ދިވެހި ފުލުހުންގެ ޚިދުމަތުގެ ބެލުމުގެ ދަށުގައި އޮތް ފޯނަކުން ފޮޓޯއެއް ލީކުވި ކަމަށް ބުނާ މައްސަލަ، އެ ޚިދުމަތުން ދޮގުކޮށްފިއެވެ.
ފުލުހުންގެ ބެލުމުގެ ދަށަށް ދާދި ފަހުން ގެނެވުނު ފޯނަކުން ފޮޓޯއެއް ލީކުވި ކަމަށް ބުނާ މައްސަލައާ ގުޅޭގޮތުން ފުލުހުންގެ ޚިދުމަތުން ނެރުނު ބަޔާނެއްގައި ބުނެފައިވަނީ، އެ ޚިދުމަތުގެ ބެލުމުގެ ދަށަށް ގެނެވޭ މިފަދަ ތަކެތީގެ ރައްކާތެރިކަން ބައިނަލްއަޤްވާމީ މިންގަނޑަށް ހިފެހެއްޓުމަށްޓަކައި ހަރުދަނާ އުސޫލުތަކެއް ހެދިފައިވާކަމަށެވެ.
ފުލުހުންގެ ތަޙުޤީޤުތައް ކުރިއަށްދަނީ ޕްރޮފެޝަނަލް ކަމާއެކު، ގާނޫނީ ހަމަތަކުގެ މަތިން، ހެކީގެ ރައްކާތެރިކަން ކަށަވަރުކޮށްގެން ކަމަށާއި، އިންސާނީ ޙައްޤުތަކަށް އިޙުތިރާމު ކުރުމާއެކު ކަމަށް ފުލުހުންގެ ޚިދުމަތުން ވަނީ ބުނެފައެވެ.
އެހެންކަމާއެކު، އެ ޚިދުމަތުގެ ބެލުމުގެ ދަށަށް ގެނެވޭ ހެކި، އަދި ޑިޖިޓަލް ވަސީލަތްތަކުގައި ހިމެނޭ އެއްވެސް މަޢުލޫމާތެއް އެހެން ފަރާތްތަކަށް ވާސިލުވުމުގެ ފުރުސަތު ނޯންނާނެ ކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.
