މަތީ ތައިލީމާއި ތަމްރީންތައް ހޯދައިދިނުމުގެ ފުރުސަތުތައް ހޯދައި ދިނުމަށް ސަރުކާރުން ކުރިއަށް ގެންދާ ސްޓޫޑެންޓް ލޯން ސްކީމްގެ ދަށުން 720 ފުރުސަތު ހުޅުވާލައިފި އެވެ.
ހަޔާ އެޑިއުކޭޝަން މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އިބްރާހިމް ހަސަން ވިދާޅުވީ މިފަހަރުގެ ލޯނު ސްކީމްގެ ދަށުން އަލަށް ކިޔަވަން ފަށާ ދަރިވަރުންނަށް ހާއްސަކޮށްގެން ހުޅުވާލާފައި ވަނީ 417 ފުރުސަތު ކަމަށާ އަދި މި ވަގުތު ކިޔަވަމުންދާ ދަރިވަރުންނަށް 303 ފުރުސަތު ހުޅުވާލާފައިވާ ކަމަށެވެ.
މި އަހަރުގެ ސްޓޫޑެންޓް ލޯނުނަށް ހުޅުވާލާފައިވާއިރު އެޑްމިނިސްޓްރޭޝަން ފީ ތިން ޕަސެންޓުން އެއް ޕަސެންޓައް ކުޑަކޮށްފައިވާ ކަމަށް މިނިސްޓަރު ވިދާޅުވި އެވެ.
”މިސަރުކާރު ވެރިކަމާއި ހަވާލުވެވަޑައިގެންނެވި ފަހުން ފުރަތަމަ އަހަރުވެސް އެޑްމިނިސްޓްރޭޝަން ފީ ވަނީ %5 އިން %3 އަށް ކުޑަކޮށްފަ. އަޅުގަނޑުމެންގެ ސްޓްރެޓެޖިކް އެކްޝަން ޕްލޭންގައި މި އެޑްމިނިސްޓްރޭޗަން ފީގެ ގޮތުގައި %1 އަށް ކުޑަކުރުމަށްވާނީ ކަނޑައަޅަ އިއުލާންވެސްކޮށްފަ. މިއަދު އަޅުުގަނޑުމެން މި ސްކީމް މި ހުޅުވާލަނީ ސްޓޫޑަންޓް އެޑްމިނިސްޓްރޭޝަން ފީ %1 އަށް ކޫޑަކުރުމަށްފަހު. އެއީ މިއަހަރުގެ ސްކީމަށް ހާއްސަވާ އެއް ސަބަބު.“ މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ މިދިޔަ އަހަރު ހުޅުވާލި ލޯން ސްކީމްގައި ރާއްޖޭގައި މާސްޓާސް ޑިގްރީއަށް ކިޔެވުމުގެ ފުރުޞަތު ހުޅުވާލާފައި ނުވިނަމަވެސް މިއަހަރުގެ ލޯން ސްކީމްގައި ރާއްޖޭގައި މާސްޓާސް ޑިގްރީއަށް ކިޔެވުމުގެ ފުރުޞަތު ހުޅުވާލާފައިވާކަމަށެވެ.
”އަޅުގަނޑު އުންމީދުކުރަނީ މި ފުރުސަތުގެ ސަބަބުން ވަރަށް ގިނަ ދިވެހި ދަރިވަރުންނަށް ރާއްޖޭގައި ތިބެގެން މާސްޓާ ކިޔެވުމުގެ ފުރުސަތު ފަހިވެ، އޭނގެ ބޭނުން ހިފާނެ ކަމަށް. އަދި މީގެ ހެޔޮ ފައިދާ ރާއްޖޭގެ ކޮލެޖްތަކަށް ލިބިގެންދާނެ ކަމަށް.“ މިނިސްޓަރު ހަސަން ވިދާޅުވި އެވެ.
މީގެ އިތުރުން މި އަހަރުގެ ލޯނު ސްކީމަށް ފުރަތަމަ ޑިގްރީއަށް ކިޔަވާ ހުރިހާ ދަރިވަރުންނަށް ކުރިމަތި ލުމުގެ ފުރުސަތު ހުޅުވާލާފައިވާ ކަމަށް ވެސް މިނިސްޓަރު ވިދާޅުވި އެވެ. އަދި މި އަހަރު ރާއްޖޭގައި އެމްބީބީއެސް ހަދާ ދަރިވަރުންގެ އެހެނިހެން ހަރަދުތައް ހަމަޖެއްސުމަށްޓަކައި 40 ސްލޮޓް ރިޒާވް ކޮށްފައިވާނެކަމަށެވެ.
”މިއަހަރުގެ ސްޓޫޑެންޓް ލޯނުގައި ނުކުޅެދުންތެރިކަން ހުންނަ ފަރާތްތަކަށް ރާއްޖެއިން ބޭރަށް ކިޔަވަން ދިއުމުގެ ފުރުސަތު ކުރީ އަހަރެކޭ އެއްފަދައިން ހަމަޖެހިފައިވާނެ. އެ ފަރާތްތަކުން ލޯނަށް ހުށައަޅާއިރު ނުކުޅެދުންތެރިކަން ހުންނަ ފަރާތްތަކުގެ ދަފްތަރުގައި ރަޖިސްޓަރީވެފައިވާ ފަރާތެއްކަން އެނގޭ ލިޔެކިއުން ހުށަހަޅަން ޖެހޭނެ.“ މިނިސްޓަރ ވިދާޅުވީ މިއަހަރުގެ ލޯން ސްކީމަށް އެޕްލިކޭޝަން ހުށައަޅަން ހުޅުވާލާފައި މުއްދަތު ހަމަވުމުގެ 7 ދުވަސް ކުރިން ހުށައަޅާ ފޯމްތައް ޗެކޮށް މަދުވާ ލިޔެކިޔުންތައް ހުށައެޅުމުގައި މިނިސްޓްރީން އެހީތެރިކަން ފޯރުކޮށްދެމުން ދާނެކަމަށެވެ.
ސްޓޫޑަންޓް ލޯނަށް ކުރިމަތިލުމުގެ މުއްދަތު ހަމަވާނީ މާޗް މަހުގެ ތިން ވަނަ ދުވަހު އެވެ. އެކަމާ ގުޅޭ ލިޔެކިޔުންތައް ހުށަހަޅަން ޖެހޭނީ ޕޯޓަލްއެއް މެދުވެރިކޮށް އޮންލައިން ކޮށެވެ.
