ތައިލެންޑުގެ ވެރިރަށް ބެންކޮކްގެ ކާރުބާރު ބޮޑު ސަރަހައްދެއްގައި، މުދާ އުފުލާ ރޭލެއް ބަހެއްގައި ޖެހި ހިނގި ނުރައްކާތެރި އެކްސިޑެންޓެއްގައި 8 މީހުން މަރުވެ، ގިނަ ބަޔަކަށް އަނިޔާވުމާ ގުޅިގެން މުޅި އެ ގައުމަށް ބޮޑު ސިހުމެއް ލިބިއްޖެއެވެ.

މި ހިތާމަވެރި ހާދިސާ ހިނގާފައިވަނީ ހޮނިހިރު ދުވަހުގެ މެންދުރުފަހު، ބެންކޮކްގެ އެންމެ ކާރުބާރު ބޮޑު އަދި ނުރައްކާތެރި އެއް ސަރަހައްދު ކަމަށްވާ ’އަސޯކް-ޑިން ޑައެންގް‘ ރޭލު މަގު ހުރަސްކުރާ ތަނުގައެވެ. ތައިލެންޑުގެ ފުލުހުން ބުނި ގޮތުގައި، ރޭލު ދުއްވަން ހުރި މީހާ މަސްތުވާތަކެއްޗަށް ޕޮޒިޓިވްވެފައިވާތީ، އޭނާގެ މައްޗަށް ވަނީ ފަރުވާކުޑަކޮށް ރޭލު ދުއްވުމުގެ ދައުވާ އުފުލާފައެވެ.ކަމާބެހޭ އިދާރާތަކުން ބުނި ގޮތުގައި، އެ ވަގުތު އޮތް ބޮޑު ޓްރެފިކް ތޮއްޖެހުމުގެ ސަބަބުން، އާންމު ދަތުރުފަތުރުކުރާ އެ ބަސް އޮތީ ރޭލު ދަގަނޑު މަތީގައި ކުރިއަށް ނުދެވި ތާށިވެފައެވެ. މަޢުލޫމާތު ލިބޭ ގޮތުގައި، އެ ސަރަހައްދުގައި ހުރި އަތުން އޮޕަރޭޓްކުރާ ރޭލު ބެރިއަރުތައް އެ ވަގުތު ރަނގަޅަށް ތިރިނުކުރެވުނީ، އެ މަގުގައި އުޅަނދުފަހަރު ތޮއްޖެހިފައި އޮތުމުގެ ސަބަބުންނެވެ. އޭގެ ކުޑަ އިރުކޮޅެއް ފަހުން، ބާރުމިނުގައި އައި މުދާ އުފުލާ ރޭލު ބަހުގައި ޖެހި، ބަހުގައި ބޮޑު އަލިފާންގަނޑެއް ރޯވިއެވެ.ހާދިސާ ހިނގި ސަރަހައްދުން ފެންނަ ބިރުވެރި މަންޒަރުތަކުން ފެންނަ ގޮތުގައި، ބަހުގެ ތެރޭގައި ތާށިވެފައި ތިބި މީހުން ސަލާމަތްކުރުމަށް ރެސްކިއު ޓީމުތަކުން މަސައްކަތް ކުރަމުންދިޔައިރު، މުޅި ސަރަހައްދު އޮތީ ކަޅު ދުމުން ފުރިފައެވެ. އަދި ގިނަ އަދަދެއްގެ އަލިފާން ނިއްވާ ލޮރީތަކާއި އެމްބިއުލާންސްތައް އެ ސަރަހައްދުގައި ހަރަކާތްތެރިވަމުންދިޔައެވެ.މި ހާދިސާއާ ގުޅިގެން ބަސް ދުއްވަން ހުރި މީހާއާއި، ބެރިއަރު ތިރިކުރުމުގެ މަސްއޫލިއްޔަތާ ހަވާލުވެހުރި ރޭލު ގާޑުގެ މައްޗަށްވެސް ފުލުހުން ވަނީ ދައުވާ އުފުލާފައެވެ. މި އެކްސިޑެންޓް ހިނގުމުގައި އިހުމާލުވުމާއި ސަލާމަތީ ފިޔަވަޅުތަކުގެ ބަލިކަށިކަން އޮތް މިންވަރު ކަމާބެހޭ ފަރާތްތަކުން މިހާރު ދަނީ އިތުރަށް ތަހުގީގު ކުރަމުންނެވެ.ތައިލެންޑުގެ ރޭލު ދަތުރުފަތުރާ ބެހޭ ޑިޕާޓްމަންޓުން ވަނީ މި ހާދިސާއަށްފަހު ވަގުތުން އެޅޭނެ ސަލާމަތީ ފިޔަވަޅުތަކެއް އިއުލާންކޮށްފައެވެ. އެ އިދާރާގެ ޑައިރެކްޓަރ ޖެނެރަލް ޕިޗެޓް ކުނަދަމްރަކްސް ވިދާޅުވި ގޮތުގައި، މީގެ ފަހުން ހުރިހާ ރޭލު ޑްރައިވަރުންނާއި ރޭލުވޭގެ މުވައްޒަފުން މަސައްކަތަށް ނުކުތުމުގެ ކުރިން މަސްތުވާތަކެއްޗާއި ކަހަލަ ތަކެއްޗަށް ޓެސްޓުކުރުން މިހާރު ވަނީ މަޖުބޫރުކޮށްފައެވެ.ރޭލުގެ ’ބްލެކް ބޮކްސް‘ ތަހުގީގުކުރި އިރު އެނގުނު ގޮތުގައި، ކުއްލި ހާލަތުގައި ޖައްސާ ބްރޭކް ޖައްސާފައިވަނީ ބަހާ ގާތްގަނޑަކަށް 100 މީޓަރަށް ކައިރިވި ފަހުންނެވެ. އެއީ އެކްސިޑެންޓް ހުއްޓުވޭވަރަށްވުރެ މާ ލަސް ވަގުތެކެވެ.ކަމާބެހޭ މާހިރުން ވިދާޅުވާ ގޮތުގައި، އެ ސަރަހައްދަކީ މާ ކުރިންސުރެވެސް ނުރައްކާތެރި ތަނެއްގެ ގޮތުގައި ފާހަގަކުރެވިފައިވާ ތަނެކެވެ. ތައިލެންޑުގެ ސްޓްރަކްޗަރަލް އިންޖިނިއަރުންގެ އެސޯސިއޭޝަންގެ ރައީސް ޑރ. އަމޯން ފިމާންމަސް ލަފާކުރައްވާ ގޮތުގައި، އެތަނުން ދުވާލަކު އެއްލައްކައަށްވުރެ ގިނަ އުޅަނދު ދަތުރުކުރެއެވެ. މިއީ ސަލާމަތީ މިންގަނޑުތަކަށް ބަލާއިރު ބަރުދާސްތު ކުރެވޭނެ މިންވަރަށްވުރެ މާ ގިނަ އަދަދެކެވެ.އޭނާ އިތުރަށް ވިދާޅުވި ގޮތުގައި، އެ ސަރަހައްދުގައި ނުރައްކާތެރި ގޮތްގޮތަށް އުޅަނދު ދުއްވުމަކީ އާންމު ކަމަކަށް ވެފައިވާ ކަމަށާއި، ވަކިން ހާއްސަކޮށް ރޭލު އަންނާތީ ބެރިއަރުތައް އަޅުވާފައި ހުންނަ ވަގުތުތަކުގައި، ލަސްވެދާނެތީ އެ ބެރިއަރުތަކުގެ ދޭތެރެއިން ސައިކަލުތައް ދުއްވުމަކީ އާންމުކޮށް ފެންނަ މަންޒަރެއް ކަމަށެވެ.“މިފަދަ ނުރައްކާތަކަކީ މީހުންނަށް އާދައިގެ ކަންކަމަށް ވެއްޖެ،“ އޭނާ އިންޒާރު ދެއްވަމުން ވިދާޅުވިއެވެ. އަދި ސަލާމަތީ ނުރައްކާތަކަށް އަހަރުތަކެއް ވަންދެން ފަރުވާކުޑަކޮށް، އެކަންކަމަށް ފިޔަވަޅު ނާޅާ ދޫކޮށްލުމުގެ ނަތީޖާއަކީ މިފަދަ ބޮޑު ކާރިސާއެއް ކުރިމަތިވުން ކަމަށް އޭނާ ފާހަގަކުރެއްވިއެވެ.މި ހިތާމަވެރި ހާދިސާއާއެކު، ތައިލެންޑުގެ ރޭލު މަގުތަކުގެ ސަލާމަތީ ކަންކަމާ މެދު އާއި، ކާރޫބާރޫ ބޮޑު ސިޓީތަކުގައި ހުންނަ މިފަދަ ހުރަސްތައް ޒަމާނީ ފެންވަރަށް ތަރައްގީކުރުމާ ނުވަތަ މުޅިން ނައްތާލުމާ މެދު އާންމުންގެ މެދުގައި ބޮޑު ބަހުސެއް ވަނީ ފެށިފައެވެ. ގިނަ ބަޔަކު ދަނީ ގާނޫނުތައް ހަރުކަށިކުރުމަށާއި، އޮޓޮމެޓިކް ބެރިއަރު ސިސްޓަމްތައް ގާއިމުކުރުމުގެ އިތުރުން، މިފަދަ ކާރިސާއެއް ތަކުރާރުވިޔަ ނުދިނުމަށްޓަކައި އުމްރާނީ ތަރައްގީގެ ބޮޑެތި ބަދަލުތަކެއް ގެނައުމަށް ގޮވާލަމުންނެވެ.މި އެކްސިޑެންޓުން އަނެއްކާވެސް ހާމަވެގެން މިދިޔައީ، ދެކުނު އިރުމަތީ އޭޝިއާގެ އެންމެ ކާރޫބާރޫ ބޮޑު އެއް ސިޓީގައި، މަގުތައް ތޮއްޖެހުމާއި، ސަލާމަތީ ކަންކަން ބަލިކަށިވުމާއި އަދި އިންސާނުންގެ ފަރުވާކުޑަކަމުގެ ސަބަބުން ކުރިމަތިވެދާނެ ހިތާމަވެރި ނަތީޖާތަކެވެ.