ކެމްބްރިޖް ޔުނިވަރސިޓީގެ ދިރާސާވެރިން ހެދި ދިރާސާއަކުން ދައްކާ ގޮތުގައި، ނިދި ލިބުމުގައި ދިމާވާ ދަތިތަކުގެ ސަބަބުން ސިކުނޑީގައި ހުންނަ ވިހަ މާއްދާތައް ބޭރުކުރުމަށް ސިކުނޑިއަށް އޮންނަ ގާބިލުކަމަށް އަސަރުކޮށް، އުމުރުގެ ފަހުކޮޅުގައި ޑިމެންޝިއާ ނުވަތަ ހަނދާންނެތުމުގެ ބަލި ޖެހުމުގެ ނުރައްކާ އިތުރުވެދާނެއެވެ.

އަލްޒައިމަރސް އެންޑް ޑިމެންޝިއާ: ދަ ޖަރނަލް އޮފް ދަ އަލްޒައިމަރސް އެސޯސިއޭޝަން ގައި ޝާއިއުކޮށްފައިވާ މި ދިރާސާގައި، ޔޫކޭ ބަޔޯބޭންކުގައި ހިމެނޭ 40،000 ބޮޑެތި މީހުންގެ އެމް.އާރް.އައި ސްކޭންތައް ދިރާސާކޮށްފައިވެއެވެ. ދިރާސާވެރިން ބަލާފައިވަނީ ސެރެބްރޯސްޕައިނަލް ފްލުއިޑް ބޭނުންކޮށްގެން ކުންޏާއި ވިހަ މާއްދާތައް ސާފުކުރުމަށް އެހީތެރިވެދޭ ސިކުނޑީގެ ގްލިމްފެޓިކް ސިސްޓަމަށެވެ.

ދިރާސާގެ ހޯދުންތަކުން ދައްކާ ގޮތުގައި، ނިދި މަދުވުމަކީ ސިކުނޑިން ގެއްލުންހުރި މާއްދާތައް ބޭރުކުރުމަށް މި ނިޒާމަށް ލިބިފައިވާ ގާބިލުކަން ދަށްކޮށްލާ ކަމެކެވެ. މީގެ ތެރޭގައި ޑިމެންޝިއާގެ އެންމެ އާންމު ބާވަތް ކަމަށްވާ އަލްޒައިމާސް ބައްޔާ ގުޅިފައިވާ އެމިލޮއިޑް އަދި ޓައު ޕްރޮޓީންތައް ހިމެނެއެވެ.

ދިރާސާގެ މުސައްނިފު ހުއީ ހޮންގް ވިދާޅުވީ، ގްލިމްފެޓިކް ސިސްޓަމަށް ބުރޫއެރުމަކީ ސިކުނޑިއަށް ދިމާވާ ބައެއް ހާލަތްތަކުގެ ސަބަބުން އަލްޒައިމާސް ފަދަ ބަލިތައް ޖެހުމަށް މަގުފަހިވާ ގޮތް ދެނެގަތުމަށް އެހީތެރިވެދޭނެ ކަމެއް ކަމަށެވެ.

މީގެ އިތުރުން، ގްލިމްފެޓިކް ނިޒާމުގެ މަސައްކަތް ދަށްވުމާއި ލޭމައްޗަށްދިއުމާ ދެމެދު ގުޅުމެއް އޮވެދާނެ ކަމަށް ވެސް ދިރާސާވެރިންނަށް ފާހަގަކުރެވުނެވެ. އަދި ޑިމެންޝިއާގެ ނުރައްކާ ކުޑަކުރުމަށްޓަކައި އެޅިދާނެ ފިޔަވަޅުތަކެއްގެ ގޮތުގައި ލޭގެ ޕްރެޝަރު ކޮންޓްރޯލް ކުރުމާއި ދުންފަތުގެ އިސްތިއުމާލުކުރުމުން ދުރުހެލިވުން އެ ފަރާތްތަކުން ފާހަގަކުރެއްވިއެވެ.

ކެމްބްރިޖްގެ ޕްރޮފެސަރ ހިއު މާކަސް ފާހަގަކުރެއްވި ގޮތުގައި، ލޭމައްޗަށްދިއުމާއި ދުންފަތުގެ އިސްތިއުމާލުކުރުން ހިމެނޭހެން، އާންމުކޮށް ފެންނަ ނުރައްކާތަކަކީ ޑިމެންޝިއާ ޖެހުމުގެ ނުރައްކަލުގެ މަދުވެގެން ހަތަރުބައިކުޅަ އެއްބަޔަށް ޒިންމާވާ ކަންކަމެވެ.

ޑިމެންޝިއާގެ ސަބަބުން ހަނދާނަށާއި، ވިސްނުމަށާއި، އަދި ގޮތް ނިންމުމުގެ ގާބިލުކަމަށް އަސަރުކޮށް، ދުވަހުން ދުވަހަށް ކުރާ ކަންކަމަށް ހުރަސްއެޅެއެވެ. ދިރާސާވެރިން ވިދާޅުވީ، ނިދުމާއި އެހެނިހެން ނުރައްކާތަކުގެ ސަބަބުން ސިކުނޑީގައި އުފެދޭ، ހަށިގަނޑަށް ބޭނުން ނުވާ މާއްދާތައް ސާފުކުރާ ނިޒާމަށް އަސަރުކުރާ ގޮތް ދެނެގަތުމަކީ، މި ބަލި ޖެހުމުގެ ފުރުސަތު ކުޑަކުރެވިދާނެ ގޮތްތައް ހޯދުމަށް މަގުފަހިވެގެންދާނެ ކަމެއް ކަމަށެވެ.