިހާތަނަށް ގަތަރު ސަރުކާރުން އެފަދަ އެންގުމެއް އަންގަވާފައި ނުވާކަމަށް ވިދާޅުވިއެވެ. ކޮންމެއަކަސް ގަތަރުން ނިކުންނަން އަމުރުކޮށްފިނަމަ ދެން އެބޭފުޅުންގެ މަންޒިލަކަށް ވާނީ ކޮން ގައުމެއްކަން މީޑިއާއަށް އެނގިފައެއް ނުވެއެވެ. ބެލެވޭގޮތުގައި އެ ބޭފުޅުން ދެން ވަޑައިގަންނަވާނީ ތުރުކީ އީރާން އޮމާން ލެބަނަން ނުވަތަ އަލްޖޭރިއާ ކަމަށްވެދާނެ އެވެ. 2017 އިން ފެށިގެން ހަމާސްގެ ކުރީގެ ލީޑަރ ޚާލިދު މާޝާލް އާއި ހަމާސް އުފެއްދުމުގެ ބާނީންގެ ތެރޭގައި ހިމެނި ވަޑައިގަންނަވާ މޫސާ އަބޫ މަރްޒޫގާއި ގައްޒާ ސަރަހައްދަށް ކަނޑައޅުއްވާފައިވާ ހަމާސްގެ ޑެޕިއުޓީ ލީޑަރ ޚަލީލް އަލް ހައްޔާ ވެސް ދިރިއުޅުއްވަމުންގެންދަވަނީ ގަތަރުގައެވެ.
ހަމާސްގެ ބޭފުޅުން ގަތަރުން ފައިބަން އަންގަވައިފިކަމަށް މީޑިއާތަކުގައި ފެތުރެމުންދާ ޚަބަރު ގަތަރުގެ ޚާރިޖިއްޔާއިން މިހާތަނަށް ކަށަވަރުކޮށްދީފައެއް ނުވެއެވެ.