އެމްޑީޕީގެ ޙަރަކާތްތައް އަތޮޅު ތެރޭގައި އޮތީ ވަޅުޖެހިފައި ކަމަށް އެ ޕާޓީގެ ޗެއާޕާސަން ކަމަށް ވާދަކުރައްވާ ގެލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.

 ކެމްޕޭންގެ ޙަރަކާތްތަކުގެ ތެރެއިން އެމްޑީޕީ ހަރުގޭގައި ނޫސްވެރިންނާ ބައްދަލު ކުރައްވައި މީކާއީލް ވިދާޅުވީ މިކުރަމުން ގެންދާ ކެމްޕޭން ދަތުރުތަކުގައި މިހާތަނަށް 55 ރަށަކަށް ދެވިއްޖެ ކަމަށެވެ. އަދި ދެވުނު ރަށްތަކުގެ ތެރެއިން އެންމެ ބޮޑު އެއް ޝަކުވާއަކީ ޕާޓީގެ ޙަރަކާތްތައް ވަޅުޖެހިފައި އޮތުމާއިއެކު ޕާޓީ އާއި ގުޅުން ކެނޑިފައިވާ ކަމަށެވެ.

މީކާއީލް އެހެންވެ އެކަމަށް ޙައްލެއް ގެނައުމުގެ ގޮތުން އެމްޑީޕީގައި ޒަމާނަށް ފެތޭ އޮނިގަނޑެއް އެކުލަވާލުމަށް އޭނަ ވައުދުވެ ވަޑައިގެންފައި ވާނެކަމަށެވެ. އޭނަ ވިދާޅުވީ އެމްޑީޕީގެ އާންމު މެންބަރުންނާއި އަދި މުޅި ޖުމްލަކޮށް ރަށްރަށުގައި ތިބޭ އާންމު ރައްޔިތުންނާ އެންމެ ގާތުން މަސައްކަތްކުރާ އެއް ބަޔަކީ އެމްޑީޕީގެ އިންތިޚާބީ ކައުންސިލަރުންނާއި ޑަބްލިއުޑީސީގެ މެންބަރުން ކަމަށެވެ.

އެހެންވެ އެބޭފުޅުންނަށް އެމްޑީޕީގެ އެންމެ އިސް ގުނަވަނުގެ ގޮތުގައި އޮންނަ އެ ޕާޓީގެ ގައުމީ މަޖިލީހުގައި ބަސް ކިޔުމުގެ ޖާގަ އޮންނަންޖެހޭ ކަމަށާއި އެއީ ކޮންމެހެން ލާޒިމު ކަމެއް ކަމަށް ވެސް މީކާއިލް ވިދާޅުވި އެވެ.

އޭނާ ވަޢުދުވަނީ ޗެއާޕާސަންގެ މަގާމަށް އިންތިޚާބުވެއްޖެ ނަމަ ޕާޓީގެ ހިންގުން ހަރުދަނާ ކުރަން މުހިއްމު ގިނަ ފިޔަވަޅުތަކެއް އަޅައި، ޕާޓީގެ ޙަރަކާތްތަކުގައި ޒުވާނުންގެ ދައުރު ވެސް ވަރަށް ބޮޑަށް ފުޅާކުރައްވާނެ ކަމަށެވެ.

އެމްޑީޕީގެ ޗެއާޕާސަން އިންތިޚާބު ބޭއްވުމަށް ނިންމާފައިވަނީ އަންނަ ޖޫން މަހުގެ 12 ވަނަ ދުވަހުއެވެ. މި އިންތިޚާބުގައި މީކާއީލާއި ވާދަކުރައްވަނީ އެޕާޓީގެ ކުރީގެ ރައީސް މުޙައްމަދު ނަޝީދުއެވެ. މީކާއީލް ވިދާޅުވާގޮތުގައި ޕާޓީ ރޫޅާލުމަށް ނަޝީދުއާއި އޭނާގެ ބައިވެރީން ވަރަށް ފައުޅުކަން ބޮޑުގޮތެއްގައި މަސައްކަތް ކޮށްފައިވެއެވެ. އަދި އެމްޑީޕީގެ ސަރުކާރެއް 2023 ގައި ވެރިމަށް ހޮވުނަ ނުދިނުމަށް ރައީސް ޔާމީނުއާއި އަދި ދެވަނަ ރައުންޑްގައި ރައީސް މުޢިއްޒުއާއި އެކު ގުޅިގެން މަސައްކަތްކޮށްފާ ވުމާއިއެކު ޗެއަރޕާސަންގެ މިއިންތިޚާބުގައި ޕާޓީގެ ގިނަ މެމްބަރުން ވިސްނުން ތެރިކަމާއި އެކު ނިންމަވާ ނިންމުން އޭނާގެ ފަޅިޔަށް ބުރަވާނެކަމަށެވެ.