އެމެރިކާއާއި އިސްރާއީލުން އީރާނާ ދެކޮޅަށް ކުރާ ހަނގުރާމައިގާ އެމެރިކާ އަދި އިސްރާއީލަށް ލިބޭ ގެއްލުންތަކުގެ ވާހަކަ އޮންނަނީ ފޮރުވާފައެވެ.
އެކަމާބެހޭގޮތުން އާންމުންގެ ކުރިމައްޗަށް އަންނަނީ މިނިވަން އަމިއްލަ ފަރާތްތަކުން ގެނެސްދޭ މައުލޫމާތު އެކަންޏެވެ.
އެހެންނަމަވެސް ބައިނަލް އަގްވާމީ ބޮޑެތި މީޑިއާތަކުން އެ ޚަބަރުތައްވެސް އޮޅުވާލަން ގެންދަނީ މަސައްކަތް ކުރަމުންނެވެ. ދާދިފަހުން ސައޫދީއެރޭބިއާގެ އެންމެ ބޮޑު ތެޔޮ ސާފުކުރާ ކާރުޚާނާއަށާއި އެމިރެޓްސް ގެ ބައެއް އާންމު ސަރަހައްދުތަކަށް އީރާނުން ހަމަލާދިނުމުގެ ވާހަކަތަކެއްވެސް ފެންމަތި ވެގެން އައެއެވެ. ހަމައެއާއެކު މިހާރު ލިބެމުންދާ ބައެއް ޚަބަރުތަކުގައި މޮސާޑުގެ ބައެއް އޭޖެންޓުން ސައޫދީ އެރޭބިއާއާއި އެމިރެޓްސް ގައި ބޮން ގޮއްވުމުގެ ހަރަކާތެއް ހިންގަން އުޅެނިކޮށް އަތުލައިގަނެވި ތަޙްގީގު ކުރެވެމުންދާ ޚަބަރުތަކެއްވެސް ވަނީ ތިލަވެފައެވެ.
އީރާނުގައި މިހާރު ކޮމާންޑަރަކީ ކޮންބޭފުޅަކުކަން އެނގުމުން އެމެރިކާއިން މަޝްވަރާކުރަން ބޭނުންވާކަން ހާމަކޮށްފިއެވެ. މިއަދުގެ ހާލަތަށް ބަލާއިރު ހުންގާނަށް ހަވާލުވެ ވަޑައިގެން އެ ހުންނެވީ އިސްލާމްދީނުގެ ގިއުގަނޑުގެތެރޭގައި އިސްލާމިކް ރިޕަބްލިކް އޮފް އީރާނުން ނިއުކްލިއަރ ހަތިޔާރު ލިބިފައި ހުންނަން ޖެހޭނެކަމަށް އެންމެ އިސް ސަފުގައި ދައުވާކުރައްވަމުން ގެންދަވާ ބޭފުޅާއެވެ. އީރާނުގެ ރައްޔިތުން މަގުތަކަށް ނިކުމެ ފާޅުކުރަމުން ގެންދާ ޝުއޫރަކީވެސް އެއީ އެވެ. އެމެރިކާއާއި އިސްރާއީލުގެ ހައްދުފަހަނަޅާފައިވާ މޮޔަކަމުގެ ސަބަބުން މިއަދު އީރާނުގެ ވެރިކަމަށް ހަވާލުވެ ވަޑައިގެންނެވީ އީރާނަށް ނިއުކްލިއަރ ހަތިޔާރު ލިބިފައިވާކަމަށް އެންމެ ބޮޑަށް ވަކާލާތު ކުރައްވާ ބޭފުޅާއެވެ. އާޔަތު ﷲ އަލީ ޚާމަނާއި އަކީ އިމާމް ހުސައިންގެފާނުގެ ފަހަތްފުޅުން ހިންގަވަމުން ޝަހީދުވެ ވަޑައިގެންނެވި ބޭފުޅެކެވެ. މިއީ އީރާނުގެ ރައްޔިތުން ގަބޫލުކުރާ ހަގީގަތެކެވެ. އިސްލާމިކް ރިޕަބްލިކް އޮފް އީރާން އިމާރާތް ކުރެވިފައިވަނީ އެންމެ މީހެއްގެ ފަލްސަފާގެ މަތީގައި ނޫންކަން މިހާރު ގަބޫލުކުރަން ޖެހޭނެއެވެ. އެ ގަމުކީ ދުސްތޫރެއްގެ މައްޗަށް ބިނާކޮށްފައިއޮތް ގައުމެކެވެ. ގާނޫނު އަސާސީން ބޭރުން އެއްވެސް ބޭފުޅަކަށް ބާރުތަކެއް ލިބިފައެއް ނެތެވެ. އެ ގާނޫނު އަސާސީގެ ދަށުން އީރާނުގައި ނިއުކްލިއަރ ހަތިޔާރު ލިބިފައި ހުންނަން ޖެހޭނެ ކަމަށް އިއްތިފާގު ވެވަޑައިގަންނަވަނީ އިސްލާމް ދީން އެނގިވަޑައިގަންނަވާ ބޭފުޅުންނެވެ. އާޔަތު ﷲ އަލީ ޚާމަނާއި އެކަން މަނާކުރައްވާފައިވަނީ އެ ބޭފުޅާގެ ޝަޚްސިއްޔަތުގައި ހުރި މަޑުމައިތިރި ކަމެއްގެ ސަބަބުންނެވެ. އީރާނުގެ ސަރުކާރު ބަދަލުކުރަން އެމެރިކާއާއި އިސްރާއީލުން ގެންގުޅޭ ވިސްނުމުގެ ސަބަބުން ދުނިޔެއަށް މިހާރު ކުރިމަތިވެފައިވާ ނުރައްކަލާ ދޭތެރޭ ފިކުރު ކޮށްބަލާށެވެ. ސަރުކާރު ބަދަލުކުރުން ނުވަތަ ރެޖީމް ޗޭންޖް ކުރުމަކީ ދެމިޔަލީ ކަނޑިއެކެވެ. އެމެރިކާއާއި އިސްރާއީލުން އެއޮތީ އެ ކަނޑު އުރައިން ނެރެފައެވެ. އެ ކަނޑީގައި ދެފަރާތު މިޔަލާފައިހުރިކަމެއް ނުވިސްނުނެވެ. ހިނގުރާމަ ފެށުނު ވަގުތު ފުރަތަމަ އީރާނަށް ވައްޓާލި 6 ބޮމާއެކު ރައީސް ޑްނާލްޑް ޓްރަމްޕްއަށް ހަނގުރާމަ ގެއްލިއްޖެކަން ތަޖްރިބާކާރުން ހާމަކުރަންފަށައިފިއެވެ. މިއަދު އެންމެ ވިއްސަކަށް ހާސް ޑޮލަރުގެ ޑްރޯނަކުން އެމެރިކާގެ އެތައް ބިލިއަން ޑޮލަރުގެ އަގުބޮޑު ވައިގެ ދިފާއީ ނިޒާމްތައް ބިމާހަމަކުރަމުން ގެންދާތީ ރައީސް ޓްރަމްޕް ގެންދަވަނީ ކޯފާވެ ހުންނަވައި ޕެންޓަގަންއާ ސުވާލުކުރައްވަމުންނެވެ. އީރާނުގެ ރެޖީމް ބަދަލުވެގެން ދިއުމުގެ ކުރިން އެމެރިކާގެ ރެޖީމް ބަދަލުވެގެންދާތަންވެސް ފެނިދާނެއެވެ. މިޑްޓާރމް އިންތިޚާބު ކާމިޔާބު ކުރުމަށްޓަކައި އީރާނުގެ ހަނގުރާމަ ކާމިޔާބުކުރަން ޓްރަމްޕް ހުންނެވީ ފޫގަޅާފައެވެ. އެކަމަކު ފާއިތުވެގެން މިދާ 47 އަހަރު އެމެރިކާގެ އެއްވެސް ރައީސަކަށް ކާމިޔާބު ނުކުރެވުނު ކަމެއް ޑޮނާލްޑް ޓްރަމްޕް އަށްވެސް ނުކުރެވޭނެއެވެ. މި ފަހަރުގެ ހަނގުރާމައިގާ އެމެރިކާއަށް ބޮޑެތި ގެއްލުންތަކަކާ ކުރިމަތިލާން ޖެހޭނެކަމާ ދޭތެރޭ ޝައްކެއް ނެތެވެ.
ޑޮނާލްޑް ޓްރަމްޕް އަށް މިފަހަރުގެ ހަނގުރާމަ ގެއްލިއްޖެއެވެ. ޕެންޓަގަންގައި ފަޅައިގެންދިޔަ ރެނދު އަލުން ރިޕެއަރ ކުރެވޭނެ މަގެއް ނެތެވެ. މިއީ ދިފާއީ ވަޒީރު ޕީޓް ހެގްސެތު އަދި ޗެއަރމަން ޖޮއިންޓް ޗީފް އޮފް ސްޓާފް ޖެނެރަލް ޑޭން ކެއިން ގެ ބަސްމަގު ތަރުޖަމާކުރެވޭ ގޮތެވެ. އެއީ އެމެރިކާއިން ހަނގުރާމައިގެ އަލިފާން ރޯކުރެވިދާނެ މިންވަރު ފައިސަލާކުރުމުގެ އެންމެ އިސް ވެރިންނެވެ. އެކަމަކު މިހާރު އެބޭފުޅުންގެ ބަސްމަގު ތަފާތު ވެއްޖެއެވެ. ހަނގުރާމައިގެ އަލިފާނުނގައި އެބޭފުޅުން އަނދައިގެން ހިގާދާނެ ކަމުގެ ބިރުވެރިކަން އެ ބަސްމަގުގައި އެކުލެވޭކަހަލައެވެ. ހަނގުރާމަ ދިގުލާނަމަ އެމެރިކާގެ ލަޝްކަރުތަކަށް ބޮޑެތި ގެއްލުން ލިބިގެންދާނެކަމަށް ސަރީހަ ބަހުން އެބޭފުޅުން ވަނީ ހާމަކޮށްފައެވެ. އަދި އެމެރިކާއިން ސީދާ އީރާނަށް ހަމަލާދިނުގައި ކުރިމަތިލާން ޖެހިދާނެ ނުރައްކާތެރި ހާލަތާ ދޭތެރޭ އިންޒާރު ދެއްވިއެވެ. ހަނގުރާމައިގާ ލިބޭ ބޮޑެތި ގެއްލުންތައް ތަފާތު ގޮތްގޮތަށް ތަރުޖަމާކުރަމުން ގެންދެއެވެ. ކުވޭތު ސަރަހައްދުން ވައްޓާލި އެމެރިކާގެ ފައިޓަރ-ޖެޓާތަކާ ބެހޭގޮތުން އެއީ ފްރެންޑްލީ ފަޔަރ އެއްގައި ކަމަށް ބުނުންކަހަލަ ގޮތްގޮތަށެވެ. ތެލުގެ އަގު ހިފޭއްޓުމެއް ނެތި އަރައިގެން ދިއުމާއި ޚޮރްމުޒް ކަނޑުއޮޅި ބަންދުކޮށްލުމުން ގަތަރުން ގޭސް އެކްސްޕޯރޓް ކުރުމުގެ މަގު ބަންދުވެގެންދިއުން ފާހަގަކޮށްލާށެވެ. މިގޮތަށް ދުވަސްކޮޅެއް ފާއިތުވެއްޖެނަމަ ޔޫރަޕްގެ ގައުމުތަކުން އަނެއްކާވެސް ޖެހޭނީ ގޭސް ހޯދުމަށްޓަކައި ރަޝިޔާގެ ފައިބުޑަށް ވެއްޓޭށެވެ. ވައިގެ ދަތުރުފަތުރު ހުއްޓުމަކަށް އައުމުން ޓޫރިމަށް ވެގެންދާނެގޮތް ފެނިއްޖެއެވެ. އިންވެސްޓަރުން ތިބީ ގޮތް ހުސްވެފައެވެ. ހަނގުރާމަ ދިގުލާނަމަ ގަލްފުގެ ތެޔޮވަޅުތަކުން ބަރުކުރަން އެއްވެސް ޓޭންކަރަކަށް ނުދެވޭނެއެވެ، ނަތީޖާއަކަށް ވެގެންދާނީ ދުނިޔޭގެ އިގްތިސާދު އަތްނުފޯރާހިސާބަށް އުފުލިގެން ދިއުމެވެ. މިހުރިހާ ބުރައެއް އެންމެ ބޮޑަށް އުފުލަންޖެހޭނީ އެމެރިކާގެ ރައްޔިތުން ކަން އެމެރިކާގެ ސިޔާސީ ބޭފުޅުންނަށް އެނގެއެވެ. މިހާރު އެމެރިކާގެ ކުރިމަތީގައި އޮތީ 3 އިޚްތިޔާރެކެވެ. ސިޔާސީ ގޮތުން މައްސަލައަށް ހައްލެއް ހޯދުމާއި ހަނގުރާމައިގާ ފަހަތަށް ޖެހުމެވެ. ފަހަތަށް ޖެހުމަކީ މަލާމާތަށް ހުރަހޮޅުމެވެ. ހަނގުރާމައިގާ ދެމިތިބުން އިޚްތިޔާރުކޮށްފިނަމަ ރައްޔިތުންގެ ޖީބު ހުސްވެ ގައުމުގެ ޚަޒާނާގެ ފޫ ކަހަން ޖެހިދާނެއެވެ. މިހުރިހާ ކަމަކަށްވުރެން އިސްރާއީލު ދެމިއޮވެދާނެކަމުގެ ސުވާލު މާބޮޑެވެ. ސަރަހައްދުގައި އަލިފާން ރޯވެ އަދައިގެން ދިއުމުގެ ކުރިން އިސްރާއީލު ސަލާމަތްކުރުމުގެ ނުރައްކާތެރިކަމެވެ. އީރާނުގެ ކޮންމެ ރައްދު ހަމަލާއެއް ކުރީގެ ހަމަލާއަށް ވުރެން މާ ނުރައްކާތެރިއެވެ. އީރާނަށް ތާއީދުކުރާ ހަނގުރާމަވެރި ޖަމާއަތްތަކުން ނިކުމެ އީރާނާއެކު އަތާއަތް ގުޅާލައިފިއެވެ. ބަންދުކޮޓަރީގައި ތިބެގެން އެމެރިކާއާއި އިސްރާއީލުން މިހާރު ކުރާ ސައްލާއަކީ އެންމެ ނުރައްކާތެރި ހާލަތުގައި އަޅާނެ ފިޔަވަޅެކެވެ.
