އެމެރިކާގެ ރައީސް ޑޮނަލްޑް ޓްރަމްޕް ވަނީ، ކުރިއަށްދާ ހަނގުރާމަ ނިންމުމަށް އީރާނަށް މަޖުބޫރުކުރުވުމުގެ ގޮތުން އިގްތިސާދީ ފިޔަވަޅުތައް ވަރުގަދަކުރަން ތައްޔާރުވަމުންދާއިރު، ހުރުމުޒް ކަނޑުއޮޅިއަކީ އެމެރިކާގެ ސަރަހައްދެއްގެ ގޮތުގައި ”ވަރަށް އަވަހަށް“ ހަމަޖައްސަވާނެ ކަމަށް ވިދާޅުވެ އިންޒާރު ދެއްވާފައެވެ.

އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވަނީ މިވާހަކަތަކަށް ރައްދު ދެއްވައި، އެ މުހިންމު ކަނޑުގެ މަގު އަބަދުވެސް އޮންނާނީ އީރާނުގެ މިލްކިއްޔާތެއްގެ ގޮތުގައި ކަމަށާއި، ވޮޝިންޓަނުން ”ބަލިގަބޫލުކުރަންދެން“ އީރާނުން އެ ކަނޑުއޮޅި ބަންދުކުރުމުގެ މަސައްކަތް ކުރިއަށްދާނެ ކަމަށް ވިދާޅުވެފައެވެ.

މި ނުތަނަވަސްކަން ބޮޑުވެގެން ގޮސްފައިވަނީ، ޔޫކޭ މެރިޓައިމް ޓްރޭޑް އޯގަނައިޒޭޝަނުން ބުނާ ގޮތުގައި، ހުކުރު ދުވަހުގެ ރޭ ޖީއެމްޓީން 20:00 ހާއިރު ހުރުމުޒް ކަނޑުއޮޅިން ދަތުރުކުރި ބަލްކް ކެރިއަރަކަށް ނުވަތަ މުދާ އުފުލާ ބޮޑު ބޯޓަކަށް ހަމަލާއެއް އަމާޒުވުމާ ގުޅިގެންނެވެ. މިއިން އެއްވެސް ފަޅުވެރިއަކަށް ގެއްލުމެއް ލިބުނު ކަމަކަށް ރިޕޯޓުކޮށްފައެއް ނުވެއެވެ.

އެމެރިކާއާއި އީރާނުގެ ކުރިމަތިލުންތައް ބޮއްސުންލަމުން ދާއިރު، ޣައްޒާގައި، ހެލްތު މިނިސްޓްރީން ވަނީ އޮކްސިޖަން އުފައްދާ ސްޓޭޝަންތައް ”ސުންނާފަތިވުމާ“ ގާތްވެފައިވާ ކަމުގެ އިންޒާރު ދީފައެވެ. 34 ސްޓޭޝަނުގެ ތެރެއިން މިހާރު މަސައްކަތްކުރަނީ އެންމެ 12 ސްޓޭޝަނެވެ. އަދި އޮކްސިޖަން ފުޅި ފުރާ 30 ވަސީލަތުގެ ތެރެއިން މަސައްކަތްކުރަނީ އެންމެ 4 ވަސީލަތެވެ. މިއިން ކޮންމެ އެއްޗެއްވެސް ”ކޮންމެ ވަގުތެއްގައިވެސް“ ހުއްޓިދާނެ ކަމުގެ ބިރު އެބައޮތެވެ. އެއީ މަރާމާތަށް ބޭނުންވާ ބައިތައް އެތެރެކުރުމަށް އިސްރާއީލުން ހުރަސްއެޅުމާއި އެހީގެ ތަކެތި ވަނުން މަނާކޮށްފައިވުމުގެ ސަބަބުންނެވެ. މީގެ ސަބަބުން ހޮސްޕިޓަލްތަކުގައި އެނދުމަތިކޮށްފައިވާ ބަލިމީހުންނާއި ގޭގޭގައި ފަރުވާހޯދަމުންދާ މީހުންގެ ފުރާނައަށް ވަނީ ނުރައްކާވެފައެވެ.
އީރާނުގެ އައިއާރުޖީސީގެ ކޮމާންޑަރު މޭޖަރ ޖެނެރަލް އަހްމަދު ވަހީދީ، ސެކިއުރިޓީ އޮފިޝަލުންނަށް ފޮނުއްވި ސިޓީއެއްގައި ދައުވާކުރެއްވި ގޮތުގައި، އީރާނުގެ ސިފައިނުން ވަނީ ”ދުނިޔޭގެ ތާރީޚުގައިވެސް އެންމެ ވަރުގަދައަށް ހަތިޔާރު ލިބިފައިވާ ސިފައިން ކަކޫމައްޗަށް ތިރިކޮށްފައެވެ.“ މި ސިޓީ ފޮނުއްވާފައިވަނީ އެގައުމުގެ މަތީ ވެރިޔާ މުޖުތަބާ ޚާމަނާއީ ގައުމުގެ ދިފާއީ އިސްވެރިންގެ މަގާމުތަކަށް ބަދަލުތަކެއް ގެންނެވި ދުވަސްކޮޅެއް ފަހުންނެވެ.
މި ސަރަހައްދުގެ މުހިންމު އެހެން ކަމަކަށް ބަލާއިރު، ސައޫދީ އަރަބިއްޔާއާއި އިތުރު 13 ގައުމަކުން، އޭގެ ތެރޭގައި މިސްރު، ޕާކިސްތާން، ގަތަރު، ތުރުކީ އަދި ޔަމަން ހިމެނޭ ގޮތަށް ވަނީ ބާބު އަލްމަންދަބު ކަނޑުއޮޅިއާއި، ރަތްކަނޑު އަދި އަދަން ކަނޑުއޮޅިން ދަތުރުކުރާ އުޅަންދުތައް ހިމާޔަތްކުރުމަށް އާ މެރިޓައިމް ކޯލިޝަނެއް އުފައްދާފައެވެ. އަދި އިތުރު ގައުމުތަކުންވެސް މި ކޯލިޝަނާ ގުޅޭނެ ކަމަށް ބެލެވެއެވެ.
ލެބަނަންގައި، އަންސާރު ނަމަކަށްކިޔާ ރަށަކަށް އިސްރާއީލުން ދިން ވައިގެ ހަމަލާތަކެއްގައި ހަތް މީހުން މަރުވެފައިވާއިރު، ޒްރާރިއާ ކައިރީގައިވާ ގެއަކަށް ހަނގުރާމަމަތީ މަތިންދާބޯޓުތަކުން ދިން ހަމަލާއެއްގައި އިތުރު ތިން މީހަކު ވަނީ ޒަޚަމްވެފައެވެ. ސަލާމަތީ ޚިދުމަތްތެރިން އަދިވެސް ދަނީ އިމާރާތްތަކުގެ މުގުރިފައިވާ ބައިތަކުގެ ދަށުން މީހުން ހޯދުމުގެ މަސައްކަތް ކުރަމުންނެވެ.

ރާމަﷲ ކައިރީގައިވާ އަލްމުޣައްޔިރު ދަނޑުބިންތަކަށް ޔަހޫދީ ވަޒަންވެރިން ދޭ ހަމަލާތަކާ ދެކޮޅަށް ނުކުތް ފަލަސްތީނު މީހުންނާ ދެކޮޅަށް އިސްރާއީލު ސިފައިން ވަނީ ކަރުނަގޭސް ޖަހާފައެވެ. ރިޕޯޓުތައް ބުނާ ގޮތުގައި ވަޒަންވެރިން ވަނީ ސިފައިންގެ ހިމާޔަތުގައި އެއީ ޣައިރުގާނޫނީ އައުޓްޕޯސްޓެއް ގާއިމުކޮށްފައެވެ.

މީގެ އިތުރުން، އީރާނުގެ ހަނގުރާމައިގައި އެމެރިކާގެ މުހިންމު ކަނޑުގެ ބާރެއް ކަމަށްވާ ’ޔޫއެސްއެސް އަބްރަހަމް ލިންކަން‘ މަތިންދާބޯޓު އުފުލާ މަނަވަރުގެ ފަޅުވެރިން ވަރުބަލިވެ، ނަފްސާނީ ދުޅަހެޔޮކަމުގެ ބޮޑު ކްރައިސިސްއަކާ ކުރިމަތިލާންޖެހިފައިވާ ކަމުގެ ރިޕޯޓުތައް ވަނީ އާންމުވެފައެވެ. ނަމަވެސް ޓްރަމްޕް ވަނީ މި ދައުވާތައް ދޮގުކުރައްވާފައެވެ. ތަހުލީލުކުރާ ފަރާތްތަކުން އިންޒާރުދޭ ގޮތުގައި، އީރާނުގެ ބެލިސްޓިކް މިސައިލްގެ ގާބިލުކަން ނައްތާލެވިއްޖެ ކަމަށް އެމެރިކާއިން ކުރާ ދައުވާތަކާމެދު ސުވާލު އުފެދެމުންދާއިރު، 300,000 އާއި ހަމައަށް އިތުރު ސިފައިން ފޮނުވަން ޖެހުން ނުވަތަ ހަނގުރާމައިގެ ބޮޑު ނުރައްކަލަކާ ކުރިމަތިލާން ޓްރަމްޕަށް ވަރަށް އަވަހަށް ޖެހިވަޑައިގެންފާނެއެވެ.