ސީރިއާގެ ހަނގުރާމައަށް ގޮސް ތުރުކީގައި ތާށިވެފައި ތިބި ދެމައިން ރާއްޖެ ގެނެސްފިއެވެ.
މިކަން ހާމަކުރައްވާފައި ވަނީ ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހްސާން އެވެ.
ބައްދަލުވުމުގައި މިނިސްޓަރު ވިދާޅުވީ ހަނގުރާމަތަކުގައި ބައިވެރިވާން ރާއްޖެއިން ދިޔަ ބައެއް މީހުންނާއި އެފަދަ މީހުން ގެންދިޔަ އާއިލާގެ މީހުން ރާއްޖެ ނާދެވި ހާލުގައި ޖެހިފައި އެބަ ތިބި ކަމަށާއި ސީރިއާގެ ދެ ސަރަހައްދެއްގައި ތިބި 60 ވަރަކަށް މީހުން ގެނައުމުގެ މަސައްކަތާއި އެހެން ބައެއް ގައުމުތަކުގައި ތާށިވެފައި ތިބި މީހުން ގެނައުމުގެ މަސައްކަތް ވެސް ސަރުކާރުން ކުރަމުން އަންނަ ކަމަށެވެ.
ެއެގޮތުން ތުރުކީއަށް ހިޖުރަކޮށް އެ ތަނުގައި ރާއްޖޭގެ 3 މީހަކު ތާށިވެފައި ތިބި ކަމުގެ މައުލޫމާތު އެ ގައުމުގެ ސަރުކާރުން ރާއްޖޭގެ ސަރުކާރަށް އެންގުމުން އެ ތިން މީހުން ރާއްޖެ ގެނައުމުގެ މަސައްކަތް ކުރިއަށް ގެންދިޔަކަމަށް މިނިސްޓަރު ވިދާޅުވި އެވެ.
އެ މީހުން ގެނައުމަށް ކުރި މަސައްކަތުގެ ދަށުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެ ގެނެސް ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި އެމީހުންނަށް ފޯރުކޮށްދޭން ޖެހޭ ކަންކަން ފޯރުކޮށްދެމުން އަންނަ ކަމަށް މިނިސްޓަރު ވިދާޅުވިއެވެ.
