ރަސްމާލޭގައި ތަރައްގީކުރަން ނިންމާފައިވާ އީގަލް ހިލްސް ރެސިޑެންސީ އެއްބަސްވުން އަވަހަށް ރައްޔިތުންގެ މަޖިލީހަށް ފޮނުވަން ޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޓޫރިޒަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ބޮޑު މަޝްރޫއެއް ހިންގަން ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއާ އެކު ސަރުކާރުން ވަނީ ސޮއިކޮށްފައެވެ. އިދިކޮޅު ސިޔާސީ ބައެއް ލީޑަރުން ދަނީ އެ މަޝްރޫއާ ދެކޮޅު ހައްދަވައި އެކިއެކި ތުހުމަތުތައް ކުރައްވަމުންނެވެ.
ސޯޝަލް މީޑިއާ ޕްލެޓްފޯމް އެކްސްގައި ކުރީގެ ރައީސް އަދި އެމްޑީޕީގެ ޗެއަރޕާސަން ނަޝީދު ކުރެއްވި ޕޯސްޓެއްގައި ވިދާޅުވީ، އުސޫލީ ގޮތުން ބަލާއިރު ރެސިޑެންސީ ޕްރޮގްރާމަކަށް ރާއްޖެ ހުޅުވާލުމަކީ ރަނގަޅު ކަމެއް ކަމަށެވެ.
ނަމަވެސް، އެ މަޝްރޫޢުގެ ކޮންޓްރެކްޓަރު އީގަލް ހިލްސްގެ ކޮންޓްރެކްޓް އަދިވެސް ފެންނަން ނެތް ކަމަށާއި އެ އެއްބަސްވުންވެސް ހާމަކޮށްފައި ނުވާކަމަށް އެމަނިކުފާނު ވިދާޅުވިއެވެ.
ނަޝީދު ވިދާޅުވީ މި މަޝްރޫޢާ ގުޅޭގޮތުން މިހާތަނަށް އިވުނު ވާހަކަތަކުން އެ މަނިކުފާނަށް ފާހަގަކުރެވޭ 2 މައްސަލައެއް އޮތް ކަމަށެވެ.
އެގޮތުން އެއީ އެއްބަސްވުމުގެ ދަށުން އެޑްވާންސް ފައިސާ ނުލިބުމާއި، މާލޭ ސަރަޙައްދުގައި އެ މަޝްރޫޢު ކުރިއަށްގެންދިއުމަށް ނިންމާފައިވާ ކަމަށް ދެކެވޭ ވާހަކަ ކަމަށް ނަޝީދު
ފާހަގަކުރެއްވިއެވެ.
އެހެންކަމުން، ސަރުކާރަށް އެންމެ ރަނގަޅު ގޮތަކަށް ވާނީ މި އެއްބަސްވުން ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވުން ކަމަށް ނަޝީދު ވިދާޅުވިއެވެ.
މިގޮތުން މި ސަރުކާރުގެ އަޣުލަބިއްޔަތު އޮތް މަޖިލީހުގެ ތެރެއިން، މި މަޝްރޫޢަށް ބޭނުންވާ ޤާނޫނީ އޮނިގަނޑު ފާސްކުރުމަކީ އެންމެ އެދެވިގެންވާ ގޮތް ކަމުގައިވެސް ނަޝީދު ވިދާޅުވިއެވެ.