2025 ވަނަ އަހަރު ދިފާއީ ކަންކަމަށް ގާތްގަނޑަކަށް 83 ބިލިއަން ޑޮލަރު ހޭދަކޮށްފައި ވީނަމަވެސް، ހޫތީންގެ ހަމަލާތައް ހުއްޓުވުމުގައި ސައުދީ އަރަބިއްޔާ ތަކުރާރުކޮށް ނާކާމިޔާބުވުމުގެ ސަބަބުން، އެ ގައުމުގެ ޒަމާނީ އަސްކަރީ ދިފާއީ ނިޒާމުގެ ނާޒުކުކަން ވަނީ ހާމަވެފައެވެ.

ސައުދީން ވަނީ އެ ގައުމުގެ ޖުމްލަ އުފެއްދުންތެރިކަން ނުވަތަ ޖީޑީޕީގެ ގާތްގަނޑަކަށް 6.5 އިންސައްތަ ދިފާއީ ކަންކަމަށް ކަނޑައަޅައި، ދުނިޔޭގައި އަސްކަރިއްޔާއަށް އަށްވަނައަށް އެންމެ ބޮޑު ހޭދައެއް ކުރާ ގައުމަށް ވެފައެވެ. އެ ގައުމުގެ ހަތިޔާރުގެ ތެރޭގައި އެފް-15 މަރުކާގެ ހަނގުރާމަމަތީ ޖެޓްތަކާއި، ޔޫރޯފައިޓަރ ޓައިފޫން، ޕެޓްރިއަޓް މިސައިލް ސިސްޓަމްތަކުގެ އިތުރުން ޓާމިނަލް ހައި އެލްޓިޓިއުޑް އޭރިއާ ޑިފެންސް ސިސްޓަމްތައް ހިމެނެއެވެ.

ނަމަވެސް، އީރާނުގެ މަދަދު ލިބޭ ހޫތީ ޖަމާއަތުން ދަނީ މުހިންމު އުމްރާނީ ވަސީލަތްތަކަށް، އޭގެ ތެރޭގައި ރިޔާޒުގެ ކިންގް ޚާލިދު އިންޓަނޭޝަނަލް އެއާޕޯޓާއި ސައުދީގެ ތެޔޮ ސާފުކުރާ މަރުކަޒުތަކަށް އަމާޒުކޮށް މެދުކެނޑުމެއްނެތި ހަމަލާތައް ދެމުންނެވެ. އެންޑީޓީވީން ރިޕޯޓްކޮށްފައިވާ ގޮތުގައި ހޮނިހިރު ދުވަހު އެ އެއާޕޯޓަށް ދިން ހަމަލާއެއްގައި މަދުވެގެން 12 ޝަހީދުވެ، 300 އަށް ވުރެ ގިނަ މީހުން ވަނީ ޒަޚަމްވެފައެވެ.

މާހިރުން ވިދާޅުވާ ގޮތުގައި ސައުދީ އަރަބިއްޔާގެ ބޮޑު ސަރަހައްދުގެ ސަބަބުން، ސްޓްރެޓީޖިކް ހުރިހާ ތަނެއް ރައްކާތެރިކުރުމަކީ އުނދަގޫ ކަމެކެވެ. އެ ގައުމަކީ ގާތްގަނޑަކަށް 2.2 މިލިއަން އަކަކިލޯމީޓަރުގެ ސަރަހައްދެއް އޮންނަ ގައުމަކަށް ވުމުން، އެއާޕޯޓްތަކާއި، ތެލުގެ ވަސީލަތްތަކާއި، އަސްކަރީ މަރުކަޒުތަކުގެ އިތުރުން މުހިންމު އެހެނިހެން އުމްރާނީ ވަސީލަތްތަކަށް ދިފާއީ ރައްކާތެރިކަން ބޭނުންވެއެވެ.

މީގެއިތުރުން ހޫތީން ވަނީ އެމީހުންގެ މިސައިލާއި ޑްރޯންގެ ގާބިލުކަން ވެސް ތަރައްގީކޮށްފައެވެ. އެއްފަހަރާ އެކި ބާވަތުގެ ހަތިޔާރު ބޭނުންކޮށްގެން ހަމަލާދިނުމުން، ވައިގެ ދިފާއީ ނިޒާމުތަކަށް ބާރުބޮޑުވެ، ނުވަތަ އޮޅުންބޮޅުން އަރާ ގޮތްވެއެވެ. އަދި ތަކުރާރުކޮށް ހަމަލާތައް ދިނުމަކީ ސައުދީ އަރަބިއްޔާގެ ހަމަލާތައް ހުއްޓުވާ މިސައިލް ސަޕްލައިއަށް ވެސް ބާރުބޮޑުވެދާނެ ކަމެކެވެ.

އެއާޕޯޓްތަކަށް ދޭ ހަމަލާތަކުގެ ސަބަބުން އިންވެސްޓަރުންގެ އިތުބާރު ގެއްލި، ފަތުރުވެރިކަމަށާއި ބައިނަލްއަގުވާމީ ވިޔަފާރިތަކަށް ބުރޫއަރައި، ސައުދީ އަރަބިއްޔާގެ އިގުތިސާދު ސިންދަފާތު ކުރުމަށް އެކުލަވާލާފައިވާ ”ވިޝަން 2030“ ޕްރޮގްރާމަށް ހުރަސްއެޅިދާނެ ކަމުގެ އިންޒާރު އެނަލިސްޓުން ދެއެވެ.

މި ހަމަލާތަކުގެ ސަބަބުން ސައުދީ އަރަބިއްޔާގެ އަސްކަރީ ބާރު ސީދާ ގޮތެއްގައި ދަށްނުވި ނަމަވެސް، މީގެ ސަބަބުން އިގުތިސާދީ ގޮތުންނާއި ނަފްސާނީ ގޮތުން ބޮޑެތި ގެއްލުންތަކެއް ކުރިމަތިވެދާނެއެވެ.