ސޫދާނުގައި ދެ ގުރޫޕެއްގެ ދެމެދުގައި ތަޅާފޮޅާތާ ދުވަސްތަކެއް ވެއްޖެއެވެ. އެއްގުރޫޕަކީ ސޫދާންގެ ސަރުކާރުގެ ސިފައިނެވެ. ދެވަނަ ގްރޫޕަކީ ކުލީ ސިފައިން ހިމެނޭ ޔޫ.އޭ.އީ. އިން ހަތިޔާރު ފޯރުކޮށްދޭ ސޫދާނުގެ ސަރުކާރާއި ބަޣާވާތް ކޮށްގެން އުޅޭ ރެޕީޑް ސަޕޯޓް ފޯސް އެކެވެ. މިއީ ކުރިން ސަރުކާރުގެ ސިފައިންނަށް އެހީތެރިވުމަށް އޮތް ޖަމާޢަތެކެވެ.

މިޖަމާޢަތް އުފެދުނީ ، ސޫދާންގެ ވެރިކަމުން ޢުމަރު އަލްބަޝީރު ދުރުކުރުމަށް ފަހުގައެވެ. ޢުމަރު އަލްބަޝީރު ގެ ދުވަސްވީ ވެރިކަން ވެއްޓުމަށް ދިމާވީ ސަރުކާރުގެ ތެރޭގައި ކޮރަޕްޝަން ބޮޑުވެ ވަކިބަޔަކު ތަނަވަސް ކަމުގައި އުޅެ ރައްޔިތުން ނިކަމެތި ވުމަށް މެދުވެރިވުމާއެކު ހަމަނުޖެހުންތަކުގެ ތެރެއަށް ބޭރުގެ ފަރާތްތަކަށް ވަނުމުގެ ފުރުޞަތު ފަހިވެގެން ދިޔުމެވެ. ލޭއޮހޮރުވުން ފެށުނީ ، 2023 ގައެވެ. އެއީ ސޫދާނުގެ ސަރުކާރުން މިގުރޫޕްގެ މީހުން ގަދަކަމުން ސިފައިންގެ ތެރެއަށް ވެއްދުމަށް އުޅުމުންކަމަށް ވެއެވެ.

މިއީ ފެށުން ކަމަށް ވިޔަސް މިތަޅާފޮޅުމާއި ލޭއޮހޮރުވުން ތަކުގެ އަސްލަކީ ، ސޫދާނުގެ ރަން ވަޅުތަކުގެ ކޮންޓްރޯލް އަތުލުމެވެ. ސޫދާނުގެ ޖަބަލު ޢާމިރު ކިޔާ ސަރަހައްދުގައި އޮތް ރަންވަޅުން ހަމައެކަނި 2023 ގައި ވެސް 50 ޓަނުގެ ރަން ނަގާފައިޕވެއެވެ. ސޫދާނަކީ ދުނިޔޭގެ ނިސްބަތުން 10 ވަނައަށްރަނުގެ އެންމެ ބޮޑު ރިޒާވެއް އޮތް ޤައުމެވެ.

ބަޣާވާތް ކޮށްގެން މިއުޅޭ ޖަމާޢަތަކީ ސޫދާންގެ ކުރީގެ ރައީސް ޢުމަރުލް ނަޝީރު ގެ ދުވަސްވީ ވެރިކަން ވައްޓާލުމަށް ފަހު ސަރުކާރުގެ ސިފައިންނަށް އެހީތެރިވުމަށް ބައިވެރިކުރުވި ހަތިޔާރު އެޅި ޖަމާޢަތެކެވެ. ސޫދާން ގައި ހިނގަމުން އަންނަ ހަމަނުޖެހުންތަކާއި ބަލާއިރުގައި،
ސޫދާން ގެ ސިފައިންނަށް ތާއީދު ކުރަނީ ތުރުކީ އާއި މިޞްރެވެ. ބާޣީ ޖަމާޢަތް ރެޕީޑް ސަޕޯޓް ފޯސް އަށް ތާއީދުކުރަނީ، ޔޫ އޭ.އީ.އެވެ. ޔޫ އޭ އީ އަންނަނީ ފާޅުގައި ކުލީ ސިފައިން ހިމެނޭ ބާޣީ ޖަމާޢަތަށް ފާޅުގައި ތާއީދުކޮށް ހަތިޔާރު ފޯރުކޮށްދެމުންނެވެ. ސައޫދީ ޢަރަބިއްޔާ ސަރުކާރަށް ތާއީދު ދިން ނަމަވެސް ބާޣީ ޖަމާޢަތާއި ވެސް ގާތްގުޅުމެއް ބާއްވާކަމަށް ވެއެވެ.

ހަމަނުޖެހުންތައް ފެށުނުތާ ކުރީކޮޅު ރަޝިޔާއިން ބާޣީންނަށް ތާއީދު ކުރި ނަމަވެސް ރަން ނެގުމަށާއި ބަނދަރު ހެދުމަށް ސަރުކާރުން ތާއީދުކުރާނެ ކަމުގެ ވައުދާ އެކު ރަޝިޔާ ގެ ތާއީދު ސަރުކާރުގެ ސިފައިންނަށް ލިބުމެވެ. އަދި ކުރިން ބުނެވުނު ޤައުމުތައް ފިޔަވައި ކިތަމެ ޤައުމެއް ސިއްރާއި ފާޅުގައި ސަރުކާރުގެ ސިފައިންނާއި ބާޣީންނާއި އެކުވެސް ގުޅުން ބާއްވަމުން ދެއެވެ.

ސޫދާނުގައި ހިނގަމުންދާ ހަމަނުޖެހުންތަކުގެ ތެރޭގައި ޔޫ.އޭ.އީ. ( އިމެރެޓްސް ) އިން އަންނަނީ އެހީތެރިވެދޭ ބާޣީ ޖަމާއަތު ގެ ކޮންޓްރޯލްގެ ދަށުގައިވާ ބިންތަކުން ރަން ސްމަގުލު ކުރަމުން ކަމަށް ވެއެވެ. ސޫދާނުގައި ބޮޑު ރަނުގެ ރިޒާވެއް އޮތް ނަމަވެސް ސަރުކާރު ގެ ތެރޭގައި ކޮރަޕްޝަން ބޮޑުވުމާއި ސަރުކާރު ގެ އިދާރީ ހިންގުމުގެ އޮނިގަނޑު ދޯހަޅި ކަމުން ރައްޔިތުން ކުރެ ގިނަބަޔަކޫ އުޅެނީ ވަރަށް ފަޤީރުޙާލުގައެވެ.

ދެ ޖަމާޢަތުގެ މެދުގައި ހިނގާ މި ތަޅާފޮޅުމުގެ ދެމެދު ތާށިވެ އިތުރަށް ނިކަމެތިވެ ފަނާވެ ދަނީ ގައުމުގެ ރައްޔިތުންނެވެ. އޮހެމުން ދަނީ މުސްލިމުންގެ ލޭގެ ކޯރުތަކެވެ. ބާޣީ ޖަމާއަތުން ގެންދަނީ ކުޑަވެސް ރަޙުމެއް އިންސާނިއްޔަތު ކަމެއް ނެތި ފެންނަ މީހެއްގެ ގަޔަށް ބަޑި ޖަހަމުންނެވެ. އިސްރާއީލުން ގާޒާ ސުންނާފަތި ކޮށްލިގޮތަށޭ ބުނުމަކުން މާބޮޑު ދޮގަކަށް ނުވާނެއެވެ. އަންހެނަކަށް ކުޑަކުއްޖަކަށް ބެލުމެއް ނެތިއެވެ. އަންހެނާގެ އުނގުގައި ތިބޭ ކުދިންގެ ގަޔަށް ހަމަލާ ދެނީ މަންމަ ގެ އުނގުގައި ވަނިކޮށެވެ. ހައިރާންވެ ކަމަކީ ދެ ޖަމާއަތުން ވެސް ތަޅާފޮޅަނީ އަދި ލޭއޮހޮރުވަނީ ﷲأكبر ކިޔަމުން ކަމަށް ވާތީއެވެ.

ދުޢާ އަކީ ﷲتعالى މުސްލިމު އުއްމަތަށް އެކަލާންގެ ރަޙުމަތް މިންވަރުކޮށް ދެއްވުމެވެ. މުސްލިމު އުއްމަތް ބައިބައިކޮށް ނިކަމެތި ކުރުމަށް މަސައްކަތްކުރާ ޖަމާޢަތްތައް ބަލިކަށި ކުރައްވައި މިއުންމަތަށް ސުލްޙައަށް ލޯބިކުރާ ގަދަފަދަ އިމާމަކު މިންވަރުކޮށް ދެއްވުނެވެ. އެއް ދިދައެއްގެ ދަށުގައި އިސްލާމީ ޚިލާފަތެއްގެ ދަށަށް އިސްލާމީ އުއްމަތް ޖަމާކޮށް ދެވުމެވެ.