އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ފަރާތުން 100 ޑަސްބިން އަދި އައިކެއާއި އޮޕްޓިކަލްގެ ފަރާތުން 100 ނޯޓުފޮތް ހައުސިން މިނިސްޓްރީއަށް ހަދިޔާކޮށްފިއެވެ.
ގްރީން ބިލްޑިންގައި ޑިސެމްބަރު މަހުގެ 12 ވަނަ ދުވަހު ހިނގި އަލިފާނުގެ ހާދިސާގައި ހައުސިން މިނިސްޓްރީ ހިމެނޭހެން ތިން މިނިސްޓްރީއެއް ހިންގަމުންދިޔަ އިމާރާތް ވަނީ ބޭނުން ނުކުރެވޭ ވަރަށް އަނދާފައެވެ.އެހެންކަމުން އެ މިނިސްޓްރީން ދެމުން އައި ޚިދުމަތްތައް މެދުކެނޑުމެއްނެތި ރައްޔިތުންނަށް ފޯރުކޮށްދިނުމަށްޓަކައި އެ މިނިސްޓްރީތައް ވަގުތީގޮތުން ދަރުބާރުގެއަށް ބަދަލުކޮށް ޚިދުމަތްތައް ދޭން ވަނީ ފަށާފައެވެ.
ހައުސިން މިނިސްޓްރީން އެކްސްގައި ކުރި ޕޯސްޓެއްގައި ވަނީ އައިޖީއެމްއެޗްގެ ފަރާތުން އެ މިނިސްޓްރީއަށް 100 ޑަސްބިން ހަދިޔާކޮށްފައިވާ ކަން ހާމަކޮށް އެ ހޮސްޕިޓަލަށް ޝުކުރު އަދާކޮށްފައެވެ. އެ މިނިސްޓްރީއާ ޑަސްބިންތައް ހަވާލުކޮށްދެއްވީ އަައިޖީއެމްއެޗްގެ ސީއީއޯ އިބްރާހީމް އަބްދުއްރައްޒާގު ހަލީމެވެ. އަދި މިނިސްޓްރީގެ ފަރާތުން ޑަސްބިންތަކާ ހަވާލުވެވަޑައިގަތީ ހައުސިން މިނިސްޓަރު ޑރ. އަލީ ހައިދަރު އަހުމަދެވެ.
އައިޖީއެމްއެޗްގެ އިތުރުން އައިކެއާ އޮޕްޓިކަލްގެ ފަރާތުންވެސް ވަނީ މި ދަނޑިވަޅުގައި އެ މިނިސްޓްރީއަށް އެހީތެރިވުމަށް 100 ނޯޓު ފޮތް ހަދިޔާކޮށްފައެވެ. ހައުސިން މިނިސްޓްރީން އެކްސްގައި ކުރި ޕޯސްޓެއްގައި ވަނީ އެކަން ހާމަކޮށް އައިކެއާއަށް ޝުކުރު އަދާކޮށްފައެވެ.
