ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާާރު ނެތްކަމަށް އެމްޑީޕީއިން ހުށަހެޅި ގަރާރު މަޖިލީހުގެ ގަވާއިދާ ޚިލާފުކަމަށް ނިންމައި ގަރާރު އަލުން ހުށަހެޅުމަށް އަންގައިފިއެވެ.

ސްޕްރީމް ކޯޓުން މިދިޔަ ބުރާސްފަތި ދުވަހު ކުރި ހުކުމާއެކު މަޖިލީހުގެ މިއަދު ޖަލްސާގެ އެޖެންޑާގައި އޮތީ ނަޝީދު ވަކިކުރަން ހުށަހެޅި ގަރާރު މަޖިލީހަށް ހުށަހެޅުމެވެ.

މިއަދު ވެސް މަޖިލީހުގެ ނައިބު ރައީސް ސަލާމުގައި ހުންނެވުމުން ރިޔާސަތު ބެލެހެއްޓެވީ ވިލިފުށި ދާއިރާގެ މެމްބަރު ޙަސަން ޢަފީފެވެ.

ނަޝީދު ވަކިކުރަން އެމްޑީޕީއިން ހުށަހެޅި ގަރާރުގައި ސަބަބު ބަޔާންކޮށް ދީބާޖާ ހިމަނާފައިނުވާތީ އެ މައްސަލާގައި ގަރާރެއްގެ ސިފައެއް ނެތް ކަމަށާއި އެހެންވެ އެއީ ބާތިލުވާނެ އެއްޗެއް ކަމަށް ވިދާޅުވެ ޑިމޮކްރެޓްސްގެ މެންބަރުން ނެންގެވި ނިޒާމީ ނުކުތާ ބަލައިގަނެ ޢަފީފް ވަނީ ގަރާރު ހުށަހެޅިފައި އޮތީ ގަވާއިދާ އެއްގޮތަށް ނޫން ކަމަށާއި ގަރާރު އަލުން ހުށަހެޅުމަށް އަންގަވައިފައެވެ.

ގަރާރު އަލުން ހުށަހެޅުމަށް 11:30 އަށް ޖަލްސާއެއް ތާވަލުކުރިއެވެ. މި ޖަލްސާގެ ރިޔާސަތު ބެލެހެއްޓެވީ އީވާއެވެ. އޭނާ ވިދާޅުވީ މި ގަރާރަކީ ހެނދުނު 09:00 ގައި ބޭއްވި ޖަލްސާގެ ރިޔާސަތުން ގޮތެއް ނިންމާފައި އޮތް ގަރާރެއް ކަމަށް ވާތީ މިއީ ދެން އިތުރަށް ކުރިއަށް ގެންދެވޭނެ މައްސަލައެއް ކަމަށް ގަބޫލު ނުކުރައްވާ ކަމަށެވެ.

“އަޅުގަނޑެއް ގަބޫލެއް ނުކުރަން މިއީ މިއަދު ދެން އިތުރަށް ކުރިއަށްގެންދެވޭނެ މައްސަލައެއް ކަމަށް. މި ގަރާރަކީ މަޖިލީހުގެ ރިޔާސަތުން ނިޒާމީ މައްސަލައެއްގައި ގޮތެއް ނިންމައި ބޭރުކޮށްފައިވާ ގަރާރެއް.“ ޖަލްސާ ނިންމަވައިލައްވަމުން އީވާ ވިދާޅުވިއެވެ.