ނިރުބަވެރިން ހޯދުމުގެނަމުގައި ހިންގި އޮޕަރޭޝަނެއްގައި ފުލުހުން ގެއެއް ބަލައި ފާސްކުރުމުގެ ތެރޭގައި ފުލުހުންގެ ފަރާތުން އަނިޔާ ލިބުނު 12 އަހަރުގެ މުސްތަފާއަށް ނިދުމަށް އުދަގޫވާތީ  މިހާރުދަނީ ފަރުވާކުރަމުންނެވެ. 

ނޮވެންބަރު 9ވަނަ ދުވަހު ވިއެނާ ފުލުހުން ހިންގި ”އޮޕަރޭޝަން ލަކްސް“ ކިޔާ ހަރަކާތެއްގައި 60 ގެއެއް ބަލައި ފާސްކޮށް 30 އަށްވުރެ ގިނަ މުސްލިމު އެކްޓިވިސްޓުންނާއި އިލްމުވެރިން ހައްޔަރު ކުރިއެވެ. އެމީހުންނަށް ތުހުމަތު ކުރަނީ ނިރުބަވެރި ޖަމާއަތްތައް ހިންގުމާއި, ނިރުބަވެރިންނަށް މާލީ އެހީ ދިނުމާއި, ރާވައިގެން ޖަރީމާ ހިންގުމާއި, ވަގު ފައިސާ ލޯންޑަރ ކުރުމެވެ. 

އާންމު ރައްޔިތުންނަށް އެގޭ ގިނަމީހުންނަކީ ނިރުބަވެރިންގެ ގޮތުގައި ލޭބަލްކޮށް, އެމީހުން ހައްޔަރުކުރުމުގައި އެކަށީގެންނުވާ ބާރު ބޭނުންކޮށްފައިވާތީ މުޖުތަމަޢުގެ ތަފާތު ދާއިރާތަކުގެ ނުރުހުންވަނީ ފުލުހުންނަށް އަމާޒުވެފައެވެ. ވަރަށްގިން ޖަމާއަތްތަކުންނާއި, ނޫސްވެރިންނާއި ލިޔުންތރިން މި މައްސަަލަ ވީހާވެސް އަވަހަކަށް ޢަންމުންނަށް އޮޅުންފިލުވައިދިނުމަށް ދަނީ ގޮވާލަމުންނެވެ.  

ފުލުހުން އާދަޔާއި ޚިލާފު ބާރު ބޭނުންކުރުމުގެ ސަބަބުން ހައްޔަރުކުރި މީހުންގެ ޢާއިލާގެ މެންބަރުންނަށް ވަނީ ނަފްސާނީގޮތުން ވަރަށްބޮޑަށް އަސަރުކޮށްފައެވެ. 

އެ އޮޕަރޭޝަނަށްފަހު 10 ކުދިންނަށްވުރެ ގިނަކުދިން ދަނީ ނަފްސާނީ ފަރުވާ ހޯދަމުންނެވެ. ހައްޔަރު ކުރި 30 މީހުންގެ އެކައުންޓުތައް ގަނޑުކޮށްފައިވާތީ, ވޭތުވެދިޔަ ދެމަސް ދުވަހުގެ ތެރޭގައި އެ 30 މީހުންނާއި, އެމީހުންގެ ޢާއިލާތަކުން ދަނީ މާލީ ދަތިތައް ތަހައްމަލް ކުރަމުންނެވެ.