ޕީޕީއެމް/ ޕީއެންސީއިން ރިޔާސީ ކެންޑިޑޭޓަކު ނުނެރެ އިންތިޚާބުގެ ފޯމުލުން ނިމުމަކާ ހަމައަށް ގޮސްފައިވަނިކޮށް ޕީއެންސީގެ ފަރާތުން ޑރ. މުޙައްމަދު މުޢިއްޒު އަށް ރިޔާސީ ޓިކެޓް ދިނީ ރައީސް ޔާމީން ޢަބްދުލްޤައްޔޫމް ރުހިވަޑައިގެނެއް ނޫނެވެ. އޭރުވެސް ރައީސް ޔާމީނު ވިދާޅުވަމުން ގެންދެވީ ރިޔާސީ އިންތިޚާބު ބޮއި ކޮޓު ކުރުމަށެވެ.

އެމަނިކުފާނު މިގޮތަށް ވިދާޅުވުމުގެ މައިގަނޑު ސިއްރަކީ ރިޔާސީ އިންތިޚާބުގައި އެމަނިކުފާނަށް ވާދަ ކުރެއްވުމުގެ ފުރުޞަތު ނުލިބުމެވެ. އެހެނަސް ޕީއެންސީއިން ޔާމީނުގެ އަޑު އެއްސެވުމެއްނެތި ޑރ.މުޢިއްޒުގެ ފޯމް އިލެކްޝަންސް ކޮމިޝަނަށް ހުށަހެޅުއްވި ހިސާބުން މުޢިއްޒުގެ ފަހަތްޕުޅަށް އަރާވަޑައިގަތުން ނޫން ގޮތެއް ނެތްކަން ޔާމީނަށް ޔަގީންވެ ވަޑައިގަތެވެ.

ރައީސް ޔާމީނު ޑރ.މުޢިއްޒުގެ ފަހަތްޕުޅަށް އަރާވަޑައިގަތީ މުޢިއްޒު ހޮވިވަޑައިގެންފިނަމަ އެމަނިކުފާނު ގެ ޖަލު ޙުކުމް ނިމުމަކަށް އަންނާނެ ކަމަށް ހީފުޅުކުރެވިގެންނެވެ. އިންތިޚާބުގެ ކެމްޕެއިންގެ ތެރޭގައި ވެސް މުޢިއްޒު ވިދާޅުވަމުން ގެންދެވީ ޝަރުޢީ ދާއިރާއަށް އަތްޕުޅު ނުބާނުއްވާނެ ކަމުގައެވެ.

އެހެންކަމުން ޔާމީނުގެ ޖަލު ޙުކުމް ނިމުމަކަށް ގެނެވޭނެ ގޮތެއް ނުވިއެވެ. އެހެނަސް ކަރެކްޝަން މެދުވެރިކޮށް ޔާމީނު ގެއަށް ބަދަލުކުރެއްވުމަށާއި ލުއިތަކެއް ހޯއްދަވައި ދެއްވުމަށް ޑރ.މުޢިއްޒު ވަނީ މަސައްކަތްޕުޅު ކުރައްވައި އެ ފުރުޞަތު ޔާމީނަށް ހޯއްދަވައި ދެއްވާފައެވެ. ޑރ.މުޢިއްޒަށް އިންތިޚާބު ކާމިޔާބު ކޮށްދިނުމަށް ޔާމީނު އެއްވެސް މަސައްކަތެއް ކުރައްވާފައެއް ނުވެއެވެ.

ޑރ.މުޢިއްޒުގެ ބެކްގްރައުންޑުގައި ޔާމީނުގެ ފޮޓޯފުޅެއް ހުރުމަކީ ޔާމީނު މަސައްކަތްޕުޅު ކުރެއްވުމެއް ނޫނެވެ. ޕީޕީއެމްއާއި ޕީއެންސީއިން ކޯލިޝަނެއް ވެސް އަދި ކޯލިޝަން އެއްބަސްވުމެއް ވެސް ހަދާފައެއްނުވެއެވެ. އެއީ ޔާމީނަކީ ޕީޕީއެމްގެ ރައީސްކަމަށް މީހުން ކިޔާ އުޅުނަސް ޕީޕީއެމްގައި މަސައްކަތް ކުރެއްވުމުގެ އެއްވެސް ގާނޫނީ ހައިސިއްޔަތެއް ޔާމީނަކަށް ނެތީމައެވެ. އެއީ ގައިދީއަކަށް ވާތީއެވެ. ޑރ.މުޢިއްޒުގެ ކެމްޕޭނުގެ ވަކި ހިސާބަކުން ޔާމީނާއި އެމަނިކުފާނުގެ ގާތް ބޭފުޅުން ކުރެެއްވީ އެންޓިކެމްޕޭން ކަމަށް ގިނަ ބަޔަކު ބުނެއެވެ. އަދި ސެނެޓުގައި ވެސް ތިބީ ޑރ.މުޢިއްޒަށް ތާއީދު ކުރާ މަދުބޭފުޅުންކޮޅެއް ކަމަށް ވެސް އަޑުފެތުރިފައިވެއެވެ.

މި ދެންނެވި އެންޓި ކެމްޕެއިން ކުރެއްވި ޔާމީނުގެ ވަރަތް ގާތް ބޭފުޅުން ކެބިނެޓްގައި ތިއްބެވިއިރު އެމަނިކުފާނުގެ ފުރާނައަށް ގެއްލުންދެވިދާނެ ފަދަ މަގާމުތަކުގައި ވެސް ޑރ.މުޢިއްޒަށް އެންޓި ކެމްޕޭން ކުރެއްވި ބޭފުޅުން ތިއްބެވިކަން ފާހަގަކުރަމެވެ. ނިމިދިޔަ އިންތިޚާބަކީ ޑރ.މުޢިއްޒާއި އެމަނިކުފާނުގެ ޓީމުގެ ބުރަ އަދި އަމިއްލަ މަސައްކަތްޕުޅުން ކާމިޔާބު ކުރެއްވި އިންތިޚާބެކެވެ.

ޔާމީނުގެ ފަރާތްޕުޅުން ބަޔަކު ވޯޓު ނުދެއެކޭ އަޅުގަނޑު ނުދަންނަވަމެވެ. އެހެނަސް ޔާމީނުގެ މާބޮޑު ދައުރެއް މި އިންތިޚާބަކު ނެތެވެ. ސަރުކާރުގެ ތެރޭގައި ގިނައީ ޔާމީނުގެ އަރިސް ބޭފުޅުންނެވެ. މީގެ ތެރެއިން ބައެއް ބޭފުޅުން ވަރަށް އަވަހަށް ސަރުކާރު ދޫކުރައްވާ ޔާމީނާ ގުޅިވަޑައި ގަންނަވާނެ ކަމަށް ޚަބަރު ލިބެއެވެ. މިކަމުގެ ސަބަބުން ދެރަވާނީ ކޮން ބޭފުޅަކަށް ކަމެއް ނޭނގެއެވެ. ރައްޔިތުންނަށް މުހިންމީ ގައުމުގެ ހަމަޖެހުމާ ސިޔާދަތެވެ. ގައުމުގެ ކަރާމަތާ އިސްތިގްލާލެވެ. އަބަދު ވެރިކަމާ ތޮޅެން މަސައްކަތް ކުރައްވާ ބޭފުޅުންގެ ފަހަތަށް ރައްޔިތުން އަރަން ވެއްޖެނަމަ ގައުމަށް ލިބިގެންދާނީ އަގުނުކުރެވޭފަދަ ބޮޑު ގެއްލުމެވެ.

މިފަހަކަށް ވެރިކަމަށް ވަޑައިގަންނަވާ ކޮންމެ ބޭފުޅަކާ ދެކޮޅަށް ނުވަތަ ވެރިކަން ކުރާ ޕާޓީއާ ދެކޮޅަށް ކޮންމެވެސް އިދިކޮޅު ޕާޓީއަކުންކުން ބަޣާާާވާތްކޮށް ގައުމުގެ ކަރާމަތާ ޝަރާފަތަށް އަރައިގަންނަތަން ދަނީ ފެންނަމުންނެވެ. ވީމާ ރައްޔިތުންނަށް އަޅުގަނޑު މި ގޮވާލަނީ ގައުމަށް ޣައްދާރު ނުވާށެވެ. އަދި އެފަދަ ބޭފުޅުންގެ ފަހަތަށް ނޭރުމަށެވެ.