މާާތް ﷲ އެންމެހާ ކަންތައް އެންމެމޮޅަށް ދެކެދެނެ ވޮޑިގެންވާ ހާލުގައިމެ މާތް ނަބިއްޔާގެ އަރިހަށް ހުކުރުދުވަހު ޖިބްރީލްގެފާނު ފޮނުއްވިއެވެ. ކަލޭގެފާނުގެ ހާލުކޮޅު އޮޅުންފިލުވުމަށް މާތް ﷲ ތިމަންކަލޭގެފާނު ފޮނުއްވެވީ ކަމަށް ވިދާޅުވިއެވެ.

ގަދަހުމާއި ބޮލު ރިހުމުގެ ސަބަބުން ވަރަށް އުދަނގޫ ކަމަށް މާތްނަބިއްޔާ ޖިބްރީލްގެފާނަށް ދެންނެވިއެވެ. ޖެހިގެން އައި ދުވަހުވެސް ހަމަ އެ މެސެޖާއިގެން ޖިބްރީލްގެފާނު ވަޑައިގަތުމުން ހަމަ އެ ޖަވާބު ދެއްވިއެވެ. އާއީއްތަ ދުވަހުވެސް ހަމަ އެ މެސެޖާއެކު ޖިބްރީލްގެފާނު ވަޑައި ގަތުމުން މާތް ނަބިއްޔާ ހަމަ އެ ޖަވާބު ދެއްވިއެވެ.

ހިޖްރީ ކަލަންޑަރުން 632 ވަނައަހަރު ރަބީއުލް އައްވަލް މަހުގެ 12 ވަނަ ދުވަސް އަތުވެއްޖެއެވެ. މާތް ނަބިއްޔާގެ ސިއްހީ ހާލުކޮޅު ވަރަށް ގޯހެވެ. އެ ހާލަތުގައިވެސް ގަނޑުވަރުގެ ދޮރިކޮޅު ކުޑަކޮށް އެއްފަރާތް ކޮށް ލެއްވުމަށްފަހު ނަމާދަށް ތިއްބެވި އަސްހާބު ބޭކަލުންނަށް ބައްލަވާ ލެއްވިއެވެ. އަނަސްގެފާނު ވިދާޅުވިއެވެ. އަހަރެމެން ތިބީ ނަމާދަށެވެ. އެކަމަކު ގަނޑުވަރުގެ ދޮރުކޮޅު ހުޅުވިއްޖެކަން އިހްސާސް ކުރެވުމާއެކު މާތް ނަބިއްޔާގެ މޫނުފުޅު ދުށުމުގެ އެދުމުގައި ބޭ އިޚްތިޔާރުގައި އަހަރެމެންނަށް އެފަރާތަކަށް މޫނު އަނބުރާލެވުނެވެ. އެ ހިނދު މާތް ނަބިއްޔާ ދޮރތުކޮޅު ބަންދުކޮށްލެއްވިއެވެ. އެއީ ދިރިދުނިޔޭގައި ހުންނަވާ މި އުންމަތަށް ކުރެއްވި އެންމެފަހުގެ ޒިޔާރަތެވެ.
އެރޭ އޭގެފަހުން ހުރިހާ އަނބިކަނބަލުން ގެންނެވައި ސަލާންކުރައްވައި އަލްވިދާއު ވިދާޅުވިއެވެ. އެހެންނަމަވެސް އެކަލޭގެފާނު ސުވަރުގެ ވަޑައިގަންނަވާ ވަގުތު ކައިރި ވެއްޖެކަމުގެ ޚަބްރެއް ނުދެއްވައެވެ. އޭގެފަހުން އެ މާތް ނަބިއްޔާ އެންމެ ލޯބިފުޅެވެ ވަޑައިގަންނަވާ ދަރިކަނބަލުން ފާތިމާގެފާނު ގެންނެވިއެވެ. އެކަމަނާއާބެހޭގޮތުން ހަދީސްކުރައްވާފައިވެއެވެ. އެކަމަނާ ހިތްދަތިކޮށްފިމީހަކު ތިމަންކަލޭގެފާނުގެ ހިތް ދަތިކޮށްފިއެވެ. އެކަމަނާ ހިތްހަމަޖައްސައިދީފިމީހަކު ތިމަންކަލޭގެފާނު ހިތް ހަމަޖައްސައި ދީފިއެވެ.
އެކަމަނާ ވަޑައިގަތުމުން އަރިހަށް ގެންންނަވައި ބައްޕާފުޅު ސުވަރުގެ ވަޑައިގަންނަވަންވީ ވަގުތު ޖެހުއްޖެކަމަށް ވިދާލުވިއެވެ. އެ ކަމަނާ ވަގުތުން ކީރިތިފުޅުކުރައްވަން ފެއްޓެވުމުން ވަރަށް އަވަހަށް ދެބަފައިން ބައްދަލުވާނެ ކަމުގެ އުފާވެރި ޚަބަރު ދެއްވައި އެކަމަނާ ހިތްހަމަޖައްސަވައި ދެއްވިއެވެ. އެކަމަނާ ސުވަރުގެ ވަޑައިގެންނެވީ އުމުރުފުޅުން އެންމެ 25 އަހަރުފުޅުގައެވެ.
މާތްނަބިއްޔާގެ އާލާސްކަންފުޅުގައި އުފުއްލަވަމުންގެންދެވި ތަކްލީފް ދެކިވަޑައިގެން ފާތިމާގެފާނު ކީރިތި ކުރައްވަމުން ގެންދަވަން ފެއްޓެވުމުން މިއަދަށްފަހު ބައްޕާފުޅަށް އެއްވެސް ވޭނެއް އަދި ތަކްލީފެއް ބަރުދާޝްތުކުރައްވަން ޖެހިވަޑައިނުގަންނަވާނެކަމަށް ހަދީސްކުރެއްވިއެވެ.
ދެން އަލީގެފާނު ގެންނަވައި އެކަލޭގެފާނުގެ މާތް އުނގުފުޅުގައި އަލީގެފާނުގެ އިސްތަށިފުޅު ބޭއްވުމަށްފަހު އިސްތަށިފުޅުގައި ފިރއްވަމުން އެކަލޭގެފާނަށް ހެޔޮ ދުއާ ކުރައްވަމުން ގެންދެވިއެވެ. އެއަށްފަހު އެ މާތް ނަބިއްޔާގެ ހިތުގެ ވިންދު ކަމުގައި ދެކިވަޑައިގަންނަވާ ކާފަދަރިކަލުން ހަސަން އަދި ހުސައިންގެފާނުގެންނަވައި އެ ކަލޭގެފާނުގެ މާތް މޭފުޅުގައި ދެ އަތްޕުޅުން އެ ދެބޭފުޅުން ފިއްތަވައި ލައްވައި ގަދަޔަށް ކީރިތި ކުރައްވަން ފެއްޓެވިއެވެ. އެ މާތް ނަބިއްޔާއަކީވެސް އިންސާނަކަށްވީތީ ހިތުގެ އުދާސްތަކަށް ކެތްކުރެވޭ ގޮތް ނުވީއެވެ. އެއް ދަރިކަލުންނަށް ޒަހަރުދީގެން މަރާލެވިދާ ހިތްދަތި މަންޒަރާއި އަނެއް ދަރިކަލުން އެއްވެސް ރަޙްމެއްނެތި ގަތުކުރެވި އެ މާތް އިސްތަށިފުޅު ލޮންސިއެއްގެ ތުނޑަށް ހަރާލައިގެން އުފުލާ މަންޒަރު ކުރިފުޅުމަތީގައި ހާމަވަމުންދިއުމުން އެ ހިތްދަތިކަމަށް ކެތްކުރެވޭގޮތް ނުވީއެވެ. އެންމެފަހުން އެ ދެބޭފުޅުންވެސް ހިތްހަމަޖައްސަވައި ދެއްވުމަށްފަހު ފޮނުއްވާލެއްވީއެވެ.
އެއަށްފަހު ޖިބްރީލުލް އަމީން ވަޑައިގެން މަލަކުލްމައުތު ވަޑައިގެން ބޭރުގައި ހުންނެވިކަމަށާއި އެތެރެއަށް ވަނުމުގެ އިޒުނައަށް އެދިވަޑައިގަންނަވާކަމަށް ދެންނެވިއެވެ. މާތް ނަބިއްޔާ އިޒުނަ ދެއްވުމުން މަލަކުލްމައުތު އެތެރެއަށް ވެދެވަޑައިގެންނެވިއެވެ. އަރިހުގައި އެހެން މަލާއިކަތަކު ހުންނެވިއެވެ. އެތެރެއަށް ވަޑައިގަތުމާއެކު މަލަކުލްމައުތު މާތްނަބިއްޔާއަށް ސަލާމް ދެނެނެވިއެވެ. އަދި މިހާތަނަށް އެއްވެސް އިންސާނަކަށް ތިމަން މަލާއިކަތާ ސަލާމް ނުކުރާ ކަމަށްވެސް ވިދާޅުވިއެވެ. އަދި ހަމައެފަދައިން އެއްވެސް ތަނަކަށް ވަދެ ނިކުތުމަށް ހުއްދަ ބޭނުމެއްނުވާކަމަށާއި އެހެންނަމަވެސް މާތް ﷲ ގެ އަމުރުފުޅުގައިވަނީ ހުއްދަ ލިބިގެންނޫނީ ކަލޭގެފާނުގެ އަރިހަށް ނުވަނުމަށާއި ދިރިހުންނަވަން ބޭނުންފުޅުވާނަމަ އެނބުރި އައުމަށެވެ. މި އިޚްތިޔާރު މީގެކުރިން އެއްވެސް ދިރިހުރުމަކަށް ލިބިފައި ނުވެއެވެ. އަދި ކުރިއަށް އޮތްތަނުގައި ނުވެސް ލިބޭނެއެވެ.
ހުއްދި ލިބިއްޖެނަމަ ތިމަންކަލޭގެފާނުގެ މަރު ހިއްޕަވާނަންތޯ ދެން މަލަކުލް މައުތަށް ސުވާލު ދެންނެވުމުން އެއީ މާތް ﷲ ގެ އަމުރުފުޅުކަމަށް ޖަވާބު ދެއްވިއެވެ. އެއަށްފަހު ޖިބްރީލްފާނުގެ ބަސްފުޅަކަށް އެދިވަޑައިގެންނެވިއެވެ. އެކަލޭގެފާނު ދެންނެވިއެވެ. މާތް ﷲ ހުންނެވީ ކަލޭގެފާނާ ބައްދަލު ކުރެއްވުމުގެ އިންތިޒާރީގައެވެ.
އަހަރެމެން ކޮންމެ މީހަކު މަރުވެގެންދާއިރު މިފަދަ ބަރަކާތްތެރި މެސެޖެއް ލިބުންއެދި ގަދައަޅާ މަސައްކަތް ކުރާށެވެ.
އެއްދުވަހަކު އަސްހާބު ބޭކަލެއްގެ ގަބުރަށް ޒިޔާރަތްކުރައްވައި މާތް ނަބިއްޔާ މިފަދައިން ދުއާކުރެއްވިކަމަށްވެއެވެ. “ ޔާ ﷲ ގިޔާމަތްދުވަހުން ތަލްހާ އިނބަ ﷲ ގެ ހަޒުރަތަށް ހާޒިރު ކުރެވޭ ދުވަހު އެ އަޅާއަށް އިނބަ ﷲ ހިނިވަރުނަކުރެއްވުން ލިބި ވަޑައިގަތުމާއެކު އެކަލޭގެފާނަށްވެސް ހިނިތުންވުން މިންވަރު ކުރައްވާފާންދޭވެ “ !
މާތް ނަބިއްޔާ އެވަގުތު ޖިބްރީލްގެ ފާނަށް ދެންނެވިއެވެ. ތިމަންކަލޭގެފާނަށްފަހު ތިމަންކަލޭފާނުގެ އުންމަތުގެ ހާލަތާމެދު މާތް ﷲ ގެ ހަޒްރަތުން އޮޅުންފިލުވާ ދެއްވާށެވެ. ޖަވާބުގައި ތިމަން އިލާހު ކަލޭގެފާނުގެ އުންމަތް “ ދޫކޮށް ނުލައްވާނެކަމަށް “ ވަހީ ކުރެއްވިކަމުގައި ޖިބްރީލްގެފާނު ދެންނެވިއެވެ.
އެ ދުވަހު މާތްނަބިއްޔާގެ މި އެދިވަޑައިގަތުން ކުރިއަށް ނުނެރުއްވިނަމަ އިސްލާމީ އުންމަތުގެ މިއަދުގެ ހާލަތާދޭތެރޭ ވަރަށް ފުންކޮށް ވިސްނާލުން ރަނގަޅުވާނެއެވެ. އަދި އެ މާތް ނަބިއްޔާއަށް ސަލަވާތާއި ސަލާމް ލެއްވުން އެދި ގިނައިނައިން ދުޢާ ކުރުން ހުއްޓެވެ.
އިންސާނީ ފިތުރަތުގައިވާ ގޮތުގެމަތިން އެކަލޭގެފާނުގެ އެންމެ ލޮބުވެތި ކާފަދަރިކަލުން ހަސަން އަދި ހުސައިން އާބެހޭގޮތުން އޮޅުންފިލުވަން އެދިވަޑައެއް ނުގަންނަވައެވެ. އޮޅުންފިލުއްވަން ބޭނުންފުޅުވީ މި އުންމަތުގެ ހާލެވެ.
ޖިބްރީލުލް އަމީންގެ މެސެޖަށްފަހު މާތް ﷲ ގެ ތަގްދީރު ތަންފީޒުކުރުމަށް މަލަކުލް މައުތު އަރިހުގައި މާތް ނަބިއްޔާ ދެންނެވިއެވެ. އަދި އެންމެ ފަހުވަގުތުގައި ދެ ކަމަކަށް ބާރު އަޅުއްވައި ނަސޭހަތްތެރިވެ ވަޑައިގެންނެވިއެވެ. ނަމާދަށް ފަރުވާ ކުޑަ ނުކުރާށެވެ. ނަމާދަށް ފަރުވާ ކުޑަ ނުކުރާށެވެ. އެއަށްފަހު ނޯކަރުންނަށް ކަމޭ ހިތުމަށް އަމުރުކުރެއްވިއެވެ. ނަމާދަށް ފަރުވާކުޑަނުރަން ހަދީސްކުރައްވަމުން އައިޝާގެފާނުގެ އުނގުފުޅުގައި އިސްތަށިފުޅު ވެޑުވި މިދުނިއިން ސުވަރުގެ ވަޑައިގަތުމުގެ ދަތުރު ފައްޓަވައިފިއެވެ. އޭގެ ހަމަކުޑައިރުކޮޅެއް ކުރިން އަބްދުއްރަޙްމާން އިބްނު އަބޫބަކުރު ވަޑައިގެންނެވިއެވެ.
އެކަލޭގެފާނުގެ އަތްޕުޅުގައި ބޭނުންނުކުރާ މިސްވާކެއް އޮތެވެ. ދަތްތައް ސާފުކުރުމަށްޓަކައި މާތް ނަބިއްޔާ ވަރަށް ގިނައިން މިސްވާކް ބޭނުންފުޅުކުރައްވައެވެ. އަބްދުއްރަޙްމާން އިބްނު އަބޫބަކުރުގެ އަތްޕުޅުން މިސްވާކް ފެނިވަޑައިގުމުން މާތް ނަބިއްޔާ އެއަށް ބައްލަވަމުން ގެންދެވިކަން އައިޝާގެފާނަށް ފެނިވަޑައިގަތެވެ. އަދި އެކަލޭގެފާނު މިސްވާކަށް އެދިވަޑައިގަންނަވާކަންވެސް ވިސްނި ވަޑައިގަތެވެ.
އެ ހިނދު ބޭބޭފުޅުއަތުން އެ މިސްވާކް ގެންނަވައި އެކަމަނާގެ ކުޅުން ތެންމާލެއްވުމަށްފަހު މާތް ނަބިއްޔާގެ ދަތްތައް ސާފުކޮށްދެއްވިއެވެ. އައިޝާގެފާނު ވިދާޅުވިކަމަށްވެއެވެ. މާތް ނަބިއްޔާގެ އަނގަފުޅުގައި އެންމެ ފަހުން ތިމަންކަމަނާގެ ކުޅު ބީހުމާއި ތިމަންކަމަނާގެ ކަނދުރާއާއި މޭފުޅާ ދެމެދުގައި މާތް ނަބިއްޔާގެ އެންމެފަހު ވަގުތު ހޭދަކުރެއްވުމަށްވުރެން މަތިވެރި ފަޚުރެއް އަދި ޝަރަފެއް ލިބި ވަޑައި ނުގަންނަވައެވެ.
އެންމެ ފަހު ބަސްފުޅަކަށްވެސް ނަމާދަށް ފަރުވާ ކުޑަ ނުކުރާށެވެ. އެއަށްފަހު ނޯކަރުންނަށް ކަމޭ ހިތުމަށް އަމުރުކުރެއްވިއެވެ. ދެން ނަމާދަށް ފަރުވާކުޑަނުރަން ހަދީސްކުރައްވަމުން އައިޝާގެފާނުގެ އުނގުފުޅުގައި އިސްތަށިފުޅު ވެޑުވި މިދުނިޔެ ދޫކުރައްވައި މާތް ﷲ ގެ ހަޒްރަތަށް ވަޑައިގަތުމުގެ އެދުންފުޅު ހާމަކުރެއްވިއެވެ. އެ ހިނދު ޖިބްރީލުލް އަމީންވެސް ހިތާމަފުޅޚުކުރައްވައި ދެންނެވިއެވެ. ޔާ ރަސޫލަ ﷲ މިއަދަށްފަހު ތިމަންކަލޭގެފާނުވެސް ދެން މިދުނިޔެއަށް ދުވަހަކުވެސް ނާންނަހުށީމެވެ.
ނުނިމޭ …