އެމެރިކާއިން ފައިޓަރ ޖެޓާއި މަނަވަރު ފަހަރު މެދު އިރުމައްޗަށް ފޮނުވުމާއެކު އެމީހަކަށް ޓިކެޓް ލިބުނު ފްލައިޓަކުން ވީހާއަހަކަށް މެދު އިރުމަތިން ނިކުތުމަށް އެމެރިކާގެ ޚާރިޖިއްޔާއިން ދެންމެ އަވަސް އިރުޝާދު ޢާންމުކޮށްފިއެވެ.            

ޚާރިޖިއްޔާގެ އިރުޝާދުގައި ބުނެފައިވަނީ ހިޒްބު ﷲ އާއި އެކްސިސް އޮފް ރެޒިސްޓޭންސް އިން އިސްރާއީލާ ދެކޮޅަށް ހަނގުރާމައެއް ފަށާފާނެ ކަމުގެ ބިރު އުފެދިފައިވާ މި ދަނޑިވަޅުގައި މެދު އިރުމަތީގައި އަދި ވަކިން ޚާއްސަކޮށް ލެބަނަން ސަރަހައްދުގައި ތިބުމަކީ ވަރަށް ނުރައްކާތެރި ކަމެއް ކަމުގައި އަންގައި އެމީހަކަށް ޓިކެޓް ލިބުނު އެއާލައިނަކުން ފުރައިގެން ދިއުމަށް އިރުޝާދު ދެނީ ކަމަށް އަންގާފައި ވެއެވެ.                 

އެމެރިކާގެ ޚާރިޖިއްޔާއެކޭ އެއްފަދައިން އިނގިރޭސި ވިލާތުގެ ޚާރިޖިއްޔާއިންވެސް ހަމަ އެގޮތަށް އިނގިރޭސި ރައްޔިތުންނަށް އިލްތިމާސް ކޮށްފައިވެއެވެ.                                            

އެންމެފަހުގެ ޚަބަރުތަކުން އެނގިފައިވާ ގޮތުގައި އިސްމާއީލް ހަނިއްޔާ ޝަހީދުކޮށްލުމާގުޅިގެން އީރާނުން ކުރިއަށް ގެންދާ ތަހްގީގުގައި ސިއްރު މައުލޫމާތު ހާމަކުރިކަމުގެ ތުހުމަތުގައި އިންޓެލިޖެންސް އޮފިސަރުންވެސް ހިމެނޭ ގޮތުގައި މިހާތަނަށް 24 މީހުން ވަނީ ހައްޔަރުކޮށްފަ އެވެ.  ނިއު ޔޯރކް ޓައިމްސް އަށް މައުލޫމާތު ދިން ފަރާތުން ބުނެފައިވަނީ ތަހްގީގާއި ތުހުމަތު ކުރެވޭ މީހުން ހައްޔަރުކުރުން ހިނގަމުން ދަނީ އިސްމާއީލް ހަނިއްޔާ ޝަހީދުކޮށްލި މިލިޓްރީންގެ ޚާއްސަ ގެސްޓް ހައުސް ހުންނަ އިމާރާތުގެ ސަރަހައްދުގައެވެ.                       

މިހާތަނަށް ހައްޔަރުކުރި މީހުންގެ ތެރޭގައި އެ ތަނުގައި މަސައްކަތްކުރާމީހުންނާއި އަދި ބައެއް މިލިޓްރީ އޮފިސަރުންވެސް ހިމެނެއެވެ. އެހެންނަމަވެސް ބައެއް މީޑިއާތަކުން ބުނެފައިވަނީ ހައްޔަރު ކުރެވެމުންދާ މީހުންނަކީ މި ދިމާވި ކަންތައްޔަކުގައި މޫނުމަތި ރީތި ކުރަންވެގެން ކުރާ ކަމެއް ކަމަށެވެ. އީރާނުގެ ބިމުގައި އެ ގައުމުގެ ވަރަށް ޚާއްސަ މެހެމާނެއްގެ ގޮތުގައި ހުންނަވަނިކޮށް އިސްމާއީލް ހަނިއްޔާ ޝަހީދު ކޮށްލެވުމަކީ އީރާނުގއ ސެކިއުރިޓީ ނިޒާމް ފެއިލް ވެފައިވާކަން އަންގާދޭ ހެއްކެއް ކަމުގައި ބައެއް ފަރާތްތަކުން އިނގިލި ދިއްކުރެއެވެ. ( މީގައި ފާހަގަކުރެވޭ އަނެއް ފަރާތަކީ ގައުމެއްގެ ޚާއްސަ މެހެމާނެއްގެ ގޮތުގައި ހުންނެވި ބޭފުޅަކަށް ފާރަލައި ޝަހީދުކޮށްލި ހުތުރު ޖަރީމާ ހިންގި މިހުންގެ ލަދު ހަޔާތް ނެތްކަމުގެ ވާހަކަ ދައްކާނެ މީޑިއާއެއް ނެތުމެވެ. )

އީރާނުގެ ސިޔާސީ ބޭފުޅަކު ވިދާޅުވެފައިވަނީ “ އިސްރާއީލުން ހުރިހާ ރަތް ރޮނގެއް ހުރަސްކޮށްފި ކަމަށާއި އީރާނުން ގަސްދުކުރާގޮތަކަށް އިސްރާއީލަށް ހަމަލާދިނުން ނުހުއްޓުވޭނެ ކަމަށެވެ. އަހަރެމެންގެ ހަމަލާތައް އިސްރާއީލާގުޅުން ހުރި އަރަބި ގައުމުތަކުގެ ސަރަހައްދުން ހުއްޓުވަން މަސައްކަތް ކުރާނެކަން އަހަރެމެން ދެނެތިބީމުއެވެ.                                                            

ބައެއް ސިޔާސީ ބޭފުޅުން ދެކޭ ގޮތުގައި އީރާނުން މިފަހަރު ބަދަލު ހިފުމުގައި އިސްރާއީލު އެމްބަސީއަކަށް ހަމަލާ ދިނުންފަދަ އެހެން ރާސްތާއެއް ވެސް އިޚްތިޔާރު ކުރުން ދުރެއް ނޫނެވެ.                         

ވޯލް ސްޓްރީޓް ޖާރނަލުން ރިޕޯރޓް ކޮށްފައިވާގޮތުގައި އީރާނުން މިފަހަރު އިސްރާއީލަށް ސީދާ ހަމަލާއެއް ދިނަސް އެއީ އޭޕްރިލް މަހުގެތެރޭގައި ދިން ކަހަލަ ހަމަލާއަކަށް ނުވާނެއެވެ. ސަބަބަކީ މިފަހަރު ހިޒްބު ﷲ އިންވެސް އީރާނާއެކު ބައިވެރިވުން ވަރަށް ކައިރި ކަމަށް ބެލެވޭތީއެވެ.                                 

އިންޓަރނޭޝަނަލް ކްރައިސިސް ގުރޫޕްގެ ޑިރެކްޓަރ އަލީ ވާއިޒް ނިއު ޔޯރކް ޓައިމްސް އަށް ކިޔާދީފައިވާގޮތުގައި އީރާނުން އިސްރާއީލާ ދެކޮޅަށް ހަނގުރާމައެއް ފަށައިފިނަމަ ގަލްފު ސަރަހައްދު އެތައް އަހަރެއްގެ ފަހަތަށް ހަލާކުވެގެން ދިއުމުގެ ފުރުސަތު ވަރަށް ބޮޑެވެ. މިއީ އީރާނުންވެސް ވިސްނާ ފިކުރު ކުރާނެ ކަމެކޭ ބުނެވިދާނެއެވެ. އެހެންނަމަވެސް ފުއާދު ޝުކުރު ޝަހީދުކޮށްލުމާ ގުޅިގެންވެސް އީރާނުން އޮތީ ހިޒްބު ﷲ އަށް އިސްރާއީލުގެ އެންމެ އެތެރެއަށް މިލިޓްރީ އަދި ސިވިލް ސަރަހައްދެއްވެސް ބެލުމަކާ ނުލައި ހަމަލާދިނުމުގެ ހުއްދަ ދީފައެވެ. އީރާނުގެ އޮފިޝަލުން ސީ ބީ އެސް އަށް ކިޔާދީފައިވަނީ އިސްރާއީލުން އެ ހުރިހާ އިމެއް ފަހަނަޅާ ދިއުން އަހަރެމެންނަށް މަޖުބޫރުކޮށްފި ކަމަށެވެ.                                             

އިސްމާއީލް ހަނިއްޔާ ޝަހީދު ކޮށްލުމަށްޓަކައި އީރާނުގެ މިލިޓްރީ ޚާއްސަ ގެސްޓް ހައުސްގެ 4 ވަނަ ފަންގިފިލާއަށް ޝޯރޓް ރޭންޖް މިސައިލަކުން ހަމަލާދީފައިވާ ފޮޓޯތައް އިއްޔެ ހަވީރު ބީ އެސް ޓީ ( ބްރިޓިޝް ސަމަރ ޓައިމް ) 5.59 ގައި އިސްލާމިކް ރިވޮލިއިޝަނަރި ގާރޑުން ވަނީ ހާމަކޮށްފައެވެ. އެހެންނަމަވެސް އެއީ ދަ ޓެލިގްރާފުން ބުނެފައިވާ ފަދައިން މާކުރިއްސުރެން އިސްރާއީލުގެ ޖާސޫސުން އެ އިމާރާތުގައި ބޮމެއް ބާއްވައިގެން ހިންގި ޖަރީމާއެއްކަމަށް ބުނާ ބުނުމާ ތަޢާރަޒްކުރާ ފޮޓޯތަކެކެވެ.                                     

އީރާން ޓީ ވީގެ ޚާރިޖީ ސިޔާސަތު 1403 ގެ ޕްރެޒެންޓަރ  ހުކުރު ދުވަހުގެ ރޭ ބުނެފައިވެއެވެ. ކުރިއަށް ހުރި ވަގުތުތަކުގެ ތެރޭގައި އާދަޔާ ޚިލާފް ހާދިސާތަކަކަށް ދުނިޔެ ހެކިވާނެއެވެ.