އެމެރިކާއާއި އީރާނާ ދެމެދު ހިނގި ކުރިމަތިލުންތަކާ ގުޅޭގޮތުން އަލަށް ފެންމަތިވަމުންދާ ތަފްސީލުތަކުން ހާމަވާ ގޮތުގައި، އެމެރިކާގެ ކަނޑުގެ ސިފައިންގެ އެންމެ ބާރުގަދަ މަތިންދާބޯޓު އުފުލާ މަނަވަރު ވަނީ ވަރަށް ނުރައްކާތެރި ކާރިސާއަކާ ކުރިމަތިލާފައެވެ.ސީ.އެން.އެންގެ ރިޕޯޓެއްގައިވާ ގޮތުން، ރަތްކަނޑުގައި އަސްކަރީ އޮޕަރޭޝަންތަކެއް ކުރިއަށް ދަނިކޮށް ޔޫ.އެސް.އެސް ޖެރަލްޑް އާރް. ފޯޑްގައި ހިނގި ބޮޑު އަލިފާނުގެ ހާދިސާއަކީ ކުރިން ހާމަކޮށްފައިވާ ވަރަށްވުރެ މާ ނުރައްކާތެރި ހާދިސާއެކެވެ.

މި ހާދިސާ ހިނގާފައިވަނީ މިދިޔަ މާރިޗު މަހު، އީރާނާއެކު ކުރި ހަނގުރާމައިގައި އެމެރިކާގެ އޮޕަރޭޝަންތަކަށް އެހީތެރިވަމުން ދަނިކޮށެވެ. އަދި އަލަށް ލިބިފައިވާ ވީޑިއޯ ފޫޓޭޖްތަކުން ލިބުނު ގެއްލުންތަކުގެ ބިރުވެރި މަންޒަރުތައް ފެނެއެވެ.މަނަވަރުގެ އެތެރެއިން ފެންނަ ފޮޓޯތަކުން ދައްކާ ގޮތުގައި، ނިދާ ކޮޓަރިތައް ވަނީ އެއްކޮށް ހަލާކުވެފައެވެ. ނިދާ އެނދުތައް ދަގަނޑުތަކަށް ވެފައިވާއިރު، ސީލިންގްތައް ވަނީ އަލިފާނުގެ ސަބަބުން ކަޅުވެ ހުސްވެފައެވެ. އަދި މުޅި ސަރަހައްދުގައި ވަނީ އަޅި ފެތުރިފައެވެ. ދުނިޔޭގެ އެންމެ ކުރިއަރާފައިވާ މަތިންދާބޯޓު އުފުލާ މަނަވަރުގެ އެއްބައި މިހާރު ފެންނަނީ ހަނގުރާމައިގެ މައިދާނެއްގައި އެއްޗެއް ގޮވުމުން ލިބޭ ފަދަ ގެއްލުންތަކަކާއެކުގައެވެ.މި ހާދިސާ ހިނގިއިރު މަނަވަރުގައި ހުރި ފަޅުވެރިއަކު ސީ.އެން.އެންއަށް އެ ބިރުވެރި ވަގުތުތައް ކިޔައިދިނެވެ.“އަހަރެން ހަގީގަތުގައިވެސް ހީކުރީ މަނަވަރުގެ ދުވަސް މި ދިޔައީ ކަމަށް..“ އެ ފަޅުވެރިޔާ ބުންޏެވެ. ”އޮތީ ދެގޮތެއް، އެއީ ހަނގުރާމަކުރުން ނުވަތަ މަރުވުން.“ގާތްގަނޑަކަށް 13 ބިލިއަން ޑޮލަރުގެ އަގުހުރި ޔޫ.އެސް.އެސް ޖެރަލްޑް އާރް. ފޯޑަކީ އެމެރިކާއިން މިހާތަނަށް ބިނާކުރި އެންމެ ބޮޑު އަދި އެންމެ ޓެކްނޮލޮޖީގެ ގޮތުން ކުރިއަރާފައިވާ މަތިންދާބޯޓު އުފުލާ މަނަވަރެވެ. 2017 ވަނަ އަހަރު ބޭނުންކުރަން ފެށި މި މަނަވަރަކީ އެމެރިކާގެ ކަނޑުގެ ބާރުގެ ރަމްޒެއްގެ ގޮތުގައި ބެލެވޭ މަނަވަރެކެވެ.ނަމަވެސް، އަލަށް ހާމަވި ތަފްސީލުތަކުން އެނގޭ ގޮތުގައި، އާންމުންނަށް ކުރިން މައުލޫމާތު ދީފައިވާ ވަރަށްވުރެ މާ ނުރައްކާތެރި ހާލަތަކާ މި މަނަވަރު ކުރިމަތިލިއެވެ. ރަސްމީ ފަރާތްތަކުން ކުރިން ބުނެފައިވަނީ ދެ ފަޅުވެރިއަކަށް ކުދި އަނިޔާތަކެއް ލިބުނު ކަމަށެވެ. އެކަމަކު، ސީ.އެން.އެންއިން ފަހުން ވަނީ އެމެރިކާގެ އޮފިޝަލަކާ ހަވާލާދީ، އެ އަލިފާނުގެ ސަބަބުން މަނަވަރުގެ އޮޕަރޭޝަނަލް ގާބިލުކަމަށް އަސަރުކުރިކަން ހާމަކޮށްފައެވެ.ފަޅުވެރިން ގާތްގަނޑަކަށް 30 ގަޑިއިރު ވަންދެން އަލިފާން ނިއްވުމަށް މަސައްކަތް ކުރިއެވެ. މި ހާދިސާގެ ސަބަބުން ގާތްގަނޑަކަށް 600 އެއްހާ ފަޅުވެރިންނަށް އެމީހުންގެ ނިދާ ތަންތަން ބޭނުންނުކުރެވޭ ވަރަށް ގެއްލުންވިއެވެ.އަދި ހަނގުރާމައިގެ ތެރޭގައި އީރާނުގެ މިސައިލްތަކާއި ޑްރޯންތައް އުދަރެހުން ފެންނަމުންދިޔަ ކަމަށްވެސް އެ ފަޅުވެރިޔާ ހަނދާން އާކުރިއެވެ. މަނަވަރާ ވަކި ދުރުމިނަކަށް ނުރައްކާތައް ގާތްވުމުން، މުޅި މަނަވަރުގައި އެލާމް އަޅައި، ހަމަލާއަކަށް ތައްޔާރުވުމަށާއި ގެއްލުންތައް ކުޑަކުރުމުގެ ފިޔަވަޅުތައް އެޅުމަށް ފަޅުވެރިންނަށް އަންގަމުންދިޔައެވެ.މި މައުލޫމާތުތައް ހާމަވެފައި މިވަނީ، އޭޕްރީލް މަހު ހަނގުރާމަ ހުއްޓާލުމުގެ އެއްބަސްވުމަކާއެކު ނިމުނު 39 ދުވަހުގެ އެމެރިކާ-އީރާން ހަނގުރާމައިގެ ނަތީޖާއާ މެދު ބަހުސްތައް އިތުރުވެފައިވާ ދަނޑިވަޅެއްގައެވެ. އެމެރިކާއިން އެންމެ ޒަމާނީ އަސްކަރީ ވަސީލަތްތައް ބޭނުންކުރި ނަމަވެސް، ހަނގުރާމައަށްފަހު ފެންމަތިވަމުންދާ ރިޕޯޓުތަކުން އެމެރިކާގެ ސިފައިންނަށް ކުރިމަތިވި ގޮންޖެހުންތަކާއި އީރާނުގެ އަސްކަރީ ގާބިލުކަމާ މެދު ސުވާލުތައް އުފެދެއެވެ.ގިނަ ދިރާސާވެރިން ދެކޭގޮތުގައި، ޔޫ.އެސް.އެސް ފޯޑްގެ މި ހާދިސާއަކީ، ހަނގުރާމައެއް ވަރުގަދަވެގެންދާއިރު ދުނިޔޭގެ އެންމެ ބާރުގަދަ ހަނގުރާމަމަތީ މަނަވަރުތަކަކީވެސް ނުރައްކަލުން ސަލާމަތްވެފައިވާ އެއްޗެއް ނޫންކަން ހަނދާންކޮށްދޭ ކަމެކެވެ.