އިސްރާއީލުން ހައްޔަރުކޮށްފައިތިބި ހަމާސްގެ މުޖާހިދުންނަށް މަރުގެ އަދަބު ދިނުމަށްޓަކައި މަގުފަހިކުރުމުގެ ގޮތުން އިސްރާއީލުގެ ގާނޫނުލް އުގޫބާތު އިސްލާހުކުރުމުގެ މަސައްކަތް އެ ގައުމުގެ ޕާރލަމެންޓުގައި އެބަ ކުރިއަށް ގެންދާކަމަށް ދަ ޓެލިގްރާފުން ރިޕޯރޓް ކޮށްފިއެވެ. ގާނޫނުލް އުގޫބާތަށް ގެންނަން ބޭނުންވާ އިސްލާހު ދެލިކޮޕީ ތައްޔާރު ކޮށްފައިވަނީ އެގައުމުގެ ސިޔާސީ މައިދާނުގައި ހަރަކާތްތެރިވަމުން އަންނަ ލެމޯރ ސޮން ހާރް މެލެޚް ކިޔާ އަންހެނެކެވެ.

އޭނާގެ ފިރިމީހާ ވަނީ 2003 ގައި ފަލަސްތީނާ ދެކޮޅަށް އިސްރާއީލުން ހިންގި ހަނގުރާމައިގާ މަރާލާފައެވެ. އޭނާގެ ފިރިމީހާ މަރާލުމާގުޅިގެން ހައްޔަރުކޮށްފައިވާ ފަލަސްތީނުގެ 2 މުޖާހިދުން އެންމެފަހުން އަސީރުން ބަދަލުކުރުމުގެތެރޭގައި މިނިވަންކޮށްފައިވާތީ އެ ކަމުގެ ރުޅިގަނޑުވެސް ދެލިކޮޕީ ތައްޔާރުކުރުމުގައި ބާލާފައިވާކަމަށް ބެލެވެއެވެ.
ލެމޯރ ސޮން ހާރް މެލެޚް ހިމެނިފައިވަނީ އިތާމަރ ބެން ގްވިރްގެ ޕާރޓީއަށެވެ. އަދި އޭނާއަކީ ފަލަސްތީނުގެ ރައްޔިތުންނާމެދު އާދަޔާ ޚިލާފް ރުޅިވެރިކަމެއް ގެންގުޅޭ ނުލަފާ އަންހެނެއްގެ ގޮތުގައި އިނގިރޭސި ވިލާތުންވެސް ވަނީ ސިފަކޮށްފައެވެ. ދާދިފަހުންވެސް ވިހަން ތައްޔާރުވެފާއިން ފަލަސްތީނުގެ މާބަނޑު އަންހެނަކު ޝަހީދުކޮށްލައި އޭނާގެ ބަނޑުގައި އޮތޮ ދަރިފުޅު ނެގުމަށްފަހު އެ ދަރިފުވެސް ޝަޙީދު ކޮށްލި ކަމަށްވެއެވެ. އޭނާގެ ހަރުކަށި ކަމާއި އިންސާނިއްޔަތާ ޚިލާފް ގިނަކަންތައްތަކެއް ކުރަމުން ގެންދިއުމުގެ ސަބަބުން އިނގިރޭސި ވިލާތުންވެސް އޭނާ ވަނީ ކަޅުލިސްޓް ކޮށްފައެވެ.

އިސްރާއީލުގެ ގާނޫނުލް އުގޫބާތަށް ގެންނަން މިއުޅެނީ ބައިނަލް އަގްވާމީ ގާނޫނުތަކާ ފުށޫ އަރާ އަދި އިންސާނީ ކަރާމަތާ އިދިކޮޅު އިސްލާޙުތަކެއް ނަމަވެސް އެގައުމުގެ ސަލާމަތާބެހޭ ވަޒީރު އިތާމަރ ބެން ގްވިރް ވަނީ ތާއީދުކޮށް މަރުހަބާ ކިޔާފައެވެ. އެ ގާނޫނު ފާސްކުރުމާއެކު ސިޔާސީ ދެކޮޅުވެރިކަމުގެ ތެރޭގައި ހައްޔަރުކުރެވޭ ފަލަސްތީނުގެ ރައްޔިތުންނަށް މަރުގެ އަދަބުދިނުން ލާޒިމް ކުރާނެއެވެ. އަދި ހަނގުރާމައިގެ އަސީރުން ބަދަލުކުރުމުގައި އޮކްޓޯބަރ 7 ވަނަ ދުވަހުގެ ހަމަލާއާއި ގުޅިގެންހައްޔަރުކުރެވިފައިވާ އެއްވެސް ފަލަސްތީނީ އަކު މިނިވަންކުރުންވެސް ނުހިމެނޭނެއެވެ.

ފަލަސްތީނުގެ ބިމުގައި އިސްރާއީލުގެ ސިފައިންނާއި އަދި އާންމު ރައްޔިތުން ހިންގަމުން ގެންދާ އަނިޔާވެރި އުދުވާންތަކުގައި އިސްރާއީލުން ފަލަސްތީނުގެ ރައްޔިތަކު ޝަހީދުކޮށްލުމަކުން އެމީހާގެ މައްޗަށް އެ ގާނޫނު ނުހިނގާނެ ކަމަށް ބުނެފައިވެއެވެ.
ޕާރލަމެންޓުގައި އެބިލްގެ ފުރަތަމަ ކިއުން މިދިޔަ ހޯމަދުވަހު ބޭއްވުނު ކަމަށާއި 39 ވޯޓުގެ ތާއީދާއެކު ބިލްގެ ބަހުސް ކުރިއަށްގެންދަން ވަނީ ފާސްކޮށްފައެވެ. އިދިކޮޅަށް 16 ވޯޓު ދީފައިވެއެވެ. ބަހުސް ކުރިއަށް ގެންދަން ފާސްވުމުގެ އުފަލުގައި މެމްވަރުންނަށް ބެން ގްވިރް، ބެކްލަވާ ( އިސްރާއީލުގައި ވަރަށް ޚާއްސަ ފޮނިކާއެއްޗެއް ) ބެހިކަމަށްވެއެވެ.
ބިލާ ދެކޮޅަށް ވޯޓުދިން މެމްބަރުން ހާމަކޮށްފައިވާގޮތުގައި އެބިލް ގާނޫނަކަށް ވުމަށްޓަކައި އިތުރު 2 މެމްބަރުންގެ ވޯޓު ބޭނުންވާނެއެވެ. އަދި އެ ބިލް ގާނޫނަކަށް ވެއްޖެނަމަ އިސްރާއީލަށް އިތުރު ނުރައްކާ ކުރިމަތިވުމުގެ ބިރު މާ ބޮޑުކަންވެސް އެމެމްބަރުން ހާމަކޮށްފައިވެއެވެ.
މިހާތަނަށް ލިބިފައިވާ ޚަބަރުތަކަށް ބަލާއިރު ސިޔާސީ ފަރާތްތަކުން ކިތަންމެ ވަރަކަށް ފިއްތުން ކުރިމަތި ކުރުވި ނަމަވެސް އިސްރާއީލުގެ ސެކިއުރިޓީ ޚިދުމަތްދޭ ފަރާތްތަކުން އެފަދަ ގާނޫނަކަށް އެއްބަސް ނުވާކަމަށް ބުނެފައިވެއެވެ.
އިސްރާއީލުގެ ގަނޫނުލް އުގޫބާތުގައި މިހާރުވެސް މެރުން ވަނީ ހުއްދަ ކޮށްފައެވެ. އެކަމަކު މިހާތަނަށް އެ ގާނޫ ތަންފީޒު ކުރެވިފައިވަނީ ހަމައެކަނި ނާޒީ ޖަރުމަނުގެ އެޑޯލްފް އައިޚްމަންގެ މައްޗަށެވެ.
މިހާރު ހުށައަޅާފައިވާ އިސްލާހަށް ބޮޑުވަޒީރު ނަތަންޔާހޫ ފުރަތަމަ އެއްބަސް ނުވާކަމަށާއި އެހެންނަމަވެސް އިތާމަރ ބެން ގްވިރް ސަރުކާރުން ވަކިވާނެކަމުގެ އިންޒާރު ދިނުމުން ނަތަންޔާހޫ އެއްބަސްވީ ކަމަށް މީޑިއާތަކުގައި ބުނެފައި ވެއެވެ.
މިހާރު ހުށައަޅާފައިވާ ދެލިކޮޕީއާ އެއްގޮތަށް ގާނޫނުލް އުގޫބާތު ފާސްވިޔަސް މަރުގެ އަދަބު ދިނުމަށްޓަކައި ޝަރުއީ ކޯޓުތަކުން ހުރިހާ ފަނޑިޔާރުން އިއްތިފާގުވުން ލާޒިމްކުރާނެކަމަށްވެސް ޚަބަރުތަކުގައި ބުނެފައި ވެއެވެ. އެހެންނަމަވެސް މިލިޓްރީ ކޯޓުގެ ފައިސަލާގައި އަޣްލަބިއްޔަތުގެ މައްޗަށް ބިނާކޮށް މަރުގެ އަދަބު ދެވޭނެއެވެ.
ފަލަސްތީނުގެ ޚާރިޖީ ވުޒާރާއިން ބުނެފައިވަނީ އިސްރާއީލުގެ ގާނޫނުލް އުގޫބާތަށް ގެންނަން އުޅޭ ބަދަލުގެ ސަބަބުން އިސްރާއީލުގެ އަދިވެސް އިތުރަށް ފަޟީހަތްވެ އެގައުމުގެ އަނިޔާވެރިކަން ދުނިޔެއަށް ހާމަވެގެންދާނެއެވެ. މިވަގުތުގައިވެސް އިސްރާއީލުގެ ޖަލުތަކުގައި ފަލަސްތީނުގެ އަންހެނުންނާއި ކުޑަކުދިންވެސް ހިމެނޭ ގޮތުގައި ދިހަ ހާހަށްވުރެން ގިނަމީހުން ހައްޔަރުކޮށްފައި އެބަތިއްބެވެ.