މިއަހަރު މޭހަމުގެ ތެރޭއާއި ހިނގާދިޔަ އިންޑިއާ އާއި ޕާކިސްތާނުގެ ދެކޮޅުވެރި ހަމަލާތަކަށްފަހު ފުރަތަމަފަހަރު އިންޑިއާގެ ސިކުން ޕާކިސްތާނުގައި ހުންނަ އެ މަޒުހަބުގެ މުގައްދަސް ތަންތަނަށް ޒިޔާރަތް ކުރުމުން ސާފުކޮށްފައިވާ މަގުތަކުގައި ދިދަފަތި ދަމައި އަދި ދިއްލާފައިހުރި ކުލަބޮކިތަކުން ޒީނަތްތެރިކޮށް އެމީހުންނަށް މަރުހަބާ ކިޔައި ސިޔާސީ ވާދަވެރިކަމުގައި ރައްޔިތުންގެ ގުޅުމެއް ނެތްކަން ހާމަކޮށްދީފިއެވެ

.
ސިކުން ގަބޫލުކުރާގޮތުގައި އެމީހުންގެ މަޒުހަބުގެ ބާނީ ގުރޫ ނާނަކް އުފަންވެފައިވަނީ މީގެ ގާތްގަނޑަކަށް 550 އަހަރު ކުރިން 1469 ވަނައަހަރު އޭޕްރިލް މަހު 15 ވަނަދުވަހު އޭރުގެ ނަމުން ޕާކިސްތާނުގެ ރާއި ބޯލް ތަލްވާންޑި އަވަށުގައެވެ. މިހާރު އެ އަވަށަށް ނަންދެވިފައިވަނީ ލާހޯރް ޕްރޮވިންސުގެ ނާންކާނާ ސާހިބު އެވެ.
އަހަރެމެން ތިބީ ޕާކިސްތާނުން އަހަރެމެންނާ ދޭތެރޭ ކަންތައް ކޮށްފާނެ ގޮތެއް ނޭންގޭތީ ބަރަށް ކަންބޮޑުވެފައިކަމަށް އިންޑިއާއިން ޕާކިސްތާނަށް ޒިޔާރަތްކުރި އުމުރުން 46 އަހަރުގެ އިންދަރޖީތު ކައުރު އެސޯޝިއޭޓެޑް ޕްރެސް އަށް ކިޔާދީފައި ވެއެވެ. އެކަމަކު ޕާކިސްތާނުން އަހަރެމެންނާ ބައްދަލުކުރީ އެކުވެރިކަމާއި ހިނިތުންވުމުގެ މޫނުތަކެކެވެ. ދެ ގައުމު ވަކިކުރާ އިންފާރު މެނުވީ އަހަރެމެންގެ ހިތްތައް ދުރު ނުކުރެއެވެ. ކުރެވެމުންދަނީ އެތައް އަހަރަކަށްފަހު އަނެއްކާވެސް އަހަރެމެންނަކީ އެއްބަޔަކަށް ވުމުގެ އިހްސާސްތަކެވެ. ޕާކިސްތާނުން އަހަރެމެންނަށް ލިބެނީ ލޯތްބާއި އަޅާލުމެވެ. އިންދަރްޖީތު ކިޔާދިނެވެ.
މަޒާރުގެ ބޭރުގައި މުހަންމަދު ބަޝީރު އޭނާގެ ކާފަ ދަރިއަކު ގޮވައިގެން މިހާތަނަށް ދުވަހަކުވެސް ބައްދަލުނުވާ ކޮންމެވެސް މީހެއްގެ އިންތިޒާރުގައި ބަލަބަލާ ހުއްޓެވެ. އެއީ ޝަރުދާ ސިންގް އެވެ. އޭނާގެ ބައްޕައާއި މުހަންމަދަކީ ވަރަށް ގާތް ދެ އެކުވެރިންނެވެ. ދެ ގައުމު ބައިބައި ވެގެން ދިއުމަށްފަހު ދުވަހަކުވެސް ބައްދަލު ވެފައެއް ނުވެއެވެ. އެހެންނަމަވެސް ދެމީހުންވެސް އެކަކު އަނެކަކުގެ ހާލު ބަލާ ހަދައެވެ.
އެއްވެފައިވާ މީސްތަކުންގެ ތެރެއިން ޝަރުދާ ސިންގ ފެނުމާއެކު ދެމީހުންގެ ލޯ އެކަކު އަނެކަކު ފާހަގަ ކޮށްފިއެވެ. ބައްދަލުވުމުން ދެމީހުންނަށްވެސް ހިފޭއްޓުމެއްނެތި ރޯން ފެށުނެވެ. އެކަކު އަނެކަކާ ބައްދަލު ވުމުގެ ނަސީބު ލިބުމުގެ ކުރިން މަރުވެދާނެކަމުގެ ހިތާމަތައް ކަރުނާއާއެކުވެގެން މޫނުމައްޗަށް އޮހެމުން ދިޔައެވެ. އެކުވެރި ރަހްމަތްތެރިކަމުގައި ގައުމުގެ އިންފާރެއް ނެތްކަން ދައްކުވައި ދިނެވެ.
ރަސްމީ ދާއިރާއިން ހާމަކޮށްފައިވާ މައުލޫމާތުތަކަށް ބަލާއިރު ނާނަކާނާ ސާހިބުގައި ހުންނަ ގުރޫ ނާނަކްގެ މަޒާރަށް ސާޅީސް ހާސް މީހުން ވަނީ ޒިޔާރަތް ކޮށްފައެވެ. ގުރޫ ނާނަކް ސާހިބުގެ މަޒާރުގައި ސިކުންގެ މުގައްދަސް މެރީގޯލްޑް ފްލާވަރ ނުވަތަ ދިވެހިން ކިޔާ ސަނދުބަރަކާ މަލުން ޒީނަތްތެރި ކުރެވިފައިވާއިރު ސިކުންގެ މަޒުހަބަށް ނިސްބަތްކުރެވޭ ރާގުތަކުން އެ ސަރަހައްދު ވަނީގުގުމާލާފައެވެ. ފިރިހެނުންނާއި އަންހެނުން އަމާންކަމާއެކު އަޅުކަން އަދާކުރަމުން އެކަމަށް ޚާއްސަކުރެވިފައި ފެންގަނޑުން ފެންވަރަމުން ގެންދިޔައެވެ.
މުސްކުޅި ކުރައްވާފައިވާ ބޭންކަރ އުމުރުން 66 އަހަރުގެ ހަރްޖިންދަރ ޕާލް ބުނެފައި ވެއެވެ. އިންޑިއާއި ޕާކިސްތާނުގެ ދެކޮޅުވެރިކަން ކިތަންމެ ބޮޑުކަމުގައިވިޔަސް މިތަނުގައި އަހަރެމެންނަށް އޮތީ އަމާންކަމެވެ. އެއްވެސް ކަމަކާ ޖެހިލުން ވުމެއް ނެތެވެ. ދިއްލީގައި އަހަރެމެން ގުރޫ ނާނަކްގެ އުފަންދުވަސް ފާހަގަކުރުމެކޭ މިތަނުގައި ފާހަގަކުރުމެކޭ އެއްވެސް ތަފާތެއް އިހްސާސް ނުކުރެވެއެވެ. ދެ ގައުމުގެ ރައްޔިތުން ގެންދިޔައީ އެކުވެރިކާއި ރަޙްމަތްތެރިކަން ބަދަހި ކުރަމުން އެކުގައި ފޮޓޯ ނަގަމުންނެވެ. މަޒާރުގެ ދޮރުމަތީގައި ހިންދޫންނާއެކުގައި މުސްލިމް ޒުވާނުންވެސް ސިކުންގެ މަޒުހަބީ ރާގުތަކަށް ނަށަމުން ގެންދިޔައެވެ. އަދި ހަދިޔާ ބަދިޔާ ބަދަލުކުރަމުންވެސް ގެންދިޔައެވެ.
ސިކުންގެ އަޅުވެރިން ޝަހަރުގެ މަގުތަކަކަށް ނިކުތުމުން ފިނިފެންމަލުގެ ފިޔަތަކުން އެމީހުންނަށް މަރުހަބާ ކިޔަމުން ގެންދިޔައެވެ. އަދި މަތިންދާބޯޓަކުން އެމީހުންނަށް ފިނިފެންމަލުގެ ވާރޭއެއް ވެއްސަމުން ގެންދިޔައެވެ.
ސިކުންގެ ތެރޭގައި ހިމެނުނު ގިއާނީ ކުލްދީޕް ސިންގ ބުނެފައިވެއެވެ. ޕާކިސްތާނަކީ އަހަރެމެންގެ ގުރޫ އުފަންވި މުގައްދަސް ބިމެވެ. މިއީ އަހަރެމެން ވަރަށް ލޯބިވާ ބިމެކެވެ.
ސިކުންގެ ހައްޖާޖީންނާ މުޚާތަބު ކުރައްވައި ޕާކިސްތާނުގެ ދީނީކަންތަކާ ބެހޭ ވަޒީރު މުޙަންމަދު ޔޫސުފް ވިދާޅުވިއެވެ. ދީނަކީ ތިމަތިމާމެންގެ އަމިއްލަ ނަފުސުގެ މައްޗަށް އޮތް އިޚްތިޔާރެކެވެ. އިންސާނިއްޔަތަކީ އަނެކުންނާއެކު ހިއްސާ ކުރަންޖެހޭ އަމާނާތެކެވެ.