ސަޢުދީ ޢަރަބިއްޔާއަށް އަމާޒުކޮށް ޙަމަލާތައް ދެމުންދާތާ ވިދިވިދިގެން ތިންވަނަ ދުވަސް ވެފައިވާއިރު، ޔަމަނުގެ ޙޫތީ ޖަމާޢަތުން ރިޔާޟާއި ދެކުނު ހުޅަނގުގެ ރަށެއް ކަމަށްވާ ޚަމީސް މުޝައިތަށް އަމާޒުކޮށް ފޮނުވާލި ބެލިސްޓިކް ތިން މިސައިލެއް ވައްޓާލާފައިވާ ކަމަށް ސަޢުދީ ޢަރަބިއްޔާއިން ބުނެފިއެވެ.

ކޯލިޝަންގެ ތަރުޖަމާނު ތުރުކީ އަލްމާލިކީ ވިދާޅުވީ، ހޯމަ ދުވަހު އެއް މިސައިލް ރިޔާޟަށް އަދި ދެ މިސައިލް ޚަމީސް މުޝައިތަށް އަމާޒުކޮށް ފޮނުވާލި ކަމަށެވެ. އެކްސް ގައި ޝާއިޢުކުރި ބަޔާނެއްގައި ވާގޮތުން، މި ތިން މިސައިލް ވެސް ވަނީ ވައިގެ ތެރޭގައި ހުއްޓުވައި، ނައްތާލާފައެވެ.

ވައިގެ މަގުން ނުރައްކަލެއް އަތުވެދާނެ ކަމުގެ އިންޒާރު މޯބައިލް ފޯނުތަކަށް ލިބުމަށްފަހު، ހޯމަ ދުވަހުގެ ރޭ ބާރުގަދަ ގޮވުންތަކެއްގެ އަޑު އިވުނު ކަމަށް ރިޔާޟުގެ ރައްޔިތުން ރިޕޯޓުކޮށްފައިވެއެވެ. ޙޫތީން ދަޢުވާކުރާ ގޮތުގައި އެމީހުން ޙަމަލާ އަމާޒުކުރީ ސަޢުދީގެ ވެރިރަށުގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށެވެ.

މި އެންމެ ފަހުގެ ޙަމަލާތައް ދީފައި މިވަނީ ހަފުތާ ބަންދުގައި ދިން ނުރައްކާތެރި ޙަމަލާތަކަކަށް ފަހުގައެވެ. ހޮނިހިރު ދުވަހު އެއާޕޯޓަށް ދިން ޙަމަލާގައި މަދުވެގެން 13 މީހުން މަރުވެ، 300 އަށް ވުރެ ގިނަ މީހުން ޒަޚަމްވިއިރު، އާދީއްތަ ދުވަހު ދިން އެހެން ޙަމަލާއެއްގައި އެކަކު މަރުވެ، އިތުރު 11 މީހުން ވަނީ ޒަޚަމްވެފައެވެ.

ސަޢުދީގެ ކަމާބެހޭ ފަރާތްތަކުން ވަނީ ހޮނިހިރު ދުވަހާ ހަމައަށް އެއާޕޯޓު ބަންދުކޮށްފައެވެ. މިއާއެކު އެއާލައިންތަކުން ވަނީ ފްލައިޓްތައް ކެންސަލްކޮށް ނުވަތަ މެދުކަނޑާލަން މަޖުބޫރުވެފައެވެ. އިއްތިޙާދު އެއާވޭސް އިން ވަނީ އަންނަ ހަފުތާއާ ހަމައަށް ރިޔާޟަށް ކުރާ ދަތުރުތައް ކެންސަލްކޮށް، ދައްމާމާއި ޖިއްދާއަށް ކުރާ ޚިދުމަތްތައް މެދުކަނޑާލާފައެވެ. ގަލްފް އެއާ އިން ވެސް ވަނީ ހޮނިހިރު ދުވަހާ ހަމައަށް ރިޔާޟަށް ކުރާ ދަތުރުތައް ކެންސަލްކޮށްފައެވެ.

ކުރިން އެއާޕޯޓަށް ދިން ޙަމަލާ ހުއްޓުވުމުގައި ޤައުމުގެ ވައިގެ ދިފާޢީ ނިޒާމު ނާކާމިޔާބުވި ސަބަބު ދެނެގަތުމަށް ސަޢުދީގެ ކަމާބެހޭ އިދާރާތަކުން މިހާރު ވަނީ ތަޙުޤީޤެއް ފަށާފައެވެ.

މި އަނިޔާވެރިކަން އިތުރުވަމުން މިދަނީ ޔަމަނުގައި ހަނގުރާމަ އަލުން ވަރުގަދަވެފައިވާ ދަނޑިވަޅެއްގައެވެ. ޔަމަނުގައި ސަޢުދީ އިސްވެ އޮންނަ ކޯލިޝަނުން ތާޢީދުކުރަނީ ބައިނަލްއަޤްވާމީ ގޮތުން ބަލައިގެންފައިވާ ސަރުކާރާ އެއްކޮޅަށް، ޙޫތީންނާއި ދެކޮޅަށް ހަނގުރާމަކުރާ ފައުޖުތަކަށެވެ.

ސަޢުދީގެ އެނާޖީ މިނިސްޓަރު ޕްރިންސް ޢަބްދުލްޢަޒީޒް ބިން ސަލްމާން ވިދާޅުވީ މި ޙަމަލާތަކަކީ ޤައުމުގެ ކެތްތެރިކަމާއި ޘާބިތުކަން ވަޒަންކޮށްލި ކަމެއް ކަމަށެވެ. ނަމަވެސް އިންވެސްޓްމަންޓްތަކާއި އިޤްތިޞާދީ ތަރައްޤީގެ ޕްލޭންތައް މެދުކެނޑުމެއްނެތި ކުރިއަށްދާނެ ކަމަށް އެމަނިކުފާނު ފާހަގަކުރެއްވިއެވެ.