ދުނިޔޭގެ ބާޒާރުގައި ތެލުގެ އަގަށް އައި ބަދަލާއެކު ރާއްޖޭގައިވެސް ތެލުގެ އަގު ބޮޑުކޮށްފިއެވެ.

ފިއުލް ސަޕްލައި މޯލްޑިވްސް (އެފްއެސްއެމް) އިން ރާއްޖޭގައި ވިއްކާ ތެލުގެ އަގު 5 މާރިޗް 2026 އިން ފެށިގެން ވަނީ ބޮޑުކޮށްފައެވެ.
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ދަށުން ހިންގާ އެފްއެސްއެމް އިން ވަނީ ދުނިޔޭގެ ބާޒާރުގައި ތެލުގެ އަގަށް އައި މި ބަދަލާ އެކު، ޕެޓްރޯލާއި ޑީސަލްގެ އާ އަގުތައް އިއުލާނުކޮށްފައެވެ.

އެގޮތުން އަލަށް ގެނައި ބަދަލާއެކު، ކުރިން 13.50 ރުފިޔާއަށް ލިބުނު ޕެޓްރޯލް ލީޓަރެއް ދެން ލިބޭނީ 16.01 ރުފިޔާއަށެވެ. މިއީ ލީޓަރަކުން 2.51 ރުފިޔާގެ އިތުރުވުމެކެވެ.
އަދި ޑީސަލް ލީޓަރެއްގެ އަގު ވަނީ 13.92 ރުފިޔާއިން 17.54 ރުފިޔާއަށް އުފުލިފައެވެ. މިއީ ލީޓަރަކުން 3.62 ރުފިޔާގެ ބޮޑުވުމެކެވެ.

މިއީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެން ފެށުމުގެ ނަތީޖާއެވެ.
މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު ކަނޑުއޮޅިއެއް ކަމަށްވާ ހޮރްމުޒް ކަނޑުއޮޅި ވަނީ އެމެރިކާއާ އީރާނާއި އިޒްރޭލުން ކުރަމުން އަންނަ ހަނގުރާމައާ ގުޅިގެން އީރާނުން ބަންދުކޮށްފައެވެ.