ކެއްސުމަށް ދޭ ބޭހެއް ކަމަށްވާ ކޮފްސީ ސިރަޕް ވިއްކުން، މޯލްޑިވްސް ފުޑް އެންޑް ޑްރަގް އޮތޯރިޓީން މަނާކޮށްފިއެވެ.
އެ އޮތޯރިޓީން ނެރުނު ނޫސްބަޔާނެއްގައި ބުނެފައިވަނީ، ރާއްޖެއަށް އެތެރެކުރެވޭ ބޭސްތަކަކީ ރައްކާތެރި، ފެންވަރު ރަނގަޅު ބޭސްކަން ކަށަވަރު ކުރުމަށްޓަކައި ކުރަމުންދާ މަސައްކަތުގައި، މާކެޓިންގ ސަރވެއިލެންސްގައި ކޮފްސީ ސިރަޕް (cofsy syrup)ގެ ކޮލިޓީ މައްސަލަތަކެއް ފާހަގަކުރެވިފައި ވާކަމަށެވެ.
އެހެންކަމާއެކު، މިއަދުން ފެށިގެން މި ބޭސް އެތެރެކުރުމާއި ވިއްކުން، އަދި މި ބޭސް ބޭނުންކުރުންވެސް އެ އޮތޯރިޓީން ވަނީ މަނާކޮށްފައެވެ.
އަދި، މި ބޭސް އެއްވެސް ފާމަސީއެއްގައި ހުރިނަމަ، ބޭސް ނައްތާލުމަށް ހަމަޖެހިފައިވާ ގަވައިދާއި އުސޫލުގެ ދަށުން މި ބޭސް ނައްތާލުމަށް ފުޑް އެންޑް ޑްރަގް އޮތޯރިޓީން ވަނީ އަންގާފައެވެ.
އެ އޮތޯރިޓީން ބުނީ، މި ބޭސް ބޭނުންކުރުމުގެ ސަބަބުން އެއްވެސް މީހަކަށް ޞިއްޙީ މައްސަލައެއް ދިމާވެގެން އެ އޮތޯރިޓީއަށް މިހާތަނަށް ރިޕޯޓުކޮށްފައި ނުވާކަމަށެވެ.
ބޭހުގެ ރައްކާތެރިކަން ކަށަވަރު ކުރުމަށްޓަކައި، ބޭސް އެއްތަނުން އަނެއްތަނަށް ގެންދިއުމާއި، ގުދަންކުރުމުގައި ސަމާލުވުމަށްވެސް އެ އޮތޯރިޓީން ވަނީ އިލްތިމާސްކޮށްފައެވެ.
އަދި، އިތުރު މަޢުލޫމާތެއް ބޭނުންވާނަމަ، މެޑިސިން އެންޑް ތެރަޕިއުޓިކް ގުޑްސް ޑިވިޜަންގެ ހޮޓްލައިން 7200321 އަށް ގުޅުމުން މަޢުލޫމާތު ސާފުކުރެވޭނެކަމަށް ފުޑް އެންޑް ޑްރަގް އޮތޯރިޓީން ބުނެއެވެ.
