ރައީސް ޑޮނާލްޑް ޓްރަމްޕް އާއި ރައީސް ޝީ ޖިންޕިން ބައްދަލުކުރައްވައި ދުނިޔޭގެ އެންމެ ބާރުގަދަ ކަމަށްބެލެވޭ މި 2 ލީޑަރުން ވާހަކަ ދައްކަވަން ފެށުމަކީ އުފާ ކުރަން ޖެހޭ ކަމެކެވެ. މި 2 ބޭފުޅުންގެ ކޯޅުމުގެ ނަތީޖާގައި މުޅި ދުނިޔެއަށް ގެއްލުން ލިބިގެންދާނެތީއެވެ.

މިދެބޭފޫޅުންގެ ބައްދަލުކުރެއްވުމުގައި މިހާތަނަށް އާރުލާ ގޮތަކަށް އެއްވެސް ކަމެއްގައި ޔަގީންކަން ލިބިފައިނުވާތީ ހިތްހަމަ ޖައްސައިލައިގެންވެސް ތިބެވޭކަށް ނޯންނާނެއެވެ. އާންމުގޮތެއްގައި ޗައިނާގެ ލީޑަރުންނަކީ އެގައުމުން ބޭނުންވާ ލަނޑުދަނޑި ހާސިލު ކުރެވެންދެން މަޝްވަރާތައް ދަންމާލުގެ ހުނަރު ލިބިވަޑައިގެން ތިއްބެވި ބައެކެވެ. ދޫ ދީނުމަކީ ޗައިނާގެ ރެޑްލައިނެއް ނޫނެވެ. މިހާރުވެސް ޗައިނާއިން ބޭނުންވަނީ އެމެރިކާގެ ޓެރިފް ޗައިނާގެ އުފެއްދުންތަކަށް ދައްކުރާށެވެ. ބަދަލުގައި އެމެރިކާއިން ސޯޔާބީންސް ގިނަ އަދަދަކަށް ގަންނާނެ ކަމުގެ ވައުދެއް އެމެރިކާއަށް ލިބުނެވެ. ހަގީގަތުގައި ޗައިނާއަށް އެމެރިކާގެ ސޯޔާބީން އެތެރެކުރަން ބޭނުންވެއެވެ. އެކަން ކުރާތާވެސް ކިތަންމެ ޒަމާނެކެވެ. ޗައިނާއިން އެއްދޮނުގައި ދެބުޅި ކަނޑާލިއްޔޭވެސް ބުނެވިދާނެއެވެ.
ދެކުނު ކޮރެއާގެ ބުސާންގެ ގިމްހައެ އެއާރބޭސްގައި އެމެރިކާގެ ރައީސް ޑޮނާލްޑް ޓްރަމްޕް އާއި ޗައިނާގެ ރައީސް ޝީ ޖިންޕިން އޮކްޓޯބަރ މަހު 30 ވަނަދުވަހު އަތާ އަތް ޖޯޑުކޮށް ސަލާން ކުރެއްވިއެވެ. މިސަލާންކުރުމާބެހޭގޮތުން ފާޑު ކިޔާ މީޑިއާތަކުން ހަނދާން އާކޮށްދީފައި ވެއެވެ. “ 1793 ވަނައަހަރު ލޯރޑް މަކާރޓްނީގެ ވަފުދު އިނގިރޭސި ވިލާތުން ޗައިނާއަށް ދަތުރު ކުރިއެވެ. އެ ވަފްދުގެ މެމްބަރުންނަށް ޗައިނާގެ ކިއާންލޯންގް އެމްޕެރަރގެ ފަރާތްޕުޅުންހޫނު މަރުހަބާއެއް ކިޔާފައި ވެއެވެ. ރަސްކަލުންނަށް ބަހައްޓާފަދައިން އިހްތިރާމް އަދާކުރިއެވެ. އެކަމަކު އެ ވަފުދު އެނބުރި އިނގިރޭސި ވިލާތަށް އައީ ދަތުރުގެ މަގްސަދުން އެއްވެސް މިންވަރެއް ކާމިޔާބު ނުކުރެވި ހުސްއަތާއެވެ. “ މިއީ ޗައިނާއާއެކު ވިޔަފާރިކުރަން ވިސްނާއިރު ހަނދާނުގައި ބަހައްޓަން ޖެހޭނެ ކަމެކެވެ.
މިދިޔަ ބުރާސްފަތި ދުވަހު ރައީސް ޓްރަމްޕް ކުރެއްވި ދަތުރުފުޅުގައި ހުސްއަތާ އެނބުރި ވަޑައި ގަންނަވަން ޖެހުނެކޭ ނުބުނެވޭނެއެވެ. ޗައިނާގެ ރައީސް ޝީ ޖިން ޕިން އާއެކު ބޭއްވެވި މުގައްދަސް ބައްދަލު ކުރެއްވުމުގައި ފެންޓަލީން އާ ގުޅުވައިގެން ބެއިޖިން އިން ވައުދުތަކެއް ދެއްވިއެވެ. ފެންޓަނީލް އަކީ ސަރޖްރީ ކުރުން ފަދަ ކަންތައްތަކުގައި ހޭނެއްތުމަށް ބޭނުންކުރާ ބާރުގަދަ ބޭހެކެވެ. އޭގެ ބަދަލުގައި ފެންޓަލީނުން %20 ޓެކްސް ޗައިނާގެ ހުރިހާ މުދަލަކުން ދެބައިކުޅަ އެއްބަޔަށް ޓެރިފް އުނިކުރުމާއެކުގައެވެ. އަދި ބެއިޖިނުން އެމެރިކާގެ 12 މިލިއަން މެޓްރިކް ޓަން ސޯޔާބީން މިއަހަރުތެރޭގައި ގަންނާނެ ކަމުގެ ވައުދުވެސް ލިބި ވަޑައިގެތެވެ. އަދި އެމެރިކާއަށް ލިބިދާނެ މަގެއް ނުފެނިގެން އުޅޭ “ ރެއަރ އާރތުސް “ ޗައިނާއިން އެމެރިކާއަށް އެކްސްޕޯރޓް ނުކުރަން ނިންމާފައިއޮތް އޮތުން އުވާލާނެ ކަމުގެ ވައުދުވެސް ލިބި ވަޑައިގަތެވެ. އެކަމަކު މި ވައުދުތަކުގެ އެއްބަސްވުމުގައި އޮތީ ސޮއި ނުކުރެވިއެވެ.
ދެ ރައީސުންގެ ބައްދަލު ކުރެއްވުމުގައި އެމެރިކާގެ ބަލިފައި ޗައިނާއިން ރަނގަޅަށް ދެނެގެންފި ކަމަށް މީޑިއާތަކުގައި ބުނެފައި ވެއެވެ. ޖަޕާނާ ޗައިނާގެ ދެކޮޅުވެރިކަމުގައިވެސް ޗައިނާއިންވަނީ “ ރެއަރ އާތު “ މުހިންމު އެއްޗެއްގެ ގޮތުގައި ބޭނުން ކޮށްފައެވެ. މިފަހަރު އެއަށްވުރެން މާ ފުޅާ ދާއިރާއެއްގައި އޭގެ ބޭނުން ޗައިނާއިން ކުރަން ގަސްދު ކުރާކަހަލައެވެ. ރެއަރ އާތަކި ޚާއްސަކޮށް ކުރިއަރާފައިވާ ގައުމުތަކުގެ ތަރައްގީއަށް ޓަކައި އެންމެ މުހިން އެއް މައުދަން ކަމުގައި ވެފާއޮތް އިރު ޗައިނާއިން އޭގެ މޮނޮޕޮލީ އަތުލައިފި ކަހަލައެވެ. ބައެއް އެހެން ގައުމުތަކުން ރެއަރ އާތު ލިބެން ހުރިނަމަވެސް އެ މާއްދާތައް ބޭނުންކުރޭވަރަށް ފައްކާ ކުރުމަށް އަހަރުތަކެއް ނަގާނެއެވެ. ބައެއް ތަޖުރިބާކާރުން ވިދާޅުވެފައިވާގޮތުގައި ވިއްސަކަށް އަހަރު ބޭނުންވާނެއެވެ.
ދުނިޔޭގެ ފަހުގެ ތާރީޚަށް ބަލާއިރު މިހާތަނަށް ޗައިނާއަކީ ދުނިޔޭގެ ބާރުގަދަ ގައުމުތަކުގެ ސަފުން ގުނާލެވޭ ގައުމެއް ނޫނެވެ. އެކަމަކު ޝީ ޖިންޕިންގެ ރިޔާސަތުގައި މިއަދު އެމެރިކާއާ އެއްސަފުން ޗައިނާ ގުނާ ލެވެއެވެ. އަދި ޗައިނާއަކީ އެމެރިކާއަށް ދޫނުކޮށް ހިފާއްޓާ ލެވިދާނެ ގައުމެއްކަންވެސް މިވަނީ ދުނިޔެއަށް ހާމަކޮށްދީފައެވެ.
އެމެރިކާއާއި ޗައިނާގެ ވިޔަފާރީގައި އަދިވެސް ހައްލުކުރަންޖެހޭ ގިނަ ކަންތަކެއް އެބަހުއްޓެވެ. އެހެންނަމަވެސް ކުރިއަށްއޮތް ދުވަސްތަކުގައި އެހެންގޮތަކަށް މަސްރަހް ބަދަލު ވަންދެން އެމެރިކާއިން ޗައިނާއާ ދެކޮޅަށް އަޅަން ނިންމާފައި ޓެކްސްގެ ހަރުކަށި ފިޔަވަޅުތައް މިވަނީ އޭޝިއާގެ ބައިވެރިންނެކޭ އެއްފެންވަރަށް ދަށްކުރެވިފައެވެ. އަދި ރަސްމީ ދަތުރުފުޅެއްގައި ރައީސް ޓްރަމްޕް މިއަންނަ އަހަރު އޭޕްރިލްމަހު ޗައިނާއަށް ވަޑައިގަންނަވަން ގަސްދުކުރައްވާކަންވެސް ވަނީ ހާމަ ކުރައްވާފައެވެ.