އިރާގު މީހަކު އުމުރުން 103 އަހަރުގައި އުމުރުން 37 އަހަރުގެ އަންހެނަކާ ކައިވެނިކޮށްފިއެވެ. އެއީ އެ ފިރިހެން މީހާގެ 3 ވަނަ ކައިވެންޏެވެ.

އިރާގުގެ ސަހަރު އަލްދީވާނިއްޔާގެ ދެކުނު ސަރަހައްދެއްގައި ބޭއްވި ކައިވެނީގެ ރަސްމިއްޔާތު ޒީނަތްތެރިކޮށް ލަވަޖެހުން ފަދަ ކަންތައް ކޮށް ކައިވެނީގެ އެންމެހާ ކަންތައް އިންތިޒާމުކުރުމުގައި އިސްކޮށް އުޅުނީ ފިރިހެން މީހާގެ ދަރިންނާއި ކާފަދަރިންނެވެ.

ކައިވެނީގެ ކުރިން ބޭއްވި ރަސްމިއްޔާތެއްގައި ކައިވެނި ކުރި ދެމީހުން ވަނީ އެކަކު އަނެކެއްގެ އަތުގައި އަނގޮނޓި އަޅުވާފައެވެ.

އުމުރުން 103 އަހަރުގެ ފަރުބޫދުލް މަންސޫރީގެ ދަރިފުޅު ޢަބްދުއްސަލާމް ބުނި ގޮތުގައި މިއީ 1919ގައި އުފަންވި އޭނާގެ ބައްޕަގެ 3 ވަނަ ކައިވެންޏެވެ. ފުރަތަމަ އަނބިމީހާ މަރުވީ 1999 ގައެވެ. ދަރިން ލިބުނީ ދެވަނަ ކައިވެންޏަށެވެ.

ޢަބްދުއްސަލާމް ބުނިގޮތުގައި އޭނާގެ ބައްޕައާއި މަންމައާ ދެމެދު ޖެހުނު މައްސަލައެއްގައި މަންމަ އޭނާގެ މައިންބަފައިންގެ ގެއަށް މިދިޔަ އަހަރު ފަހުކޮޅު ދިޔައީއެވެ. އެނބުރި އަންނާށޭ ބުނުމުން ވެސް އޭނާ އަންނާކަށް ނޫޅުނެވެ. އެހެންވެ ބައްޕަ ބޭނުންވީ އެހެން ކައިވެންޏެއް ކުރުމަށެވެ. ޢަބްދުއްސަލާމް ބުނި ގޮތުގައި ބައްޕަ އެދުނު އެދުން ފުރިހަމަ ކޮށްދިނުމުގެ ގޮތުން ދަރިންނާއި ކާފަދަރިން މަސައްކަތްކޮށް ދިނީއެވެ.

ފަރުބޫދުލް މަންސޫރީ ބުނިގޮތުގައި އޭނާގެ އަންހެނުން އުފަންވީ 1985 ގައެވެ.

އުމުރުން 103 އަހަރުގެ ފިރިހެނަކު 37 އަހަރުގެ ޒުވާނަކާ އިނުމުން އެތައް މިލިއަން ބައެއްގެ ހިތުގައި އުފެދިފައިވާ ސުއާލަކީ އެ ކައިވެނި ކާމިޔާބު ވާނޭހެއްޔެވެ؟

ވާނުވާ ބަލަން ތިބެމާ ހިނގާށެވެ.

ފިރިހެން މީހާ ބުނި ގޮތުގައި އޭނާއަކީ އަދިވެސް ޒުވާނެކެވެ.