މިއަދު ހެނދުނުގެ ވަގުތެއްގައި އަލިފާންރޯވި މ. އަފްޒާގައި ދިރިއުޅުނު މީހުންނަށް ވަގުތީ ބޯހިޔާވަހިކަން ފޯރުކޮށްދީފި ކަމަށް، ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ބުނެފިއެވެ.
އެ ސެންޓަރުން މަޢުލޫމާތު ދިންގޮތުގައި، މި ހާދިސާގެ ސަބަބުން ދުމާއި، އަލިފާނުގެ ސަބަބުން އެކިވަރުގެ ގެއްލުން ލިބުމާ ގުޅިގެން، އެ އެޕާޓުމަންޓުގައި ދިރިއުޅުނު މީހުންނަށް 5 ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ ޚަރަދު ވަނީ ހަމަޖައްސާފައެވެ.
މި ހާދިސާ ހިނގަން މެދުވެރިވީ އެ ގޭގެ 6ވަނަ ފަންގިފިލާގައި ހުރި އެޕާޓުމަންޓެއްގެ ބެލްކަނީގައި ހަރުކޮށްފައި ހުރި އޭސީ އައުޓްޑޯރ ޔުނިޓެއްގައި ރޯވެގެންނެވެ.
މި ހާދިސާގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބިފައިވަނީ މިއަދު 07:43 ހާއިރުކަމަށާއި، އޭގެ ގާތްގަނޑަކަށް 15 ވަރަކަށް މިނިޓު ފަހުން އަލިފާން ނިއްވާލެވިފައި ވާކަމަށް އެމްއެންޑީއެފުން ބުނެއެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވިނަމަވެސް، އެޕާޓުމަންޓު ތެރެއަށް އަލިފާން ފެތުރި، އެކި ވަރުގެ ގެއްލުން ލިބިފައިވާކަމަށް އެމްއެންޑީއެފުން މަޢުލޫމާތުދެއެވެ.
