ބްރިކްސް މެމްބަރު ގައުމުތަކުގެ މި އެއްބަސްވުމަކީ ބައިނަލް އަގްވާމީ ވިޔަފާރީގައި އެމެރިކާ ޑޮލަރގެ ބޭނުން ކުޑަކުރުމުގެ ބޭނުމުގައި މެމްބަރު ގައުމުތަކުގެ މެދުގައި އެއްބަސްވެފައިވާ އެއްބަސްވުމެކެވެ. މި އެއްބަސްވުމުގެ އެންމެ މައިގަނޑު މަގްސަދަކީ އެމެރިކާގެ ފެޑެރަލް ރިޒާރވް ސިޔާސަތުގެ ސަބަބުން ދުނިޔޭގެ ވިޔަފާރި އެމެރިކާގެ މުށުތެރޭގައި ތާށިކޮށްފައި އޮތް އޮތުން ނިމުމަކަށް ގެނެސް ގައުމުތަކު މާލިއްޔަތަކީ އެގައުމެއްގެ މިނިވަންކަމާއި އިސްތިގްލާލުގެ މުހިންމު އަސާސެއްކަން މެމްބަރ ގައުމުތަކަށާއި ބައިނަލް އަގްވާމީ ދުނިޔެއަށް ވިސްނައި ދިނުމެވެ.

އެއްވެސް ގައުމެއްގެ އިގްތިސާދު އެހެން ގައުމެއްގެ މުށުތެރޭގައި ތާށިވެފައި އޮވެގެން ނުވާނެކަން ޔަގީންކޮށް ދިނުމެވެ. ހަމަކޮންމެ ގައުމަކީ އިގްތިސާދީ މިނިވަންކަން ލިބިފައިވާ ގައުމެއްކަން ގަބޫލުކުރަން ޖެހޭނެއެވެ.
ބްރިކްސްގެ އެއްބަސްވުން މިކަންކަމަށް ރަނގަޅު ހައްލެއް ގެނެސްދޭނެއެވެ. އެމެރިކާ ޑޮލަރ ބޭނުންނުކުރިޔަސް ގައުމުތަކުން ކްރޮސް-ބޯޑަރ ވިޔަފާރި ކުރެވޭ މަގުތަކެއް ހުޅުވާދޭނެއެވެ. މޯސްކޯ އެއްބަސްވުމަކީ ދުނިޔޭގެ ބާޒާރު އެމެރިކާ ޑޮލަރަށް ބުރަވެފާއޮތް އޮތުމަށް ނިމުން ގެނައުމުގެ ފުރަތަމަ ފިޔަވަޅުކަމުގައި ބެލިދާނެއެވެ. މި ބަދަލު ގެނައުމަށްޓަކައި ގައުމުތަކުގެ ސަރުކާރާއި ލޯކަލް ކައުންސިލްތަކުން މިނިވަން ވިސްނުމެއް ގެންގުޅެން ޖެހޭނެއެވެ. ކޮންމެ ސިފައެއްގައި ނަމަވެސް ވަކި ގައުމަކަށް ލެނބިގެން ތިބުމަކީ އަޅުވެތިކަމުގެ ސިފައެކެވެ.
ބައިނަލް އަގްވާމީ ވިޔަފާރީގައި އެމެރިކާ ޑޮލަރުގެ ނުފޫޒު ކުޑަކުރުމުގެ މަގްސަދުގައި ބްރިކްސްގައި ހިމެނޭ ގައުމުތަކުން ސޮއިކުރި މޯސްކޯ އެއްބަސްވުމުގެ ފުރަތަމަ ފިޔަވަހީގައި މެމްބަރު ގައުމަކުން އެހެން މެމްބަރު ގައުމުތަކާއެކު ކުރާ ކްރޮސް-ބޯޑަރ ވިޔަފާރީގައި، އެހެންގޮތެއް ހަމަޖެހެންދެން، އެގައުމެއްގެ އަމިއްލަ ފައިސާ ބޭނުން ކުރެވޭނެއެވެ.
އެމެރިކާ ޑޮލަރުގެ ނުފޫޒުން ސަލާމަތްވުމަށްޓަކައި 2025 ވަނައަހަރުގެ ތެރޭގައި ގިނަގުނަ މަސައްކަތްތަކެއް ކުރެވި ކާމިޔާބީތަކެއްވެސް ހާސިލު ކުރެވިއްޖެ ކަމަށް ރަޝިޔާގެ ޑެޕިއުޓީ ޕްރައިމް މިނިސްޓަރ އެލެގްޒެންޑަރ ނޯވަކް ވިދާޅުވިއެވެ. އަދި މިއަހަރުގެ ތެރޭގައި އެމެރިކާ ޑޮލަރު އެއްފަރާތްކޮށް ގައުމުތަކުގެ އަމިއްލަ ފައިސާއިން އެހެންގައުމުތަކާއެކު ކުރާ ވިޔަފާރިތަކަށް މަގުވެސް ތަނަވަސް ކުރެވިއްޖެއެވެ. އިންޑިއާއާއި ޗައިނާއިން ބޭރުގެ ވިޔަފާރީގެ ބޮޑު ހިއްސާއެއް މިހާރުވެސް ބިނާކޮށްފައި އޮތީ އެ ގައުމުތަކުގެ ފައިސާއިން އަގު އަދާކުރާގޮތަށެވެ.
ބްރިކްސް ގައި ހިމެނޭ ގައުމުތަކުގެ ދުނިޔޭގެ އާބާދީގެ ދެބައިކުޅަ އެއްބަޔަށް ވުރެން މީހުން ގިނައެވެ. އަދި ދުނިޔޭގެ އުފެއްދުންތެރިކަމުގެ ބޮޑު ހިއްސާއެއްވެސް މި ގައުމުތަކުން އަދާކުރަމުން ގެންދެއެވެ.
ބްރިކްސް ފައިސާއަކީ ދުނިޔޭގެ ރިޒާވް ފައިސާއެއްގެ ގޮތުގައި ކަށަވަރުކުރަން ރަޝިޔާއިން ގެންދަނީ ބުރަ މަސައްކަތްތަކެއް ކުރަމުންނެވެ. މިހާތަނަށް އެ މަސައްކަތް ކުރިއަށް ގޮސްފައިވާ މިންވަރު ރަޝިޔާއިން ހާމަކޮށްފައެއް ނުވެއެވެ. އެހެންނަމަވެސް އެނގި ކަށަވަރުވާ އެއްކަމަކީ ބްރިކްސް ފައިސާއަކީ ދުނިޔޭގެ ރިޒާރވް ފައިސާއެއްގެ ގޮތުގައި ހަމަޖެހުމާއެކު އެމެރިކާ ޑޮލަރަށް ދުނިޔޭގެ ބާޒާރު ލެނބިފައި އޮތުން ވަރަށް ބޮޑަށް ވެއްޓިގެން ދާނެއެވެ.
ފޮރިން އެކްސްޗޭންޖް ބާޒާރުގައި ގިނަ އަހަރުތަކެއްވާންދެން އެމެރިކާ ޑޮލަރަކީ ރިޒާވް ފައިސާއެއްގެ ގޮތުގައި ގައުމުތަކުން ބަލައިގަނެފައިވަނިކޮށް އަލަށް އުފެދެން އުޅޭ ބްރިކްސް ފައިސާއަކީ ރިޒާވް ފައިސާއެއްގެ ގޮތުގައި ބައިނަލް އަގްވާމީ ބާޒާރަށް ވެއްދުމަށްޓަކައި ގިރާކުރަންޖެހޭ ހުރަސްތަކެއް އެބަހުއްޓެވެ. އޭގެ ތެރޭގައި ބައިނަލް އަގްވާމީ ވިޔަފާރީގައި ބްރިކްސް ފައިސާ އަދާކުރަމުންގެންދާ ދައުރާއި އިތުބާރު ހޯދިފައިވާ މިންވަރު ޚާއްސަގޮތެއްގައި ފާހަގަކުރަން ޖެހެއެވެ. އޭގެ އިތުރުން ދުނިޔޭގައި ބޭނުންކުރެވޭ ރިޒާރވް ފައިސާއަކަށް ވުމަށްޓަކައި އިންޓަރނޭޝަނަލް މަނިޓަރީ ފަންޑުގެ ސްޕެޝަލް ޑްރޯވިން ރައިޓްސްގައި ކަނޑައަޅާފައިވާ ޝަރުތުތައްވެސް ފުރިހަމަ ވާން ޖެހޭނެއެވެ. މިއީ ކޮށް ނިންމާލުން އެހާ ފަސޭހަ ކަމަކަށްވެސް ނުވާނެއެވެ.