އެމެރިކާގެ ކުރީގެ ޚާރިޖީ ވަޒީރު ހެންރީ ކިސިންޖާ ޢުމުރުން 100 އަހަރުގައި އިއްޔެ އަވަހާރަވެއްޖެއެވެ.
ހެންރީގެ މަޞްލަޙަތު އޮންނަ ކިސިންޖާ އެސޯސިއޭޓްސް، އިން ނެރުނު ބަޔާނެއްގައި ބުނީ ދުނިޔޭގެ އަމަންއަމާންކަމާގުޅޭ ދާއިރާއިން ނޯބަލް ޕްރައިޒްގެ އިނާމު ހާސިލު ކުރައްވާފައިވާ ހެންރީ 2023 ނޮވެމްބަރު 29 ވަނަ ދުވަހު އަވަހާރަވެފައިވާ ކަމަށެވެ. އޭނާ އަވަހާރަވީ ކަނެކްޓިކް ސްޓޭޓްގައި ހުންނަ އޭނާގެ އަމިއްލަ ގެކޮޅުގައެވެ.
ހެންރީ ކިސިންޖާއަކީ ރައީސް ރިޗާޑް ނިކްސަން އާއި ޖެރަލްޑް ފޯޑްގެ ވެރިކަމުގައި އެމެރިކާގެ ސެކްރެޓަރީ އޮފް ސްޓޭޓްގެ މަޤާމު އަދާކުރެއްވި އަދި ފިނި ހަނގުރާމައިގެ ދުވަސްވަރު ޑިޕްލޮމެޓިކް ގޮތުން މުހިންމު ދައުރެއް އަދާކުރެއްވި ބޭފުޅެކެވެ.
ފަރަންސޭސި ވިލާތުގެ މަޝްހޫރު ނޫސް އެޖެންސީ އެޖެންސް ފްރާންސް ޕްރެސްގައި ބުނެފައިވާ ގޮތުން ހެންރީ އަކީ އެމެރިކާގެ ޑިޕްލޮމެސީގެ ޖަޔަންޓެއްގެ ގޮތުގައި ސިފަކުރެވޭނެ ފަރާތެކެވެ. އަދި ރޮއިޓާސް އިން ރިޕޯޓްކޮށްފައިވާ ގޮތުގައި ސުލްހައިގެ ނޮބެލް އިނާމު ލިބިވަޑައިގެންނެވި ކިސިންޖާގެ ޚިދުމަތްތައް އެމެރިކާގެ ޚާރިޖީ ސިޔާސަތުގެ ޞަފްޙާތަކުން ފޮހެވިގެން ނުދާނެއެވެ.
ކިސިންޖާގެ ޖަނާޒާގެ ކަންކަން ކުރިއަށް ގެންދާނީ ޢާއިލާއިން ކަމަށާއި އޭގެފަހުން ނިއުޔޯކް ސިޓީގައި އޭނާގެ ހަނދާނުގައި ޖަލްސާއެއް ބާއްވާނެ ކަމަށްވެސް ކިސިންޖާ އެސޯސިއޭޓްސް އިން ބުނެފައިވެއެވެ.
