އިންޑޯ-ޕެސިފިކް ކޮމާންޑް (އިންޑޯޕެކޮމް) ގެ ނަން އަލުން ޕެސިފިކް ކޮމާންޑް (ޕެކޮމް) އަށް ބަދަލުކުރުމަކީ އިންޑިއާއަށް އެމެރިކާއިން ދޭ ސަމާލުކަން ކުޑަވެގެން ދިޔުމުގެ ނިޝާނެއް ކަމަށް ދެކެވޭ ވާހަކަތައް ޕެންޓަގަނުން ދޮގުކޮށްފިއެވެ. އަދި ވޮޝިންޓަންގެ ސްޓްރެޓީޖިކް ޕްލޭންތަކުގައި ނިއުދިއްލީއަކީ އަދިވެސް ވަރަށް ”މުހިންމު ބާރެއް“ ކަމަށް އެމެރިކާއިން ވަނީ ބުނެފައެވެ. އެމެރިކާގެ އަންޑަ ސެކްރެޓަރީ އޮފް ވޯ ފޮރ ޕޮލިސީ އެލްބްރިޖް އޭ. ކޯލްބީ މިކަން ސާފުކޮށްދެއްވީ، ފިލިޕީންސް، އިންޑޮނޭޝިއާ، ތައިލެންޑް އަދި ކެމްބޯޑިއާއަށް ކުރެއްވި ދަތުރުފުޅުގެ ތެރެއިން ސްޓޭޓް ޑިޕާޓްމަންޓުން އިންތިޒާމުކުރި ވަރޗުއަލް ބްރީފިންގއެއްގައެވެ.
ކޯލްބީ ވިދާޅުވި ގޮތުގައި ނަމަށް މި ގެނައި ބަދަލަކީ ހުޅަނގު ޕެސިފިކާއި ”ފަސްޓް އައިލެންޑް ޗޭން“ (ޖަޕާނުން ފެށިގެން ޓައިވާނާއި ފިލިޕީންސް ހުރަސްކޮށް އިރުދެކުނު އޭޝިއާއާ ހަމައަށް ދެމިގެންވާ ދިފާއީ ސަރަހައްދު) އަށް ހާއްސަ ސަމާލުކަމެއް ދިނުމަށް އެކުލަވާލާފައިވާ އަސްކަރީ ސްޓްރެޓެޖީއެއް ދައްކުވައިދޭ ބަދަލެކެވެ. މިއީ އިންޑިއާ ކަނޑުގެ ސަރަހައްދުގެ މުހިންމުކަން ކުޑަކުރުމެއް ނޫން ކަމަށް އޭނާ ވިދާޅުވިއެވެ. އަދި މި ގުޅުން ހީނަރުނުވާ ކަމުގެ ހެއްކެއްގެ ގޮތުން، މިދިޔަ މާރިޗު މަހު އޭނާ އިންޑިއާއަށް ކުރެއްވި ދަތުރުފުޅާއި އެމެރިކާގެ އެހެން އިސް އޮފިޝަލުން ކުރެއްވި ދަތުރުފުޅުތަކަށް އޭނާ އަލިއަޅުއްވާލެއްވިއެވެ.
އެމެރިކާއާއި އިންޑިއާއާ ދެމެދު ހުރިހާ ކަމެއްގައި އެއްބަސްނުވެވިދާނެ ކަމަށް އޭނާ ގަބޫލުކުރެއްވި ނަމަވެސް، މި ގުޅުމަކީ ވޮޝިންޓަނުން އިތުރަށް ބަދަހިކުރަން ބޭނުންވާ ގުދުރަތީ ބައިވެރިވުމެއްގެ ގޮތުގައި ސިފަކުރެއްވިއެވެ. މީގެއިތުރުން ކޯލްބީ ފާހަގަކުރެއްވި ގޮތުގައި ސަރަހައްދުތަކަށް ބޭނުންކުރާ ނަންތަކުގެ މާނަ ތަފާތެވެ. އިންޑޯ-ޕެސިފިކް، ޕެސިފިކް އަދި އޭޝިއާ-ޕެސިފިކް ފަދަ ނަންތަކަކީ ޖިއޮގްރަފީ ގޮތުން އެއް މާނައެއްގައި ބޭނުންކުރެވޭ ނަންތަކަކަށް ނުވާތީ، މިއީވެސް ނަން ބަދަލުކުރުމުގެ އެއް ސަބަބެވެ.
މުޅި ސަރަހައްދީ ސްޓްރެޓެޖީއާ ބެހޭގޮތުން ވާހަކަދައްކަވަމުން ކޯލްބީ ވިދާޅުވީ، އެމެރިކާގެ ބައިވެރި ގައުމުތަކުގެ ފަރާތުން ބޭނުންވަނީ ސީދާ އެ ގައުމުތަކުގެ ވަފާތެރިކަން ނޫން ކަމަށާއި، ބޭނުންވަނީ އަމަލީ އެއްބާރުލުން ކަމަށެވެ. މީގެ ތެރޭގައި އަސްކަރީ އެހީތެރިކަން ފޯރުކޮށްދިނުން، ތަމްރީނުތައް، ޖާސޫސީ މައުލޫމާތު ހިއްސާކުރުން، ވައިގެ އަދި ކަނޑުގެ ސަރަހައްދު ބެލެހެއްޓުން، ހަތިޔާރު ވިއްކުން އަދި ކަނޑުގެ ސަލާމަތީ ގާބިލުކަން އިތުރުކުރުން ހިމެނެއެވެ. މީގެއިތުރުން ވޮޝިންޓަނުން ބޭނުންވަނީ ސަރަހައްދީ ބައިވެރިން އަމިއްލަ ދިފާއީ ސިނާއަތްތައް ކުރިއެރުވުމަށް ކަމަށާއި، މިކަމުގެ ކާމިޔާބީ މިނާނީ ސިޔާސީ ނުވަތަ ސިނާއީ ލަނޑުދަނޑިތަކަށްވުރެ ބޮޑަށް ހަނގުރާމަ ހުއްޓުވުމަށް ދެވޭ އެއްބާރުލުމަށް ބަލައިގެން ކަމަށް އޭނާ ވިދާޅުވިއެވެ.
މި ވާހަކަތައް އައިސްފައިވަނީ އިންޑިއާގެ ތަހުލީލުކާރުންގެ ފާޑުކިޔުންތަކާ ގުޅިގެންނެވެ. އެ ފަރާތްތަކުން ވަނީ މި ބަދަލަކީ ’ކުއަޑް‘ އިއްތިހާދަށް ދިން ދެރައެއް ކަމަށް ބުނެ، އިންޑޯ-ޕެސިފިކް ނަން ބޭނުންކުރަން ފެށިތާ އަށް އަހަރު ފަހުން ވޮޝިންޓަނުން އެ ސަރަހައްދަށް ދޭ އަހައްމިއްޔަތުކަމާމެދު ސުވާލު އުފައްދާފައެވެ.
