ގައްޒާގައި ބައިނަލް އަގްވާމީ ލަޝްކަރެއް ގާއިމު ކުރުމަށާއި އަދި ފަލަސްތީނުގެ މިނިވަން ދައުލަތެއް ގާއިމްކުރަން މަގުފަހިކޮށްދިނުމާއި ވަގުތީގޮތުން ގައްޒާގައި ސަރުކާރެއް އެކުލަވާލުން ލާޒިމްކޮށް ޔުނައިޓެޑް ނޭޝަންސްގެ ސެކިއުރިޓީ ކައުންސިލުން މިއަދު ގަރާރެއް ފާސްކޮށްފިއެވެ.
މިއީ ފާހަގަކުރެވޭ 20 ނުކުތާގެ މައްޗަށް ބިނާކޮށް އެމެރިކާގެ ރައީސް ހުށައަޅުއްވާފައިވާ ގަރާރެކެވެ. އެމެރިކާގެ ގަރާރަށް 13 މެމްބަރުން އާނ ބަސް ދެއްވިއިރު ރަޝިޔާއާއި ޗައިނާއިން ތިބީ ހަމަހިމޭނުންނެވެ. އެމެރިކާގެ ގަރާރާ ބެހޭ ގޮތުން ރަޝިޔާއާއި ޗައިނާ އަދި ފަލަސްތީނާއި ބައެއް އެހެން ގައުމުތަކުން ބުނެފައިވަނީ އެ ގަރާރުގެ ސަބަބުން ފަލަސްތީނުގެ މައްސަލަ ދިގު އަހަރުތަކަކަށް ދެމިގެން ދިއުމުގެ ބިރުވެރިކަން އެބަ އޮތް ކަމަށެވެ. އެހެންނަމަވެސް އަރަބިންގެ ބާރުގަދަ ގައުމުތަކުން އެމެރިކާގެ ގަރާރަށް ވަނީ ރުހުން ދީފައެވެ.
ފަލަސްތީނުގެ މިނިވަން ދައުލަތެއް އުފެއްދުމާ ބެހޭގޮތުން އެމެރިކާގެ ގަރާރުގައި ބުނެފައިވަނީ “ ހުޅަނގު އައްސޭރީގައި މިވަގުތު ހަރަކާތްތެރިވަމުން ގެންދާ ބަލިކަށި ސަރުކާރަށް އަމިއްލަ ގައުމެއްގެ ސަރުކާރެއް ހިންގުމުގެ ގާބިލުކަން ލިބިގަނެ އަދި ގައްޒާގެ އަލުން އިމާރާތްކުރުމުގެ ކަންތައް ކުރިއާށް ގެންދާ ގޮތެއްގެ މައްޗަށް ރިއާޔަތްކުރުމަށްފަހު ފަލަސްތީނުގެ މިނިވަން ދައުލަތެއް އުފެއްދުމުގެ މަގު އަމާންކުރުމުގެ މަސައްކަތް ފެށިދާނެއެވެ.
މިކަހަލަ ފަނޑު އިބާރާތަކުންނެވެ. އެހެންނަމަވެސް އެ ގަރާރު ފާސްވެގެން ދިޔައީ މި ނުކުތާއަށް ގެނެސަފއިވާ ބަދަލަކާ އެކުގައެވެ. ފާސްކުރެވުނު ގަރާރުގައި އެ ޖުމްލަ މިހާރު އޮތީ “ ފަލަސްތީނުގެ މިނިވަން ދައުލަތެއް އުފަން ކުރުމަށް އިތުބާރުކުރެވޭ މަގުޗާޓެއް އެކުލެވިގެންދާނެއެވެ. “ މިހެންނެވެ.
މިކަހަލަ ބައެއް ބަދަލުތައް ގެނެސްފައިވާ ނަމަވެސް ދެންވެސް ފަލަސްތީން އަނެއްކާވެސް އެހެން ބާރެއްގެ އިސްތިއުމާރުގެ ދަށަށް ދޫކޮށްލެވެނީކަން ދޭހަވާގޮތަކަށް ގިނަބަޔަކުގެ ފާޑުކިއުން އަމާޒު ކުރެވެމުންދާ ކަމަށްބުނެ އަލްޖަޒީރާގެ ގަބްރިއެލް އެލިޒޮންޑޯ ނިއު ޔޯރކުން ރިޕޯރޓް ކޮށްފައި ވެއެވެ. އަދި ފަލަސްތީނުގެ މައްސަލާގައި އިސްރޯލެއް އަދާކުރަން ރައީސް ޓްރަމްޕްގެ ދަނބިދަރި ޖާރެޑް ކުޝްނަރގެ ޙައިސިއްޔަތާ ދޭތެރޭވެސް ސުވާލު އުފައްދަމުން ގެންދާކަމަށް ވެއެވެ.
މީގެކުރިން ހަމަ މިމޭރުމުން ރަޝިޔާއިންވެސް ވަނީ ގަރާރެއް ހުށައަޅާފައެވެ. އެގަރާރު އެމެރިކާއިން ވީޓޯކޮށް ސެކިއުރިޓީ ކައުންސިލުން ބޭރުކޮށްލާފައިވަނީ ފަލަސްތީނުގެ މިނިވަން ދައުލަތެއް އުފެއްދުމަށް ބާރުއަޅާފައިވާލެއް ބޮޑުކަމުންނެވެ.
އެމެރިކާގެ ގަރާރުގައި ބުނެފައިވާފަދައިން ފަލަސްތީނުގެ މިނިވަން ދައުލަތެއް އުފަންކުރުމަށް ޔުނައިޓެޑް ނޭޝަނުން ފާސްކޮށްފިނަމަ ޕެލަސްޓްއިން އޮތޯރިޓީގެ ހުރިހާ ސިޔާސީ ބޭފުޅުން މަރާލާނެކަމަށް އިސްރާއީލުގެ ގައުމީ ސަލާމަތާބެހޭ ވަޒީރު އިތަމަރް ބެން ގުވިރް ވަނީ އިއުލާން ކޮށްފައެވެ.
އިސްރާއީލުގެ ގައުމީ ސަލާމަތާބެހޭ ވަޒީރު ބެން ގުވިރުގެ މި ހާމަކުރުމާ ގުޅިގެން ބައެއް މީޑިއާތަކުން ބުނެފައި ވަނީ ދުނިޔޭގެ އެއްވެސް ގައުމެއްގެ ސިޔާސީ އިސްމަގާމެއްގައި ހުރިމީހަކު މިބާވަތުގެ ވާހަކައެއް ދައްކައިފިނަމަ މީޑިއާތައް އެމީހަކާ ދެކޮޅަށް ކެކި އުތުރި އަރާނެކަމަށެވެ. އެހެންނަމަވެސް އިސްރާއީލުގެ ވެރިޔަކު އެހެން ބުނުމާއި އެއަށް އަމަލުކުރުން ދުނިޔޭގެ ބާރުގަދަ މީޑިއާތަކުން ދެކޭނީ ޓެރަރިޒަމާ ދެކޮޅަށް އިސްރާއީލުން އެޅި ފިޔަވަޅެއްގެ ގޮތުގައެވެ. މިއީ މިއަދު މީޑިއާގެ މުނާފިގުކަން ހުރި މިންވަރެވެ.
އެމެރިކާއިން ހުށައެޅި ގަރާރު ފާސްވުމާއި އެކުގައި އެ ގަރާރުގައި ބުނެފައިވާ ބައިނަލް އަގްވާމީ ލަޝްކަރުގައި ބައެއް އިސްލާމީ ގައުމުތަކުން ބައިވެރިވުމުގެ އެދުން ވަނީ ފާޅުކޮށްފައެވެ.
ސެކިއުރިޓީ ކައުންސިލުން ފާސްކުރި ގަރާރާ ބެހޭގޮތުން ވާހަކަފުޅު ދައްކަވަމުން ގައްޒާ އަލުން އިމާރާތް ކުރެވި ތަރައްގީގެ މަގުގައި ކުރިއަށް ދިއުމާއެކު އިސްރާއީލަށްވެސް އަމާންކަމާއެކު ދެމިތިބެވޭނެ ދުވަސް ދެކެން ބޭނުންވާކަން ދޭހަވާ އިބާރާތަކުން ޔޫ އެން ގައި ހުންނަވާ އެމެރިކާގެ ސަފީރުގެ ޝުއޫރުތައް ހާމަކުރައްވާފައި ވެއެވެ.
ފާސްކުރެވިގެންދިޔަ ގަރާރާބެހޭ ގޮތުން ވާހަކަފުޅު ދެއްކެވި އަލްޖީރިއާގެ ސަފީރު ވިދާޅުވެފައިވަނީ ފަލަސްތީނުގެ މައްސަލައަށް ދާއިމީ ސުލްޙަވެރި ޙައްލެއް ގެނައުމްށްޓަކައި ފަލަސްތީނުގެ ރައްޔިތުންގެ ދިގު އިންތިޒާރަށް އަދުލުވެރި ނިމުމެއް ގެނެސް ފަލަސްތީނުގެ މިނިވަން ދައުލަތެއް ވުޖޫދު ކުރެވެން ޖެހޭނެކަމަށެވެ. އަދި މިކަމުގައި އެމެރިކާގެ ރައީސް ޑޮނާލްޑް ޓްރަމްޕް ގެންގުޅުއްވާ ސިޔާސަތު ބަލާގަންނަކަމަށް ވިދާޅުވެ ވާހަކަފުޅު ދައްކަވާފައި ވެއެވެ.
އެމެރިކާއިން ހުށައެޅި ގަރާރު ވޯޓަށް އެހުމާ ކައިރިވެގެން އައިއިރު އެމެރިކާއާއި ބައެއް އެހެން ގައުމުތަކުން ނޭވާ ހިފާއްޓާލައިގެންތިބީ ޔޫ އެން ސެކިއުރިޓީ ކައުންސިލްގެ އެންމެ ބާރުގަދަ ގައުމުތަކުގެ ތެރޭގައި ހިމެނޭ ރަޝިޔާއިން އެ ގަރާރު ވީޓޯކޮށް ބޭރުކޮށްލާފާނެ ކަމަށް ބެލެވިފައި ވާތީއެވެ.
ސެކިއުރިޓީ ކައުންސިލްއިން އެ ގަރާރު ފާސްކުރުމާއި ގުޅިގެން އެ ގަރާރުގައި ހުޅަނގު އައްސޭރީގެ ސަލާމަތާއި ރައްކާތެރި ކަމުގެ ވާހަކަ ބުނެފައިނެތް ކަމުގައިވިޔަސް އެ ގަރާރު ތަންފީޒު ކުރުމުގައި ގައްޒާއެކޭ އެއްފަދައިން ހުޅަނގު އައްސޭރީގެ ސަލާމަތާ ރައްކާތެރިކަން ކަށަވަރު ކުރެވެން ޖެހޭނެ ކަމަށް ރަޝިޔާއިންވަނީ އާންމު ޢިއުލާނެއް ނެރެފައެވެ.
އެމެރިކާއިން ހުށައެޅި ގަރާރުގައި ދެން ޚާއްސަކޮށް ފާހަގަކޮށްލެވޭ އަނެއް ނުކުތާއަކީ ގައްޒާގައި ޙަރަކާތްރިވާ ބައިނަލް އަގްވާމީ ލަޝްކަރުތަކުން މިސްރާއި އިސްރާއީލާއެކު ކުރެވޭ މަޝްވަރާތަކުގެ އަލީގައި ފަލަސްތީނުގެ ފުލުހުން ތަމްރީނު ކުރުމާއި އަދި ގައްޒާގެ ސެކިއުރިޓީ ބެލެހެއްޓުން ފަލަސްތީނުގެ ފުލުންނާ ޙަވާލުކުރުން ހިމެނިފައިވުމެވެ. އަދި ގައްޒާގައި ޙަރަކާތްތެރިވަމުން ގެންދާ ހަތިޔާރުއެޅި ޖަމާޢަތްތަކުގެ ހަތިޔާރުތައް އަތުލައި ގައްޒާއަކީ ހަނގުރާމަވެރި އެއްވެސް ޙަރަކާތެއް ހިންގުން ހުއްދަ ނުކުރާ ސަރަހައްދަކަށް ހެދުމުގެ ބާރު އެ ލަޝްކަރުގެ މެންޑޭޓްގައި ވަނީ ހިމަނާ ފައެވެ. އަދި އިސްރާއީލުގެ ސިފައިންވެސް ގައްޒާއިން ފައިބަންޖެހޭނެއެވެ. ގައްޒާއަކީ ރައްކާތެރި ސަރަހައްދެއްކަން ކަށަވަރު ކުރުމަކީ އެމެރިކާގެ ޒިންމާއެއް ކަމުގައި ބުނެފައިވެއެވެ.
ގައްޒާގެ ސެކިރިޓީ ކަށަވަރުކުރުމަށް އެކުލަވާލެވޭ ބޯޑުގައި ދުނިޔޭގެ އެންމެ ބާރުގަދަ ސިޔާސީ ލީޑަރުންނާއި ރައްޔިތުންގެ އިޙުތިރާ ލިބިވަޑައިގެންތިއްބެވި ބޭފުޅުން ތަމްސީލު ކުރައްވާނެކަމަށް ރައީސް ޑޮނާލްޑް ޓްރަމްޕްގެ ދަ ޓުރުތު ޕްލެޓްފޯމްގައި ވަނީ ޕޯސްޓްކުރައްވާފައެވެ. އަދި އެ ގަރާރަށް ތާއީދު ކުރެއްވި އިސްލާމީ ގައުމުތަކަށް ޝުކުރުވެރިވާ ކަމަށް ވިދާޅުވެފައި ވެއެވެ.
އެ ގައުމުތަކުގެ ތެރޭގައި ޢަރަބް ސަޢޫދީ އާއި ގަތާރާއި، މިސްރު އަދި ތުރުކީއާއި އިނޑޮނޭޝިޔާއާއި އެމިރެޓްސް އަދި ޖޯރޑަން ޚާއްސަގޮތެއްގައި ފާހަކަ ކުރައްވާފައި ވެއެވެ.
